Mar. 12 - Ebaibul

Akitadapet ŋina a ŋiketeok emanikor

¹ Togeu Yesu akirworo neni a ŋituŋa a ŋakitadapeta ebala, “Abu ituŋanan todupak ŋikito ŋulu ke epiini, towuak awuas kiryam. Tobok akipany ŋina cuet epiini, todukok epemu, kicikak ŋiketeok emanikor, tolot iŋes acekwap.

² Ani edoli apaki ŋina lemet, kiyakiya iŋes epito keŋ epei neni a ŋiketeok emanikor ayaun ŋadiraito ŋuna ke epiini.

³ Kikamut ŋiketeok epito ŋol, kibuŋata, kitoboŋosi emam epiini.

⁴ Kiyakiya nabo iŋes epito ece, kibuŋata ŋolo daŋ nakou nooi, tobolyatar.

⁵ Kiyakiya nabo elope emanikor epito ece ŋolo apotu ŋiketeok toara; kiyakiyana nabo ŋice ŋulu alalak, ŋulu apotu ŋiketeok toara ŋice ka kibuŋata ŋice.

⁶ Lokoku keŋ ŋolo donupei bon ŋolo minat edoŋit nyiyakiyara. Kiyakiya iŋes lokoku keŋ, etami atemar ekerete ikes iŋes.

⁷ Nai totukut ŋiketeok emanikor akiar iŋes temasi, ‘Lokoku keŋ lo, potu oara, eruma iwon emanikor ŋolo ke epiini.’

⁸ Kikamut ikes iŋes, toara, tocakakis kiŋa emanikor.”

⁹ Kiŋit nai Yesu ikes tema, “Nyo nai ebuni elope ŋolo ke emanikor akitiyakin neni kec? Ebuni iŋes akiar ŋiketeok daadaŋ, inak emanikor neni a ŋice.

¹⁰ Nyesyoma mono iyes Ŋakigireta ŋuna igiritae ebe, ‘Amoru ŋina koloŋ aŋerete ŋikadukok iŋes tokona itogogoŋit akai alokoona.

¹¹ Ekapolon elope etiyae nu, erae ŋakiro nu ŋuna etalakarak ŋuna ikite iwon!’ ”

¹² Kiwara ŋikapolok a Ŋiyudayan akikamun Yesu, anerae apotu ikes toyenut atemar arae ikes erworor Yesu anakitadapet keŋ, nai tokera ŋikapolok a Ŋiyudayan asepic, kimyekis Yesu tolot.

Akiŋiset ŋina ka akibuk ocur

¹³ Kiyakiyasi ŋikapolok ŋulu a Ŋiyudayan Ŋiparisayon ŋice ka ŋituŋa ŋice ŋulu ka atukot a ŋina ke Erode neni a Yesu, ikotere ikes elokuniata Yesu alorwor keŋ.

¹⁴ Ani edolunete ikes neni a Yesu, temasi, “Eketataman, ikiyeni isua atemar irworo iyoŋ ŋuna iyookino ka nyimisit ŋuna etamete ŋituŋa. Nyityakatyakat iyoŋ ŋituŋa, nai itatami ŋuna a kire ŋuna ka Akuj. Ikicamakinito mono isua Ŋikisila akibuk ocur neni ke ekepukan a Roma kori mam?

¹⁵ Ikibuki kori nyikibuki?” Nai toyenu Yesu atemar alokunito ikes iŋes; kiŋit ikes tema, “Kaanukiro ikilokunitotor iyes ayoŋ? Yautu esiliŋ oanyu.”

¹⁶ Yaut ikes esiliŋ, kiŋit nai Yesu ikes tema, “Ŋolo a ŋae ereet lo ka ŋakigireta nu?” Toboŋokis ikes temasi, “Ŋulu ke ekepukan a Roma.”

¹⁷ Tolimok Yesu ikes tema, “Inakisi ekepukan a Roma ŋini erae ikeŋ, inakis Akuj ŋini erae ŋini ka Akuj.” Toumokis ikes nooi aŋuna a ŋakiro a ŋun.

Kiŋitae Yesu ŋakiro ŋuna ka ayarun alokatwak

¹⁸ Potu Ŋisadukayon neni a Yesu. Nai aŋuna pa anupitotor ikes atemar eyai ayarun alokatwak, kiŋita ikes Yesu temasi,

¹⁹ “Eketataman, egirit koloŋ Moses aŋuna kosi ebala, ‘Ani ketwana lokaato ke ekile, toesik aberu emam ikoku, irumi lokaato keŋ aberu ŋin, touruunia ŋidwe aŋuna a lokaato keŋ’.

²⁰ Ayakasi ŋikaitotoi ŋikanikaarei, abu ŋolo apolon kiit aberu, totwan emam ŋidwe.

²¹ Kirum nai ŋolo a ŋiarei aberu, totwan ŋolo daŋ emam ŋidwe; ŋolo a ŋiuni daŋ ikwaŋinapei.

²² Totwaka ŋikaitotoi ŋulukanikaarei daadaŋ emam ŋidwe; ani ekaku totwan aberu daŋ.

²³ Nai anayarun, eruwor mono aberu ŋin ŋina ka ali? Anerae abu iŋes toruwor aberu a ŋikaitotoi a ŋulukanikaarei a ŋul.”

