Mar. 9 - Ebaibul

¹ Torubak Yesu irworo ebala, “Akalimokini ayoŋ iyes kire atemar, eyakasi ne ŋulu nyiirete atwanare, eriŋa nyeanyuwara Apukan ka Akuj ebuni ka apedor.”

Kilocokin akuwan a Yesu

² Kelunyar ŋirwa ŋikanikapei, ya Yesu Petero, Yakobo, ta Yoana, todokasi ikes make kidiama emoru ŋolo aoyan. Kilocokin akuwan keŋ alokiŋaren kec.

³ Tomilimiliata ŋikeelowi, tokwaŋiata kya, lopite ŋolo nyitokwaŋia idiotuŋanan anakwap.

⁴ Toanyuwasi ŋirukitos keŋ Eliya ka Moses irworosi ka iŋes.

⁵ Tolimok Petero Yesu tema, “Eketataman, ejok nooi iwon akiboi a nege, ikidukokini isua ŋitogoi ŋiuni, epei ŋolo kon, epei ŋolo a Moses ka epei ŋolo ke Eliya.”

⁶ Kire pa ayeni Petero ŋunalimuno, anerae abu tobul ikes nooi.

⁷ Bu edou, torapuwa ikes aribo, kirworik etoil alodou ebala, “Erae lo Lokoku kaŋ ŋolo minat, topupo iŋes.”

⁸ Toŋoleŋolekis ikes, nai nyeanyuwasi idiotuŋanan, mati Yesu bon.

⁹ Ani edokunete ikes alomoru, kicik Yesu ikes nyelimokis idiotuŋanan ŋuna apotu ikes toanyut, akitodol ŋina eyarunia Lokoku a Ituŋanan alokatwak.

¹⁰ Kirica ikes ŋakiro ŋun alotai kec, nai kiŋitanaros make apolou ŋina ka ayarun alokatwak.

¹¹ Kiŋita ikes Yesu temasi, “Nyo ebaakatar ŋiketatamak a Ŋikisila itemokino mono Eliya kisyau abunore?”

¹² Toboŋok Yesu ikes, “Kire ebuni Eliya ekiŋaren akitemokin ŋakiro daadaŋ eriyan; nyo elimunitotor Ŋakigireta atemar eryamuni Lokoku a Ituŋanan ŋican ŋulu alalak ka eŋeryo daŋ?

¹³ Akalimokini ayoŋ iyes kire atemar, abu Eliya, nai etiyata ŋituŋa neni keŋ ŋuna ecamito, ikwapei alimunitotor Ŋakigireta ŋakiro keŋ.”

Kitaŋaleu Yesu edya ŋolo ekamunit ekipye

¹⁴ Ani eboŋorete ikes neni a ŋikasyomak a ŋuluce, kiŋolikis asepic ŋina alalan irimokinit ŋikasyomak kidiŋ, kimocoete ka ŋiketatamak a Ŋikisila.

¹⁵ Ani eanyuwarete ŋituŋa Yesu, toumokis nooi, toema kimalata iŋes.

¹⁶ Kiŋit Yesu ŋikeekasyomak tema, “Nyo ipeganakinotor iyes ka ikes?”

¹⁷ Toboŋok epei anasepic tema, “Eketataman, ayaunit ayoŋ lokoku kaŋ neni kon, ikamunit ekipye ŋolo nyisirwori iŋes.

¹⁸ Neni ikamunia iŋes daadaŋ, imasakini kwap, tokuut ŋikurudoi anakituk, kitoryeb ŋikyal ka kiteregegianar. Alimokinit ayoŋ ŋikasyomak kon akiritar ekipye ŋol, nai apotu nyepedosi.”

¹⁹ Tolimok Yesu ŋituŋa tema, “Iyes ŋituŋa ŋulu emam anupit! Ikiruki mono ayoŋ ka iyes tari ori? Akadaŋi ayoŋ iyes tari ori? Yautu edya neni kaŋ.”

²⁰ Yaut nai ikes edya neni keŋ. Ŋinapei eŋolikinia ekipye Yesu, kitamaranik edya, kidesak kwap, kisibelibelok, ido tokuut ŋikurudoi anakituk keŋ.

²¹ Kiŋit Yesu papa keŋ tema, “Ŋirwa ŋiyai aya iŋes ikoni ne?” Tema papa keŋ, “Ŋinapei koloŋ ameun alokiditeu keŋ.

²² Ŋacepakio imasanakini iŋes nakim ka nakipi, ecamit akiar iŋes. Nai ani kipedori akiŋarakin, kisyoni isua, kiŋarakinae.”

²³ Tema Yesu neni keŋ, “Ani kipedori a! Epedorosi ŋiboro daadaŋ aneni a ŋini enupit.”

²⁴ Atipei, kikalou papa a ikoku tema, “Anupit, nai kitunupae ejok.”

²⁵ Ani iŋolikini Yesu asepic emotuno, kiyayak ekipye tema, “Iyoŋ ekipye ŋolo nyisirwori ka ŋolo itikiŋimanit, akalimokini ayoŋ iyoŋ, tolomu alotooma keŋ; nyiloma nabo neni keŋ jik.”

