Mar. 14 - Ebaibul

Totukut ŋituŋa akiar Yesu

¹ Ani idoŋit ŋirwa ŋiarei todol akoloŋit ŋina a Paska, ŋina a ŋasuban a ŋamugati a ŋuna emam ŋakinyalet; kiwara ŋisacaradotin ŋulu apolok ka ŋiketatamak a Ŋikisila epite ŋolo kikamunet Yesu pa eyenio, toaryata iŋes.

² Temasi ikes, “Nyikikamu iŋes akoloŋit ŋina a Paska, ikotere nyebu aruruma alotuŋa.”

Kiwosakinae Yesu akimyet alo Betania

³ Ani eyai Yesu Betania kai a Simoni a ŋolo sek adyaka atapon, yaunae akimuj. Ani eriŋa iŋes imuji, bu aberu ŋina atiŋit ecupa ŋolo aoyan ŋolo etiyaunitae anamoru a ŋina anyaritae Alabasta, ŋolo ayai akimyet ŋina akukunyon, ŋina anyaritae Narido. Alal egyelit ŋolo ka akimyet a ŋin. Tobwaŋa aberu ŋin iwadio alocupa, ido tobukok akimyet nakou a Yesu.

⁴ Toŋoa ŋituŋa ŋice ŋulu aya nen temasi, “Kaanukiro icanicanere akimyet ŋina akukunyon na?

⁵ Anerae kerae togyelaritetei a ŋisilipae a ŋulu edeparito ŋamiae ŋauni, kekorakinitae ŋikulyak.” Kisiburata ikes aberu ŋin neni aronon.

⁶ Tema nai Yesu, “Kimyekisi iŋes bon; nyo isiburaata iyes iŋes? Adau iŋes akitiyakin etic ŋolo ajokan neni kaŋ.

⁷ Anerae irukito iyes ka ŋikulyak ŋirwa daadaŋ. Ipedorete akiŋarakin ikes apaki daadaŋ ŋina icamitotor. Nai nyikiruki iwon ŋirwa daadaŋ.

⁸ Etiya iŋes ŋuna epedori; ekeos iŋes ayoŋ eriŋa nyenuka.

⁹ Akalimokini ayoŋ iyes kire atemar, ŋinakwap daadaŋ itatamere Ŋakiro ŋuna Ajokak, elimoryo ŋakiro ŋuna etiya aberu na aŋuna ka atamunitor iŋes.”

Tocamu Yuda alukin Yesu

¹⁰ Tolot Yuda Isikariot ŋolo arae epei a ŋulutomon ka ŋiarei losacaradotin ŋulu apolok, akipotokin Yesu neni kec.

¹¹ Tolakaros ikes nooi iirarete ŋakiro keŋ temasi, “Ikiinakinio iyoŋ ŋisiliŋa”. Kiwar nai Yuda apaki ŋina etemokino torikorere ŋisacaradotin neni a Yesu.

Kimuja Yesu ka ŋikasyomak keŋ akimuj ŋina a Paska

¹² Akoloŋit ŋina eŋarenikini ŋina a Paska, ŋina a ŋasuban a ŋamugati a ŋuna emam ŋakinyalet ka ŋina eareneere ŋimeesekin, kiŋita ŋikasyomak Yesu temasi, “Ai icamit iyoŋ isua oloto etemokinioto neni imuja iyoŋ Paska?”

¹³ Kiyakiya nai Yesu ikes ŋiarei tema, “Toloto lotaun, iryamasi iyes ka ekile iwuokit amot a ŋakipi; kiwuapakisi iŋes

¹⁴ tari kai ŋina elomari iŋes. Tolimokis elope ka akai a ŋin atemar, ‘Ebala Eketataman, nyaani agule ŋina itemokino iŋes ka ŋikasyomak keŋ tonyamiata imesek ŋini a Paska?’

¹⁵ Ikitoodikini iŋes iyes agule ŋina eyai kidiama, ŋina itemokino ŋiboro daadaŋ ŋulu iitana. Kitemokis nen ejok aŋuna yok.”

