Mat. 15 - Ebaibul

Akitatam ŋina atapapaa

¹ Potu Ŋiparisayon ka ŋiketatamak a Ŋikisila alo Yerusalem neni a Yesu kiŋita iŋes temasi,

² “Nyo nyiwuapitotor ŋikasyomak kon ŋitalyo ŋulu atapapaa yok? Anerae nyilotanarete ikes ŋakan kec eriŋa nyimuja!”

³ Toboŋok Yesu ikes tema, “Kaanukiro bo ibilitotor iyes daŋ ŋakiciketa ŋuna ka Akuj, aŋuna ka akiwuapya ŋulu kus?

⁴ Anerae ikicikakinit Akuj atemar, ‘Tokerite papa kon ka toto kon ka ituŋanan ŋini iceni papa keŋ kori toto keŋ, itemokino totwan jik.’

⁵ Nai ibasi iyes, Ani ketema ituŋanan isirwori papa keŋ kori toto keŋ, ebe, ‘Ŋini adikino iyoŋ iryamuni aneni kaŋ, erae ŋini einakinitae Akuj,’

⁶ nyitemokino iŋes ainakin papa keŋ ibore ŋin. Iŋes nai atemar ijamakis iyes akirot ka Akuj aŋuna a ŋitalyo kus.

⁷ Iyes ŋikaŋisoswae! Eyookinit kire koloŋ Isaya edwari aŋuna kus ebala,

⁸ ‘Eketopoloorito ayoŋ ŋituŋa lu alorwor kec, nai elwaka ŋikecetai aneni kaŋ.

⁹ Nabo ilipete ikes neni kaŋ koŋin, anerae itatamete ikes ŋitalyo a ŋituŋa esibit ŋulu ka Akuj!’ ”

Ibore ŋini itoroniyari ituŋanan

¹⁰ Tonyarau nai iŋes ŋituŋa neni keŋ tolimok tema, “Topupokisi ikotere iyenunete!

¹¹ Meere ibore ŋini elomari nituŋanan epedori akitoroniyar iŋes; nai ŋini elomuni anituŋanan iŋes itoroniyari iŋes.”

¹² Potu nai ŋikasyomak neni keŋ tolimokis iŋes temasi, “Iyeni iyoŋ atemar abu takadak Ŋiparisayon, iirarete ŋakiro ŋuna ilimuni iyoŋ a?”

¹³ Toboŋok Yesu ikes tema, “Ekitoe daadaŋ ŋolo nyerae papa kaŋ ŋolo anakuj edupakinit, erutoryo.

¹⁴ Kimyekisi ikes make. Erae ikes ŋikarikok ŋulu emudukaka alokidiŋ ŋimudukanotin ŋuluce. Ani kerik ituŋanan ŋini emudukana emudukanot, imasakinosi ikes daadaŋ nauwuat.”

¹⁵ Nai kiŋit Petero Yesu tema, “Tolimokinae isua apolou ŋina ka akitadapet a ŋin.”

¹⁶ Tolimok Yesu ikes tema, “Ibaŋaaka iyes daŋ ikote ŋuluce.

¹⁷ Nyiyenete iyes atemar ibore daadaŋ ŋini itori nakituk a ituŋanan elosi tooma nakook, ani ekaku tolunyar toloma kiŋa a?

¹⁸ Nai ŋakiro ŋuna itorunete nakituk a ituŋanan eponito alotau, ido tomunaasi ituŋanan;

¹⁹ anerae lotau elomununiata ŋakiro ŋuna aronok, ikwa: akiar, elomi, amalao, akoko, alyokonu ka akiyany.

²⁰ Ŋun ikes itoroniyarete ituŋanan, nai meere akimuj nyilotara ŋakan itoroniyari ituŋanan.”

Anupit ŋina ka aberu a ŋina pa arae Ayudayat

²¹ Torotok Yesu a nen, tolot nakwap ŋina alodiye Tiro ka Sidon.