²⁶ Tokopo ekipye edya kimasak kwap, kikilyau edya, kirakar. Tolomu nai ekipye kiŋa, kikok edya ekatwan, temasi ŋikalalak, “Atwana!”

²⁷ Nai kikamu Yesu akeekan kitonyou, towo iŋes.

²⁸ Ani elomari Yesu kai, kiŋita ŋikasyomak keŋ iŋes aneni kec bon temasi, “Nyo pa ikipedorya isua akiritar ekipye ŋol?”

²⁹ Toboŋok Yesu ikes tema, “Nyepedori ekipye ŋolo ikoni ŋol anyoun, mati ka akilip bon.”

Toboŋok nabo Yesu erwori ŋuna ka akeetwanare

³⁰ Torotokis Yesu ka ŋikasyomak keŋ a nen, kitoro Galileya. Nai pa acamit Yesu idiotuŋanan toyenu neni ayai iŋes,

³¹ anerae etatami Yesu ŋikasyomak keŋ. Abala iŋes neni kec, “Einakinio Lokoku a Ituŋanan neni a ŋituŋa a ŋulu earete iŋes; kedaut akiar, eyaruni iŋes kelunyar ŋirwa ŋiuni.”

³² Nai nyeyenut ikes ŋuna erworo Yesu, tokuryaketa daŋ akiŋit iŋes.

Ŋae epol akilo ŋuluce daadaŋ?

³³ Todolo ikes Kaperenaum. Ani elomarete kai, kiŋit Yesu ŋikasyomak keŋ tema, “Anukiro takae ipegasi iyes alorot?”

³⁴ Kililiŋa ikes, anerae apegasi ikes alorot ebasi, “Ŋae epol akilo?”

³⁵ Kiboikin nai Yesu kwap, tonyara ŋikasyomak keŋ ŋulutomon ka ŋiarei tema, “Ituŋanan daadaŋ ŋini ecamit aruwor ŋini eŋarenon, itemokino toruwor iŋes ŋini esidyon ka eketiyan a daadaŋ.”

³⁶ Toriku nai iŋes ikoku ŋini cici, kitowuo alokidiŋ kec, tonu iŋes, tolimok ŋikasyomak keŋ tema,

³⁷ “Ituŋanan daadaŋ ŋini ijauni ŋidwe ŋulu cicik ikwa en alokiro kaŋ, ekejaunit ayoŋ daŋ; ka ŋini ekejaunit ayoŋ, ijaunit iŋes tari ŋini ekeyakuunit ayoŋ.”

Ŋini nyikitepegi iwon, erae ŋini yok

³⁸ Tema Yoana neni a Yesu ebe, “Eketataman, eŋolikinitae isua ekile iritanari ŋipyan alokiro kon, kiretakinae isua iŋes, anerae meere iŋes erukitos yok.”

³⁹ Tema Yesu, “Nyiretakis iŋes, anerae nyepedori idiotuŋanan ŋini itiyae ŋuna ka aumokin alokiro kaŋ akirworor ayoŋ atipei ekaku.

⁴⁰ Anerae ŋini nyikitepegi iwon, erae ŋini yok.

⁴¹ Akalimokini ayoŋ iyes kire atemar, ituŋanan daadaŋ ŋini ikitamasi iyes ŋakipi, aŋuna iraakatar iyes ŋulu a Kristo, eryamuni iŋes eropit keŋ.”

Aronis ŋina ka asecit

⁴² “Ituŋanan ŋini iteseci ŋidwe ŋulu cicik ŋulu akanupito ayoŋ ikwa lu, emaikina iŋes toenikinae amoru ŋinakiryeet lomosiriŋ keŋ, kimasakinae nanam.

⁴³ Ani kikitesec iyoŋ akonikan, totubo; ejok iyoŋ alomar nakiyar emam akan, akilo iyoŋ ayakau ŋakan ŋaarei, nai itocakakin nakim ŋina nyeduŋe; [

⁴⁴ neni nyetwania ekecekurut ka neni nyeduŋeo akim.]

⁴⁵ Ani kikitesec iyoŋ akonikeju, totubo; ejok iyoŋ alomar nakiyar emam apeikeju, akilo iyoŋ acakakino nakim ŋina nyeduŋe eya ŋakejen ŋaarei; [

⁴⁶ neni nyetwania ekecekurut ka neni nyeduŋeo akim.]

⁴⁷ Ani kikitesec iyoŋ akonikoŋu, togoro todita; ejok iyoŋ alomar Napukan ka Akuj emam apeikoŋu, akilo iyoŋ ayakau ŋakonyen ŋaarei, nai itocakakin nakim ŋina nyeduŋe;

⁴⁸ neni nyetwania ekecekurut ka neni nyeduŋeo akim.

⁴⁹ “Itojoki akim ŋinituŋanan daadaŋ, ikwaŋina itojokya acumbi akimuj.

⁵⁰ “Ejok acumbi, nai ani kepyaniar, ikokinio nabo itasasamunio ai? Aŋun, toyakatar acumbi tooma kus ka kiboiyete daadaŋ imaasi.”