Mat. 10 - Ebaibul

Toseu Yesu Ŋikiyakia ŋulutomon ka ŋiarei

¹ Tonyarau Yesu ŋikasyomak keŋ ŋulutomon ka ŋiarei, inak ikes apedor daadaŋ ŋina kiritanaret ŋipyan ka ŋina kitaŋaleununuyet ŋituŋa alodekesyo a daadaŋ ta alemar apalagu daadaŋ.

² Ŋirorwa a Ŋikiyakia a ŋulutomon ka ŋiarei ikes lu, ŋolo esyaunan Simoni, ŋolo anyaritae Petero ka Anderia lokaato keŋ; Yakobo lokoku a Sebedeo, ka Yoana lokaato keŋ;

³ Pilipo ka Batolomayo; Tomas ka Matayo ŋolo arae ekeriran ocur; Yakobo lokoku ka Alipayo ka Tadeo;

⁴ Simoni ŋolo arae Eseletoit ka Yuda Isikariot ŋolo alukini Yesu.

Etic a ŋulutomon ka ŋiarei

⁵ Kiyakiya Yesu ŋulutomon ka ŋiarei ŋul, kicik ikes tema, “Nyilot nakwapin a ŋituŋa a ŋulu nyerae Ŋiyudayan, kori lotaun edio ŋolo a Ŋisamaritayon;

⁶ nai akilo, toloto lotuŋa ŋulu a Isirael ŋulu ikote ŋamesekin ŋuna eolito.

⁷ Toloto kitatama ikes ibasi, ‘Aapuu Apukan ŋina anakuj!’

⁸ Kitaŋaleutu ŋikadyakak, kiteyarutu ŋikatwak, kitesegutu ŋulu ka atapon ka kiritanasi ŋipyan; ipotu iyes toryamut koŋin, aŋun, kipotosi iyes daŋ koŋin.

⁹ Ani irotokinete nyilidakis egolid, ŋisiliŋa kori ŋaboolae locileta a ŋanaŋgae kus.

¹⁰ Nyitiŋa ecwee analosit kus kori elou ece, ŋamuk kori ebela. Anerae itemokino eketiyan toryamu akimuj keŋ.

¹¹ “Ani idolete iyes lotaun kori lore a ituŋanan, tolomasi kiwarut ituŋanan ŋini ikijauni iyes kiboiyoto ka iŋes, tari ŋina irotokinioto iyes a nen.

¹² Ani ilomarete iyes tooma akai, kimalata ŋituŋa ŋulu ka akai a ŋin.

¹³ Ani kikijaut iyes ŋituŋa alokai a ŋin, itemokino togatakis ikes ekisil kus. Nai ani pa kikijaut ikes iyes, nyigatakis ikes ekisil kus.

¹⁴ Ani kemam ituŋanan ŋini ikijauni kori ŋini iirari ŋakiro kus, totwakisi apuwa ŋina a ŋakejen kus nen, apaki ŋina irotokinioto iyes alokai a ŋin kori alotaun a ŋol.

¹⁵ Akalimokini ayoŋ iyes kire atemar, Akoloŋit ŋina ka atubokino erimakinio ŋituŋa ŋulu a Sodoma ka ŋulu a Gomora akilo ŋulu ke etaun a ŋol.

Akisicanet ŋina eryamunete Ŋikiyakia

¹⁶ “Topupokisi, ekeyakiyarit ayoŋ iyes ikwa ŋamesekin alokidiŋ ŋipeei. Topiiryaka ikwa ŋimuno ka kiyapara alopitesyo kus ikwa ŋakuryo.

¹⁷ Tocoikinito ŋituŋa, anerae eya ŋulu ikikamunete iyes itorikosi loikiikoe ka ikibuŋata alosinagogae kec.

¹⁸ Ikirikoryo iyes kiŋaren ŋikepukak ka ŋirwosi aŋuna kaŋ, ikotere toruworos iyes ŋisuudae kaŋ alokiŋaren kec ka alokiŋaren ŋituŋa ŋulu nyerae Ŋiyudayan.

¹⁹ Ani ikipotorete ikes iyes akisitakin, nyiyaloloŋo aŋuna ilosete iyes akirwor kori epite ŋolo limunet, anerae ikiinakinio iyes ŋakiro ŋuna itemokino tolimut apaki ŋin.

²⁰ Anerae meere iyes irworosi, nai Etau ŋolo a Papa kus iŋes irworo aneni kus.

²¹ “Ipotori lokaato lokaato keŋ toarae; papa daŋ ipotori ikoku keŋ; elukinete ŋidwe ŋikauruunak kec ka ipotorete ikes toarae.

