Mar. 8 - Ebaibul

Kisimuj Yesu ŋituŋa ŋalipyo ŋaomwon

¹ Alorwa a ŋul, tocunakin nabo asepic ace ŋina alalan. Aŋuna amamukar ikes ibore ŋini nyamat, tonyarau Yesu ŋikeekasyomak tema,

² “Ekesyon ayoŋ asepic, anerae ikiruk ka ayoŋ ŋirwa ŋiuni emam ibore ŋini nyamat.

³ Nai kemyek ayoŋ ikes toloto lorerya enyamit akoro, ilelenyi alorot, aŋuna eponitotor ŋice aneni alwanan.”

⁴ Kiŋita ŋikasyomak keŋ Yesu temasi, “Ai eryamunotor ŋamugati ŋuna itemokin ŋituŋa lu daadaŋ analoŋisat a na?”

⁵ Kiŋit Yesu ikes tema, “Ŋamugati ŋayai iyakatar iyes?” Toboŋokis ikes temasi, “Ŋakanikaarei.”

⁶ Tolimok Yesu asepic akiboikin; tolemu ŋamugati ŋunakanikaarei, tolakar neni ka Akuj, tonyilinyili, inak ŋikeekasyomak, tokorakis lotuŋa.

⁷ Ayakatar nabo ŋikasyomak ŋikolya ŋidikudyo ŋulu cicik. Kilipak Yesu ŋulu daŋ tema, “Tokorakisi lotuŋa.”

⁸ Kimuja ikes kimwoko; tocunakis ŋikasyomak ŋapiyanunet, kilelebun ŋaditae ŋakanikaarei.

⁹ Arae ŋituŋa ŋulu emujete ŋalipyo ŋaomwon. Tolimok nai Yesu ŋituŋa alosit lorerya kec.

¹⁰ Ekaku a ŋun, todokasi Yesu kaapei ka ŋikeekasyomak nataker, toloto tari nakwap ŋina anyaritae Dalamanuta.

Kiitana Ŋiparisayon akujuwuanut aneni a Yesu

¹¹ Potu Ŋiparisayon ŋice neni a Yesu, togeut akitepeg iŋes; aŋuna acamitotor alokun iŋes. Kiitana akujuwuanut ŋina itoodiunit atemar ebunit iŋes aneni ka Akuj.

¹² Kieŋak Yesu nooi tema, “Nyo ecamitor anyamet na akujuwuanut? Akalimokini ayoŋ iyes kire atemar, emam akujuwuanut ace ŋina itoodikinio iŋes.”

¹³ Kimyek nai iŋes ikes a nen, torotok todoka nabo nataker, tolot ekekwaye anam.

Ŋakinyalet ŋuna a Ŋiparisayon

¹⁴ Kebu kimuryak ŋikasyomak akiya ŋamugati ŋuna itemokino; ayaito ikes amugati apei bon nataker.

¹⁵ Kicik Yesu ikes tema, “Tocoikinito ŋakinyalet ŋuna a Ŋiparisayon ka ŋuna ke Erode.”

¹⁶ Kirworikinos ikes make temasi, “Irworo iŋes ŋun, aŋuna emamukatar iwon ŋamugati.”

¹⁷ Ayeni Yesu ŋakiro ŋuna erworosi ŋikasyomak, tosodi nai kiŋit ikes tema, “Nyo irworotor iyes ibaakatar emam ŋamugati iyakatar? Eriŋa iyes nyeanyuna ka nyeyenuna a? Eninik ŋakusitameta a?

¹⁸ Ikwapei eyakatar iyes ŋakonyen, nyiteete a? Ikwapei eyakatar iyes ŋaki, nyipupete a? Ka nyitamunito mono iyes,

¹⁹ apaki ŋina anyilinyilia ayoŋ ŋamugati ŋakan aŋuna a ŋituŋa a ŋalipyo a ŋakan a? Ŋayai ŋaditae ipotu iyes kilelebikis ŋapiyanunet?” Toboŋokis ikes temasi, “Ŋatomon ka ŋaarei.”