¹⁶ Toloto nai ŋikasyomak, tolomasi lotaun, toryamut ikwaŋina alimokinitere ikes. Kitemokis nai akimuj a Paska a nen.

¹⁷ Ani enaŋi ŋisaae ŋulu ka ataboŋ, torukut Yesu ka ŋulutomon ka ŋiarei.

¹⁸ Ani eriŋa ikes imujete, tolimok Yesu ikes tema, “Akalimokini ayoŋ iyes kire atemar, akalukini ayoŋ epei alokidiŋ kus; ŋol, iŋes ŋolo ikimuji ka ayoŋ.”

¹⁹ Tonomosi ikes ŋakiro ŋun ŋitai nooi, kisyakis akiŋitiŋit Yesu a ŋipeipei ebasi, “Ayoŋ a?”

²⁰ Tolimok iŋes ikes tema, “Erae epei a ŋulutomon ka ŋiarei, ŋolo ikilumonokini ka ayoŋ amugati nasaani.

²¹ Kire etwani Lokoku a Ituŋanan ikwapei igiritere Nakigireta, nai eroko nooi ŋakiro ŋuna eryamuni ekile ŋolo elukini iŋes! Kejoikinit koloŋ ekile ŋol nyidoun!”

Akimuj ŋina ke Ekapolon Yesu

²² Ani imujete ikes, tolemu Yesu amugati, kilipak, totyak, inak ikes tema, “Kijaasi, kimuja; erae na akaakuwan.”

²³ Tolemu nai ekopo, ani kedau akitalakar Akuj, inak ikes, tomata daadaŋ.

²⁴ Tolimok Yesu ikes tema, “Erae nu ŋaokot kaŋ, ŋuna ka Acamunet, ŋuna ebukoritae ikotere ŋikalalak.

²⁵ Akalimokini ayoŋ iyes kire atemar, nyamasi nabo ayoŋ ŋuna ke epiini akitodol akoloŋit ŋina amasya ekitetyana a Napukan ka Akuj.”

²⁶ Toeikis nai ikes eete ŋolo kitalakaret Akuj, ido tolomasi kiŋa, toloto lomoru a ŋikito a ŋulu enyaritae Olipa.

Tolimu Yesu atemar epegi Petero atemar ayeni iŋes

²⁷ Tolimok Yesu ŋikasyomak tema, “Ielarosi iyes daadaŋ; anerae igiritae Nakigireta ebe, ‘Abuni ayoŋ akibuŋa ekeyokon, kielaros nai ŋamesekin.’

²⁸ Nai ekaku kadau ayoŋ ayarun, ekeŋarenikini ayoŋ iyes alosi Galileya.”

²⁹ Tema Petero neni a Yesu, “Tari kielarosi ŋuluce daadaŋ, nyalosi ayoŋ.”

³⁰ Toboŋok Yesu Petero tema, “Akalimokini ayoŋ iyoŋ kire atemar, takae nakwaare, eriŋa ekokoroit nyeruuno aruunet ŋina a ŋaarei, ipegi iyoŋ ŋapeget ŋauni atemar ikiyeni ayoŋ.”

³¹ Toboŋok Petero ka agogoŋu tema, “Nyapegi ayoŋ jik, tari ketemar akaaryo ayoŋ ka iyoŋ!” Tolimut ŋikasyomak ŋuluce daadaŋ ikwaŋinapei.

Kilip Yesu alo Getesemani

³² Ani edolunete Yesu ka ŋikeekasyomak neni anyaritae Getesemani, tolimok Yesu ikes tema, “Kiboikinos nege eriŋa ayoŋ alosi akilip.”

³³ Torukosi Yesu ka Petero, Yakobo ta Yoana. Togeu iŋes akiil ka kiyaloloŋ,

³⁴ tolimok ŋikasyomak tema, “Iyaloloŋi ekaatau nooi esibit eapi atwanare. Kiboikinos nege, tokienyete.”

³⁵ Tolot nai iŋes kiŋaren iwadio toramakin kwap, kilip, tema, “Ani kepedor, tolunyar apaki ŋina aronon na aneni kaŋ”.