²⁴ Tolimok nai Yesu ikes tema, “Meere ba ŋakiro ŋun ikitooliyosi iyes, anerae nyiyenete iyes Ŋakigireta kori apedor ŋina ka Akuj?

²⁵ Anerae ŋina eyaruniata ŋikatwak, nyiitasi ikes nabo ka nyipotonorosi akiitanaro, nai ikwaanikinosi ikes ka ŋimalaikan ŋulu eya nakuj.

²⁶ Nai nyesyoma iyes alokitaabo a Moses ŋuna a ŋikatwak a ŋulu eyarunete, ikwapei kirworor Akuj neni keŋ anamoni ebala, ‘Arae ayoŋ Akuj ŋina ka Aburaam ka Isaka ta ŋina a Yakobo’ a?

²⁷ Meere iŋes Akuj a ŋikatwak, nai Akuj a ŋulu eyarete. Aŋun, idyakarito iyes nooi.”

Akiciket ŋina apolon akilo daadaŋ

²⁸ Ayai nen eketataman a Ŋikisila epei ŋolo apupi ŋakiro ŋun. Toyenu iŋes atemar aboŋoki Yesu Ŋisadukayon ejok, kiŋit nai eketataman ŋol Yesu tema, “Anikiciket epol akilo ŋunace daadaŋ?”

²⁹ Toboŋok Yesu iŋes tema, “Ŋina esyaunan iŋes na: ‘Isirael kiira! Erae Ekapolon Akuj yok apei bon.

³⁰ Tomina Ekapolon Akuj kon a ekonitau a daadaŋ ka a akonikiyar a daadaŋ, ka a ŋakonitameta a daadaŋ ta a akonigogoŋu a daadaŋ.’

³¹ Ŋina a ŋaarei iŋes na: ‘Tomina ekonikidunyet ikwaŋina iminar iyoŋ akonikuwan.’ Emam acekiciket ŋina epol akilo ŋunaarei ŋun.”

³² Tema eketataman ŋol, “Kire Eketataman, ilimu iyoŋ ŋuna iyookino atemar erae Akuj apei, emam ace mati iŋes bon

³³ ka aminakin iŋes a etau a daadaŋ ka a ŋatameta a daadaŋ, ta a agogoŋu a daadaŋ; nabo ka aminakin ekidunyet ikwaŋina eminar ituŋanan akeekuwan, iloit ŋipeyosinei ka ŋamuronisya daadaŋ.”

³⁴ Ani eanyuni Yesu atemar aboŋoki iŋes ejok, tolimok tema, “Emam nyilwana iyoŋ a Napukan ka Akuj!” Kedaun ŋun, emam icetuŋanan ŋini abu toŋirik akiŋit Yesu acekiŋiset.

Ŋae erae Kristo?

³⁵ Ani itatami Yesu ŋituŋa alo Kai ka Akuj, kiŋit ikes tema, “Kaanukiro ebaakatar ŋiketatamak a Ŋikisila ebe erae Kristo lokoku a Daudi?

³⁶ Alimokini Etau ŋolo Asegan Daudi alimun ebe: ‘Atema Ekapolon neni ke Ekapolon kaŋ, kiboikin iyoŋ teten kaŋ, akitodol neni ewuakinia ŋikonimoi kwap ŋakejen kon.’

³⁷ Enyarit Daudi iŋes ‘Ekapolon’; ikokini nai iŋes eruwor lokoku keŋ ai?” Abu asepic ŋina alalan kiira akitatam a Yesu ka alakara.

Kicik Yesu ŋituŋa acoikinit ŋiketatamak a Ŋikisila

³⁸ Anakitatam keŋ, tema Yesu, “Tocoito ŋiketatamak a Ŋikisila, ŋulu eminasi akirimit enapito ŋikaasoi ŋulu aoyak, nabo ecamito kimalae ikwa ŋikapolok alomaket.

³⁹ Eseete ŋikicoloŋo ŋulu ebusak akiboikin alosinagogae ka anasuban.

⁴⁰ Emodiyanarete ŋiboro anakais a ŋapuseru ka itoodiuna ikes anakilipeta kec a ŋuna aoyak. Eryamunete ikes atubokino ŋina apolon nooi.”

Ainakinet ŋina ka apuserut

⁴¹ Kiboikin Yesu alo Kai ka Akuj diye asaduku ŋina acakyo ŋisiliŋa. Kitek ŋituŋa ecakete ŋisiliŋa. Tocakakis ŋikabarak ŋulu alalak ŋisiliŋa ŋulu alalak.

⁴² Bu apuserut apei ŋina akulyakana, tocakak nasaduku ŋikapun ŋiarei ŋulu ayakar iŋes.

⁴³ Tonyarau Yesu ŋikasyomak keŋ, tolimok ikes tema, “Akalimokini ayoŋ iyes kire atemar, acakaki apuserut na anakulyako keŋ akilo ikes daadaŋ ŋulu acakakis ŋisiliŋa nasaduku.

⁴⁴ Anerae, acakete ŋuluce daadaŋ ŋisiliŋa ŋulu erae ŋikoŋinae alobari kec, nai acakaki apuserut na anakulyako keŋ ŋulu daadaŋ ayakar ka edaritor akeekiyar.”