²² Ikitoroniyarete ŋituŋa iyes aŋuna ke ekiro kaŋ, nai ŋini etitinyikini akitodol nasalunet, eiunio.

²³ Ani ikitidiŋete ikes iyes alotaun ke epei, toema lotaun ece. Akalimokini ayoŋ iyes kire atemar, nyirikakinete iyes ekusitic alotaunio a ŋulu a Isirael, eriŋa nyebuno Lokoku a Ituŋanan.

²⁴ “Nyepol ekasyoman alokiŋaren ekeeketataman, eketiyan daŋ nyepol alokiŋaren ekeekapolon.

²⁵ Itemokino ekasyoman kikoni eketataman keŋ ka eketiyan kikoni ekapolon keŋ. Ani kenyaritae ekapolon ŋolo ka akai atemar Belesebul, enyarao ŋituŋa ŋulu ka akai a ŋin a ŋirorwa a ŋulu aronok nooi.

Ŋini erae tokerae

²⁶ “Aŋun, nyikera ikes, anerae emam ibore ŋini erapitae ŋini nyisileereunio ka emam ŋini imunonitae ŋini nyeanyunio.

²⁷ Ŋakiro ŋuna akalimokini ayoŋ iyes anakiryonut, tolimosi anakica, nabo ŋuna iirasi iyes iŋaiŋaunitae, kikeutu alokiŋa.

²⁸ Nyikera ŋulu earete akuwan, nai nyepedorito akiar etau; nai tokera ŋolo epedori akiar akuwan ka etau, tocakak tooma nakim ŋina nyeduŋe.

²⁹ Nyegyelyo atadiidi ŋiarei a ikaput a? Emam tari ipei alokidiŋ kec ŋini ecakakin kwap pa eyeni Papa kus.

³⁰ Nai tari ŋitim daadaŋ anakyes kus imaritae.

³¹ Aŋun, Nyikuryaketa; epol etyae kus akilo ŋolo a ŋikyeny a ŋulu alalak!

Alimor ka akiŋer Kristo

³² “Aŋun, ituŋanan daadaŋ ŋini elimori atemar akayeni ayoŋ alokiŋaren ŋituŋa, alimori ayoŋ daŋ atemar ayeni iŋes alokiŋaren Papa kaŋ ŋolo eyai nakuj.

³³ Nai ŋini epegi atemar akayeni ayoŋ alokiŋaren ŋituŋa, apegi ayoŋ daŋ atemar ayeni iŋes alokiŋaren Papa kaŋ ŋolo eyai nakuj.

Meere ekisil ayaunit ayoŋ, nai ejiye

³⁴ “Nyitamete atemar abunit ayoŋ ayaun ekisil nakwap. Meere ekisil ayaunit ayoŋ, nai ejiye.

³⁵ Anerae abunit ayoŋ akitidiŋakin esapat ka papa keŋ, apese ka toto keŋ, ateran ka tata keŋ;

³⁶ eruworosi ŋimoi a ituŋanan ŋituŋa ŋulupei alokal keŋ.

³⁷ “Ituŋanan ŋini emina papa keŋ kori toto keŋ akilo ayoŋ, nyitemokino aruwor ekewuapan kaŋ; ŋini emina lokoku keŋ kori nakoku keŋ akilo ayoŋ, nyitemokino aruwor ekewuapan kaŋ;

³⁸ ka ŋini nyeryoŋi emusalaba keŋ ekewuapak ayoŋ, nyitemokino aruwor ekewuapan kaŋ.

³⁹ Ituŋanan ŋini ecamit aiun akiyar keŋ, itotwaniyari; nai ŋini itotwaniyari akiyar keŋ aŋuna kaŋ, eiuni.

Eropit a ŋulu ecamunete Yesu

⁴⁰ “Ituŋanan ŋini ikijauni iyes, ekejau ayoŋ, nabo ŋini ekejauni ayoŋ, ejau iŋes ŋini ekeyakuunit ayoŋ.

⁴¹ Ituŋanan ŋini ijauni ekadwaran aŋuna eraakar ekadwaran, eryamuni iŋes daŋ eropit ŋolo ke ekadwaran ka ŋini ijauni ituŋanan ŋini iyookino aŋuna eraakar ŋini iyookino, eryamuni iŋes daŋ eropit ŋolo a ituŋanan a ŋini iyookino.

⁴² Nabo ituŋanan daadaŋ ŋini itamasi ipei alokidiŋ ŋulu cicik lu, tari epeikopo ŋolo a ŋakipi a ŋuna alilimok, aŋuna eraakar ekewuapan kaŋ, eryamuni kire eropit keŋ.”