³⁶ Kilip nabo iŋes tema, “Papa, apa kaŋ! Ipedori iyoŋ alemar ŋican daadaŋ, tolema ekopo ŋolo a ŋican lo aneni kaŋ; meere ka acamit kaŋ, nai ikwaŋina icamitor iyoŋ.”

³⁷ Toboŋo nabo Yesu neni kec, toryamu ikes ejotoete, tema neni a Petero, “Simoni, ijotoe iyoŋ a? Nyipedori iyoŋ akikieny tari epeisaa daŋ a?

³⁸ Tokienyete ka kilipete, ikotere nyilomasi nakitemyet. Ecamit etau, nai epalag akuwan.”

³⁹ Toboŋo nabo Yesu akilip, kirwor ŋakiro ŋunapei ŋun.

⁴⁰ Ani eboŋuni nabo, toryamu ikes ejotoete, anerae abu tokuruwo ikes akikieny, pa ayenete ikes tari ŋakiro ŋuna boŋokino Yesu.

⁴¹ Ani eboŋori Yesu aboŋoret ŋina a ŋauni, tolimok ikes tema, “Eriŋa iyes ijotoete ka ieŋunito a? Etemokin, adol esaa! Eapi Lokoku a Ituŋanan akipotokin nakan a ŋikasecak.

⁴² Tonyoutu, oloto! Kiŋolikisi, adolu ekalukinon kaŋ.”

Akikamuno a Yesu alo Getesemani

⁴³ Ani eriŋa Yesu irworo, todolu Yuda Isikariot, ŋolo sek arae epei a ŋikasyomak a ŋulutomon ka ŋiarei, erukito ka ŋituŋa ŋulu alalak, ŋulu atiŋito ŋatumio ka ŋabiroi. Kiyakuunito ikes ŋisacaradotin ŋulu apolok ka ŋiketatamak a Ŋikisila ta ŋikatukok.

⁴⁴ Aris sek Yuda kelimoki ŋikekamunak a Yesu atemar, “Ŋolo anui ayoŋ, iŋes ŋolo. Kikamutu iŋes torikosi, totiŋito kojokan.”

⁴⁵ Ŋinapei adolunio Yuda, tolot neni a Yesu tema, “Eketataman!” Tosodi tonu iŋes.

⁴⁶ Kikamut ikes Yesu ka agogoŋu.

⁴⁷ Tosodi epei aneni a ŋulu awuasi alodiye, tolemu atum anakuraro, kitel eketiyan ŋolo ke Esacaradoti a ŋolo Apolon nooi, totubo akit.

⁴⁸ Kiŋit Yesu ikes tema, “Kan nyo iponitotor iyes akikamun ayoŋ itiŋito ŋatumio ka ŋabiroi esibit arae ayoŋ ekokolan?

⁴⁹ Ikirukit ayoŋ ka iyes ŋirwa daadaŋ alo Kai ka Akuj etatami, ipotu iyes nyikikamut ayoŋ. Nai itemokino kiyookinos Ŋakigireta.”

⁵⁰ Toesikis ŋikasyomak daadaŋ iŋes, kielaros.

⁵¹ Ayai esorokit epei ŋolo atupit Yesu tonapite elou. Acamito ŋituŋa akikamun iŋes,

⁵² nai abu iŋes kipiiri eleri, toesik elou.

Yesu alokiŋaren Atukot a Ŋiyudayan

⁵³ Torikosi ikes Yesu neni ke Esacaradoti a ŋolo Apolon nooi; totukokinos ŋisacaradotin ŋulu apolok daadaŋ ka ŋikatukok kaapei ka ŋiketatamak a Ŋikisila.

⁵⁴ Atupit Petero Yesu aneni alwana, tari tooma ere ke Esacaradoti a ŋolo Apolon nooi. Kiboikinos ka ŋisigarya kiwuaŋas anakim.

