Mal. 3 - Ebaibul

Ekiyakia ŋolo ebunit

¹ Ebala Ekapolon ŋolo Etiron ebe, “Kiirasi, eyakuuni ayoŋ ekiyakia kaŋ akitemonokin erot eriŋa ayoŋ nyebuno, ido nai bu pa iyenete iyes Kai keŋ, Ekapolon ŋolo iwarito iyes. Ebuni ekiyakia ŋolo icamito iyes aanyun, ido iserae iŋes ŋakiro ŋuna ka Acamunet kaŋ.

² Nai ŋae epedori akidaŋidaŋ ŋakiro a Akoloŋit a ŋin a ŋina ka abunore keŋ? Ŋae epedori akiyar Akoloŋit ŋin ŋina etakanunia iŋes? Anerae ebuni iŋes ikoni akim ŋina ke ekitet, kori esabuni ŋolo ilotari ibore atipei.

³ Ebuni iŋes atubokin, totyak ŋiletok ikwaŋina eliyere ŋasuwa kori esilipa ipoo, itojoki iŋes ŋisacaradotin, ido toliwae ikes ikwa egolid ka esilipa, akitodol ŋina eryamunia Ekapolon ŋituŋa ŋulu iyookino ŋulu epedorete ayaun ŋainakineta ŋuna ajokak neni keŋ.

⁴ Ekaku nai, eyaunete ŋituŋa a Yudaya ka ŋulu a Yerusalem ŋainakineta ŋuna ecamit Ekapolon, lopite ŋolopei paaran sek ayaununiata.”

⁵ Ebala Ekapolon ŋolo Etiron, “Abuni ayoŋ neni kus atubokin iyes, ido alimuni ayoŋ atipei ŋakiro ŋuna etoroniyaritor ŋikekukujak, ŋikalomak, ŋikalyokonok, ŋiketunak ŋulu itunaete ŋiropito a ŋiketiyak kec, ŋikamodyanakinak ŋulu emodiyanarete ŋiboro anapuseru, alokokyok ka alotuŋa a ŋulugelae. Alimuni ayoŋ atipei ŋakiro ŋuna etoroniyaritor daadaŋ ŋulu nyakakerito ayoŋ.

⁶ Arae ayoŋ Ekapolon ŋolo nyeloconokin; a ŋun, iyes ŋiletok a Yakob, eriŋa iyes nyemunyara.

⁷ Akisyakin ŋinapei koloŋ alorwa atapapaa kus, iŋero iyes ŋikisila kaŋ nyiwuapito ikes. Toboŋutu neni kaŋ, ido aboŋuni ayoŋ neni kus. Nai iŋitasi iyes ibasi, ‘Alipite ikiboŋunio isua?’ ”

Nyikokoyete Akuj

⁸ “Ekeŋisit ayoŋ iyes ebe, ‘Ejok mono ituŋanan akoko Akuj a?’ Mam nyejok, nai ikikokoyete iyes ayoŋ, ido iŋitasi ibasi, ‘Alipite ikikokoya isua iyoŋ?’ Ikikokoyete iyes ayoŋ aŋuna nyiyaununiyata atutubet apei alotooma ŋatomon aloboro kus ka aŋuna nyikiinanakiniata ayoŋ ŋainakineta.

⁹ Iruworosi iyes ŋulu aŋicen, iyes daadaŋ anakwap kus, anerae ikikokoyete iyes ayoŋ.

¹⁰ Yautu atututbet apei alotooma ŋatomon aloboro kus Kai ka Akuj, ikotere tolalaar akimuj a nen. Kikatakisi mono iyes akitiya ŋun neni kaŋ, iŋolikinete iyes aŋauni ayoŋ ajokis daadaŋ ŋina anakuj, ido obuk neni kus ŋiboro daadaŋ ŋulu ajokak.

¹¹ Euryari ayoŋ ŋiboorei ŋulu enyamete ŋikinyom nyenyam ŋikinyom kus, ido ŋimanikorin kus ŋulu ke epiini ebwaŋete epiini nooi.

¹² Etemarete nai ŋituŋa a ŋakwapin a ŋuna alalak ebe, ‘ Irae iyes ŋituŋa ŋulu ilakara,’ anerae eruwor akwap kus ŋina ejok akiboiyo.”

¹³ Ebala Ekapolon ebe, “Idaut iyes akirworo ŋakiro ŋuna apipilak neni kaŋ.” Nai iŋitasi ibasi, “Anukiro ŋuna apipilak ŋuna ikirworo isua neni kon?”

¹⁴ Idaut iyes alimun ebe, “Mam ajokis ikitiyanakini Akuj. Alipoida ikiryamuni iwon anakiwuapit ŋakiciketa ka Akuj, kori ikirubakinit ikigworonokini Ekapolon ŋolo etiron?

¹⁵ Ikwapei tokona ikiteo iwon, erae ŋiketurok ikes elakara; kire ebareneneete ŋituŋa ŋulu itiyaete aronis, itemeneneete tari Akuj, ido erubanakinete eyarete. ”

Eropit ŋolo a ŋikanupak

¹⁶ Apotu nai ŋituŋa ŋulu ekerito Ekapolon kirworiut make, ido abu Ekapolon topupok ŋuna erworosi ikes, kiira ŋakiro kec. Aponi kigirae lokitaabo alokiŋaren Ekapolon, ŋakiro a ŋulu ekerito Ekapolon ka ŋuna a ŋulu itopoloorito ekiro keŋ.

¹⁷ Ebala Ekapolon ŋolo Etiron ebe, “Eruworosi ikes ŋulu kaŋ, ani edoli akoloŋit ŋina eturuworya ayoŋ ikes ŋituŋa kaŋ a elope, nyaari ayoŋ ikes, esyoni ayoŋ ikes lopite ŋolo epedorya papa akisyon lokoku keŋ ŋolo itiyanakini iŋes.

¹⁸ Iŋolikinete nai iyes nabo atyaketait ŋina eyai kidiŋ ŋulu iyookino ka ŋulu nyiyookino, kidiŋ ŋulu itiyanakinete Akuj ka ŋulu nyitiyanakinete.”