²⁰ Kiŋit nabo Yesu ikes tema, “Ani bo ŋina paaran anyilinyilia ayoŋ ŋamugati ŋakanikaarei aŋuna a ŋituŋa a ŋalipyo a ŋaomwon, ŋaditae ŋayai ipotu iyes kilelebikis ŋapiyanunet?” Toboŋokis ikes temasi, “Ŋakanikaarei.”

²¹ Kiŋit Yesu ikes tema, “Eriŋa iyes nyiirara a?”

Kitaŋaleu Yesu emudukanot alo Betesaida

²² Ani edolunete ikes Betesaida, yaut ŋituŋa ŋice emudukanot neni a Yesu, kimaimaa ikes iŋes temasi, “Totap iŋes.”

²³ Kikamu Yesu emudukanot akan, toriko nawae ere, kimwaak ŋakimul nakonyen keŋ. Kidokok ŋakeekan kidiama keŋ, kiŋit iŋes tema, “Ite iyoŋ idiobore a?”

²⁴ Kireo emudukanot kidiama tema, “Ete ayoŋ ŋituŋa; ikote ikes ŋikito, nai elosete.”

²⁵ Totapak nabo Yesu ŋakeekan nakonyen ke emudukanot. Tojokut jik ŋakonyen, toanyuwa iŋes ibore daadaŋ ileere.

²⁶ Tolimok nai Yesu iŋes tema, “Tolot jik lore kon, nyitor nabo Betesaida.”

Toboŋok Petero Yesu tema, “Irae iyoŋ Kristo”

²⁷ Torotokis Yesu ka ŋikeekasyomak tari lorerya ŋulu a Kaisaria Pilipi. Kiŋit iŋes ŋikeekasyomak alorot tema, “Ebasi mono ŋituŋa ŋae ayoŋ?”

²⁸ Toboŋokis ikes temasi, “Ebasi Yoana Ekebatisan, nai ebasi ŋice Eliya ka ŋice ebasi epei alokadwarak.”

²⁹ Kiŋit iŋes ikes nabo, “Ani bo iyes, ibasi ŋae ayoŋ?” Toboŋok Petero tema, “Irae iyoŋ Kristo.”

³⁰ Kicik Yesu ikes nyiteyenut iŋes idiotuŋanan.

Kirwor Yesu ŋuna ka atwanare ka ayarun keŋ

³¹ Togeu Yesu akitatam ŋikeekasyomak tema, “Isicanio Lokoku a Ituŋanan nooi ka eŋerete iŋes ŋikatukok, ŋisacaradotin ŋulu apolok ka ŋiketatamak a Ŋikisila. Nabo earyo, nai kelunyar ŋirwa ŋiuni iteyarunio iŋes.”

³² Erworo iŋes ŋakiro ŋun ileerete. Toriko Petero Yesu nawae, kiŋenyak iŋes nooi.

³³ Toboboŋ Yesu kiŋolik ŋikeekasyomak, kiŋenyak iŋes Petero tema, “Tolot aneni kaŋ, Satan, anerae ŋatameta kon nyeponito aneni ka Akuj, nai eponito alotuŋa.”

Etyono aruwor ekewuapan ŋolo a Kristo

³⁴ Tonyarau Yesu asepic ka ŋikeekasyomak, tolimok ikes tema, “Ŋinituŋanan ecamit akiwuapakin ayoŋ, itemokino iŋes toŋero bon, toryoŋ emusalaba keŋ ekewuapak ayoŋ.

³⁵ Ituŋanan ŋini ecamit aiun akiyar keŋ, itotwaniari, nai ŋini itotwaniyari akiyar keŋ aŋuna kaŋ ka aŋuna a Ŋakiro a ŋuna Ajokak, eiuni.

³⁶ Alipoida eryamuni ituŋanan erae keŋata akwap daadaŋ, ido kitotwaniya akeekiyar?

³⁷ Nyo epedorya ituŋanan akisyeca akeekiyar?

³⁸ Anerae ŋinituŋanan irumete ŋileec aŋuna kaŋ ka aŋuna a ŋakaakiro ananyamet a na a ŋina aloman ka a ŋina asecesecan; Lokoku a Ituŋanan daŋ irumete ŋileec aŋuna keŋ apaki ŋina eboŋunio iŋes ka apedor a Papa keŋ kaapei ka ŋimalaikan ŋulu ka Akuj.”