⁵⁵ Kiwara ŋisacaradotin ŋulu apolok ka Atukot daadaŋ ŋakiro ŋunakisitakinet Yesu, ikotere earere; nai toŋopikis.

⁵⁶ Anerae apotu ŋikesitakinak ŋulu alalak ŋul, kirworo ŋuna pa eyookino, nabo pa acamuna ŋikecesuudae.

⁵⁷ Tonyout ŋice, kisudokis temasi,

⁵⁸ “Ikipotu isua eirasi iŋes ebala, ‘Etuwori Akai ka Akuj na ŋina adukete ŋituŋa a ŋakan, ido alotooma ŋirwa ŋiuni, odukok ace ŋina nyepedorete ŋakan a ŋituŋa akiduk’ ”.

⁵⁹ Ŋakiro a ŋul daŋ, pa acamuna.

⁶⁰ Tonyou Esacaradoti ŋolo Apolon nooi, towo alokiŋaren ŋituŋa, kiŋit Yesu tema, “Emam iyoŋ akirot ŋina iboŋokini a? Anukiro ikisitakinitotor iyoŋ ŋituŋa lu?”

⁶¹ Kililiŋ Yesu cek, nyeboŋok adiokirot. Kiŋit nabo Esacaradoti ŋolo Apolon nooi iŋes tema, “Irae iyoŋ Kristo Lokoku ka Akuj a ŋina ipuroe a?”

⁶² Toboŋok Yesu tema, “Arae; nabo iŋolikinete iyes Lokoku a Ituŋanan iboi aloteten Akuj ŋina alokidiama nooi ka ebuni alodowuon a ŋulu anakuj!”

⁶³ Tocilicili Esacaradoti ŋolo Apolon nooi ŋikeelowi tema, “Nyo nabo eriŋa ikiwaritor ŋisuudae ŋice!

⁶⁴ Idaut iyes daŋ akiirar ŋiyiany keŋ. Nyo itamete tokona iyes?” Temasi daadaŋ, “Itemokino iŋes totwan.”

⁶⁵ Kisyakis ŋice akimwaanakin iŋes, akirap ŋakonyen keŋ ka akibapabap iŋes ebasi, “Totedo ŋini ikibap iyoŋ?” Kibapabapata ŋisigarya daŋ iŋes.

Topeg Petero atemar ayeni Yesu

⁶⁶ Ani eriŋa Petero eyai lore ŋol, kitoru aketiyan apei ŋina ke Esacaradoti a ŋolo Apolon nooi diye keŋ.

⁶⁷ Ani iŋolikini iŋes Petero iwuaŋa anakim, kitek iŋes, tolimu tema, “Iyoŋ daŋ irukito ka Yesu ŋolo a Nasaret!”

⁶⁸ Topeg Petero ŋun tema, “Nyayeni ayoŋ iŋes, nabo nyiyeni iyoŋ ŋuna irworo.” Torotok Petero a nen, tolot kiŋa diye epuke. [Apaki ŋinapei ŋin, toruuni ekokoroit.]

⁶⁹ Toanyuwa nabo aketiyan ŋin iŋes, tolimok ŋituŋa ŋulu awuasi alodiye tema, “Erae lo epei alokidiŋ kec!”

⁷⁰ Topeg nabo Petero ŋun. Kelunyar apaki ŋinauriyen, temasi ŋituŋa ŋulu awuasi alodiye Petero, “Kire jik irae iyoŋ daŋ epei alokidiŋ kec, anerae irae iyoŋ Egalilayat.”

⁷¹ Nai togeu Petero akilama ka akikoŋ tema, “Nyayeni ayoŋ ekile ŋolo ilimito iyes.”

⁷² Esaa ŋolopei, toru ekokoroit aruunet ŋina a ŋaarei. Totamu Petero ŋakiro ŋuna alimokinit Yesu iŋes ebe, “Takae nakwaare, eriŋa ekokoroit nyeruuno aruunet ŋina a ŋaarei, ipegi iyoŋ ŋapeget ŋauni atemar ikiyeni ayoŋ.” Ani etamuni Petero ŋun, kisyak akigworo nooi.