²² Bu aberu ŋina arae Akananait ŋina ayai nakwap ŋin, kimaima Yesu tema, “Ekapolon, Lokoku a Daudi! Kisyoni ayoŋ! Edyaka nakoku kaŋ, ikamunit ekipye iŋes!”

²³ Nai nyelimok Yesu iŋes adiokirot. Ani epote ŋikasyomak keŋ kimaimaa iŋes temasi, “Kirita aberu na tolot! Anerae ikicalanakini iŋes iwon!”

²⁴ Toboŋok Yesu ikes tema, “Ekeyakuunitae ayoŋ neni a ŋituŋa a Isirael make, a ŋulu eoliyorito ikwa ŋameseekin.”

²⁵ Nai abu aberu ŋin toryedik alokiŋaren keŋ tema, “Ekapolon, kiŋarakinae!”

²⁶ Toboŋok Yesu iŋes tema, “Nyejok akimuj a ŋidwe einakinio ŋiŋokwo.”

²⁷ Tema aberu elimokini Yesu, “Ee, Ekapolon, nai ŋiŋokwo daŋ idepete ŋarare ŋuna ka akimuj ŋuna ecakunun alomesae a ŋikecekapolok.”

²⁸ Tosodi Yesu toboŋok iŋes tema, “Aberu, epol akoninupit, kitiyakin neni kon ikwaŋina icamitor iyoŋ.” Toŋaleu nakoku keŋ apaki ŋinapei ŋin.

Kitaŋaleu Yesu ŋituŋa ŋulu alalak

²⁹ Torotok Yesu a nen kitor diye anam ŋina alo Galileya, todoka lomukura kiboikin.

³⁰ Potu ŋasepico a ŋituŋa ŋuna alalak neni keŋ eyaunito ŋikadyakak, ŋikaŋwalak, ŋimudukanotin, ŋikecodok ka ŋituŋa ŋulu pa erworosi ta ŋice daŋ ŋulu alalak. Kiwuakis ikes nakejen a Yesu, kitaŋaleu Yesu ikes.

³¹ Aŋun, toumokis ŋasepico a ŋituŋa eanyuwarete ŋituŋa ŋulu sek pa erworosi, irworosi, ŋikaŋwalak eŋaleunete ka ŋulu ecodok ejokunete ta ŋimudukanotin ekienyunete. Tosodo ŋituŋa ŋul daadaŋ kipuro Akuj ŋina a Isirael.

Kisimuj Yesu ŋituŋa ŋalipyo ŋaomwon

³² Tonyarau Yesu ŋikeekasyomak tema, “Ekesyon ayoŋ asepic a ŋituŋa, anerae ikiruk ayoŋ ka ikes ŋirwa ŋiuni emam ibore ŋini emuja ikes. Nyaesikini ayoŋ ikes elosete pa imujito, ikotere nyileleny ikes alorot aŋuna enyamitor akoro.”

³³ Kiŋita ŋikasyomak iŋes temasi, “Ai nai ikiryamunia iwon akimuj ŋina itemokin ŋituŋa ŋulu etya lu analoŋisat a na?”

³⁴ Toboŋok Yesu ikes tema, “Ŋamugati ŋayai iyakatar iyes?” Temasi ikes, “Ŋakanikaarei ka ŋikolya ŋidikudyo.”

³⁵ Tolimok Yesu asepic a ŋituŋa akiboikin.

³⁶ Tolemu ŋamugati ŋunakanikaarei ka ŋikolya, kilipak. Ani kedau akilipakin tonyilinyili, inak ŋikasyomak tokorakis lotuŋa.

³⁷ Kimuja ŋituŋa daadaŋ kimwoko, kilelebun akimuj ŋina apiyanunete ikes ŋaditae ŋakanikaarei.

³⁸ Arae ekimar a ŋikilyok a ŋulu emujete ŋalipyo ŋaomwon, pa imarakinitae ŋaberu ka ŋidwe.

³⁹ Ani kitolot Yesu ŋituŋa, todoka iŋes nataker tolot nakwap a Magadan.