Mal. 4 - Ebaibul

Akoloŋit ŋina ke Ekapolon

¹ Ebala Ekapolon ŋolo Etiron ebe, “Kiirasi ebunit akoloŋit ŋina eriraa akim ikoni ŋina ke ekitet, akoloŋit ŋin icunyaryo daadaŋ ŋulu eturok ka ŋulu itiyaete aronis, mam ikes ipei daŋ ŋini idoŋi.

² Nai iyes ŋulu itopoloorito ekiro kaŋ, elomuni apedor kaŋ ŋina aiunan ikoni akoloŋ, ido bu apedor neni kus ikoni ŋikoi ŋulu ka akoloŋ, ikitaŋaleun iyes. Iruworosi iyes ŋulu ilacakina, ŋulu ilakara ikwa ŋimanaŋ ŋulu elacakinitae, ŋulu eŋaaritae ananok.

³ Akoloŋit ŋin ŋina etiyakinia ayoŋ ŋun, ilounete iyes ŋulu itiyaete aronis, ipudaarete iyes ikes ikwa apuwa ŋina eyai kwap nakejen kus.

⁴ “Totamutu mono iyes ŋakiro ŋuna abu Moses eketiyan kaŋ ikitatam iyes, Ŋikisila ka ŋitalyo ŋulu abu ayoŋ oinak iŋes alomoru a ŋolo enyaritae Oreb, aŋuna a Ŋisirael daadaŋ.

⁵ “Kiirasi, eyakuuni ayoŋ ekadwaran Eliya neni kus eriŋa nyedolo akoloŋit ŋina ke Ekapolon, akoloŋit ŋin ŋina apolon nooi ŋina a ŋinyas.

⁶ Ibelekini iŋes ŋitai a ŋikauruunak tomaikinos ka ŋidwe kec ka ibelekini iŋes ŋitai a ŋidwe tomaikinos ka ŋikauruunak kec, ani kemam, abuni ayoŋ amunyar iyes anakwap kus a ŋicen.”