Mat. 14 - Ebaibul

Atwanare a Yoana ke Ekebatisan

¹ Apaki ŋin, topup erwosit Erode ŋakiro ŋuna epuritotor ŋituŋa Yesu.

² Tolimok Erode ŋiketiyak keŋ tema, “Erae lo Yoana Ekebatisan, kiteyarun iŋes alokatwak, iŋes nai eyakatar ŋiticisyo ŋulu ka apedor tooma keŋ.”

³ Aris Erode kikama Yoana toen ya mabus, aŋuna ke Erodiya a ŋina arae aberu a Pilipo a lokaato ke Erode.

⁴ Alimokinit sek Yoana Ekebatisan Erode atemar, “Italeo iyoŋ akituruwor aberu a lokaato kon ŋina kon!”

⁵ Acamit Erode akiar Yoana, nai tokuryanar aŋuna a ŋituŋa a ŋulu anupito atemar erae Yoana ekadwaran.

⁶ Nai akoloŋit ŋina eitunitere akidouno ke Erode, abu nakoku ke Erodiya kidoŋa alokiŋaren ŋituŋa ejok nooi, kitalaka Erode.

⁷ Kikoŋ Erode tema, “Ainakini ikoku en ŋinibore daadaŋ ekeŋisi iŋes ayoŋ!”

⁸ Aŋuna alimokinia toto keŋ iŋes ibore ŋini kiŋita, abu kiŋit tema, “Inakinae ayoŋ akou a Yoana ke Ekebatisan iwuakinitae natuba!”

⁹ Tobul Erode, nai aŋuna sek ekoŋitor iŋes ka aŋuna a ŋipeyok keŋ, abu tolimu tema, “Inakisi.”

¹⁰ Abu kiyakiya ŋasigarya alosit atubun akou a Yoana ke Ekebatisan a ŋolo ayai apaki ŋin mabus.

¹¹ Kiwuakinae akou keŋ natuba, inakinae apese, ina toto keŋ.

¹² Apotu nai ŋikasyomak a Yoana yaa akuwan keŋ, tonuka. Ani irikakin, toloto tolimokis Yesu.

Kisimuj Yesu ŋituŋa ŋalipyo ŋakan

¹³ Ŋolopite eirarya Yesu ŋakiro ŋuna a Yoana, tonyou anakwap a ŋin, todoka nataker tolot neni keŋ bon, neni asilon. Ani nai iirarete ŋituŋa ŋun, potu alotaunio kec kiwuapasi Yesu.

¹⁴ Ani eriŋa Yesu edoki anataker, kiŋolik asepic ŋina alalan, kisyonioto ikes iŋes, tosodi kitaŋaleu ŋulu adyakasi.

¹⁵ Ani edoli eboŋ, potu ŋikasyomak neni keŋ tolimokis iŋes temasi, “Erae nege ariet ka elosi akwap akiwar; kitoboŋo ŋituŋa, ikotere toloto lorerya togyelut idiobore ŋini nyamat.”

¹⁶ Nai tolimok Yesu ikes tema, “Nyitemokino ikes toloto, inakisi iyes ikes adiokimuj.”

¹⁷ Tolimokis ikes iŋes temasi, “ Emam ibore ikiyakar isua, mati ŋamugati ŋakan ka ŋikolya ŋiarei make.”

¹⁸ Tolimok iŋes ikes tema, “Yautu ikes neni kaŋ.”

¹⁹ Kisiboik nai Yesu ŋasepico a ŋituŋa lonya. Tolemu nai iŋes ŋamugati ŋunakan ka ŋikolya ŋuluarei, kireo kidiama nakuj, kilipak, tosodi tonyilinyili ŋamugati inak ŋikasyomak tokorakis ikes nasepico.

²⁰ Kimuja daadaŋ kimwoko, ido tocunut ŋikasyomak ŋapiyanunet ŋuna apotu kilelebun naditae ŋatomon ka ŋaarei.

²¹ Adolit ekimar a ŋikilyok a ŋulu emujete ŋalipyo ŋakan, pa imarakinitae ŋaberu ka ŋidwe.

Torotok Yesu alokidiama nakipi

²² Kitodoku Yesu ŋikasyomak keŋ anataker kisiŋaren ikes, toloto ekekwaye anam, kidoŋ iŋes akitolot ŋasepico.

²³ Kedau iŋes ŋun, todoka iŋes bon lomukura akilip, todoiyo akoloŋ eriŋa iŋes bon eyai nen.

²⁴ Nai apaki ŋin aris ataker keeka alokipetot. Kibapabapaete ŋikaguragurae a ŋakipi ataker, anerae akutunit ekuwuam anakan a ŋina alosete ikes.

²⁵ Ani ebai akuwar, bu Yesu neni a ŋikasyomak elosi alokidiama nakipi.

²⁶ Nai ani eanyuwarete ŋikasyomak keŋ iŋes elosi alokidiama nakipi toryaŋakinos ikes temasi, “Erae ekipye.” Kiworout aŋuna ke ekabule.

²⁷ Nai kirworik Yesu neni kec atipei tema, “Totitinyikisi! Erae ayoŋ. Nyikibul!”

²⁸ Tolimok Petero iŋes tema, “Ekapolon, ani kerae iyoŋ, tolimokinae ayoŋ daŋ obu neni kon alosi alokidiama nakipi.”

²⁹ Tolimok nai Yesu iŋes tema, “Bua!” Todoku Petero anataker, torotok alokidiama nakipi, tolot neni ayai Yesu.

³⁰ Nai ani iŋolikini iŋes ekuwuam ekutunit, tobul, kisyak asipor, kiworou tema, “Ekapolon, toiunae!”

³¹ Kiopeiyo Yesu atipei akan keŋ, kikam iŋes tema, “Okoe edit anupit kon! Kaanukiro ibunio iyoŋ toŋayaŋaya?”

³² Ani edokarete ikes nataker, todipakin ekuwuam.

³³ Apotu ŋikasyomak ŋulu ayakasi nataker toryediko alokiŋaren Yesu kilipa temasi, “Kire, irae iyoŋ Lokoku ka Akuj!”

Kitaŋaleu Yesu ŋikadyakak alo Genesaret

³⁴ Ketuborosi ikes ekekwaye anam, todolut nakwap ŋina anyaritae Genesaret.

³⁵ Ani eyenete ŋituŋa ŋulu ka akwap a ŋin Yesu, kielasi akirot nakwap yaunae ŋikadyakak daadaŋ neni keŋ.

³⁶ Kimaimaa ŋikadyakak Yesu acamakin ikes akitap abilet bon ŋina ke elou keŋ. Ŋulu daadaŋ apotu totapa apotu toŋaleut.