Luk. 5 - Ebaibul

Tonyarau Yesu ŋikasyomak ŋulu esyaunak

¹ Apeikoloŋit ewuoi Yesu alokipetot a ŋolo ka anam a Genesaret, todiŋun ŋituŋa neni keŋ ecamito akiirar ŋakiro ŋuna ka Akuj.

² Kiŋolik iŋes ŋatakerin ŋaarei eya lokipetot ŋolo ka anam, aya ŋikekamak ŋikolya kiŋa kec, alokete ŋatibae kec.

³ Todoka Yesu nataker apei ŋina arae ŋina a Simoni, tolimok iŋes tema, “Kisiyoto iwadio alokipetot.” Kiboikin nai Yesu nataker, kitatam ŋituŋa eyakasi lokipetot.

⁴ Ani kirikak Yesu akitatam, tolimok iŋes Simoni tema, “Kisiyoto ataker nenicukul, tolokak ŋatibae kus nanam, kikamuniata ŋikolya.”

⁵ Tolimok Simoni iŋes tema, “Eketataman, ikitiya isua akuwar kya, nai emam ibore ikikam ipei daŋ. Ani bo ca tokona kilimunit iyoŋ ikoŋina, acakakini ayoŋ ŋatibae nanam.”

⁶ Tocakakis ikes ŋatibae, ido kikamut ŋikolya ŋulu alalak nooi, ŋulu adikino eŋedeŋedaarete ŋatibae kec.

⁷ Toketut ikes ŋikecerukitos ŋulu anataker a ŋinace aponare akiŋarakin ikes. Potu nai ikes kilelebikis ŋikolya natakerin ŋunaarei ŋun, todikino esiporete.

⁸ Ani iŋolikini Simoni Petero ŋakiro ŋuna apotu kitiyakin, toryedik alokiŋaren Yesu tema, “Ekapolon, kiyotok aneni kaŋ, anerae arae ayoŋ ekasecan!”

⁹ Tobul iŋes ka ŋirukitos keŋ aŋuna ka alalau a ŋikolya a ŋulu apotu ikes kikamut.

¹⁰ Tobul tari Yoana ka Yakobo ŋidwe a Sebedeo ŋulu arukitotor Simoni. Tolimok Yesu Simoni tema, “Nyikibul! Ameun tokona, iruwor iyoŋ ekekaman ŋituŋa.”

¹¹ Tomiasi ikes ŋatakerin lokipetot, kimyekis nai ŋiboro daadaŋ, kiwuapakis Yesu.

Kitaŋaleu Yesu ekile ŋolo ka atapon

¹² Apeikoloŋit, ayai Yesu lotaun ece, ayai nen ekile ŋolo erumit atapon. Ani eanyuwari iŋes Yesu, toramakin kiŋaren nakejen keŋ, kijuuru kimaima iŋes tema, “Ekapolon, ani kicamit iyoŋ, ipedori akitaŋaleun!”

¹³ Torwaa Yesu akan keŋ, totap iŋes tema, “Acamit; toŋaleu!” Ŋolopeikiro, todaun atapon alokile a ŋol.

¹⁴ Kicik Yesu iŋes tema, “Nyilimok idiotuŋanan ŋakiro nu, nai tolot kitoodiyar neni ka esacaradoti, ikisyem iŋes iyoŋ; ido tolemu ainakinet aŋuna ka asegun kon, ikwaŋina icikakinitor Moses; ikotere toanyunia ŋinituŋanan atemar isegu iyoŋ.”

¹⁵ Nai apotu ŋituŋa togeut akirworor Yesu nooi; aŋun, potu ŋasepico a ŋituŋa neni keŋ akiirar ŋakiro ka akitaŋaleuno alodekesyo kec.

¹⁶ Nai tolot Yesu neni asilon akilip.

Kitaŋaleu Yesu ekile ŋolo alilimiyorito ŋakoyo ka akuwan

¹⁷ Apeikoloŋit itatami Yesu, ayakasi Ŋiparisayon ka ŋiketatamak a Ŋikisila daŋ lotuŋa ŋul, ŋulu aponito alorerya a daadaŋ a ŋulu ka akwap a ŋina a Galileya, Yudaya ka Yerusalem daŋ. Ayai neni a Yesu apedor ŋina ka Akuj ŋina kitaŋaleunet.

¹⁸ Kilepuleput ŋikilyok ŋice ekile ŋolo alilimiyorito ŋakoyo ka akuwan, eperi anaperyet keŋ, ecamito ayaar iŋes tooma kai akiperikin kiŋaren Yesu.

¹⁹ Ikwaŋinapei alalakyata ŋituŋa, abu todaun ikes epite ŋolo yaaret iŋes tooma. Todokaryata nai ikes iŋes kidiama akai, topedo inaa, kiyooliut iŋes ka aperyet keŋ kidiŋ ŋituŋa kiŋaren Yesu.

²⁰ Ani iŋolikini Yesu anupit kec tema, “Ekile, esyoni ŋasecisya kon.”

²¹ Apotu ŋiketatamak a Ŋikisila ka Ŋiparisayon kiŋitas make temasi, “Ŋae ŋini iyanyi Akuj ikona en? Emam ituŋanan ŋini epedori akisyon ŋasecisya, mati Akuj bon!”

²² Ikwaŋina ayenia Yesu ŋuna atamete ikes, tolimok ikes tema, “Nyo itamyata iyes ŋakiro ŋuna ikote ŋun alotai kus?

²³ Nyo epatana nooi, alimokin ekaŋwalan atemar, ‘Esyoni ŋasecisya kon,’ kori atemar, ‘Tonyou, torotok’?

²⁴ Nai acamit ayoŋ iyes toyenut atemar, eyakar Lokoku a Ituŋanan apedor ŋinakisyoniyet ŋasecisya anakwap.” Tolimok iŋes ekaŋwalan tema, “Akalimokini ayoŋ iyoŋ atemar, tonyou, tolema akoniperyet, tolot lore!”

²⁵ Tokuraun iŋes atipei alokiŋaren kec, tolema akeeperyet, tolot lore ipuro Akuj.

²⁶ Totaaŋaŋa ŋituŋa daadaŋ nooi! Kitopoloosi Akuj temasi alokabule kec, “Okoe! Ikiŋolik nakoloŋit na ŋakiro ŋakapolok!”

Tonyarau Yesu Lepi

²⁷ Kedaun ŋakiro ŋun, tolot Yesu kiŋa, toanyuwa ekeriran ocur ŋolo anyaritae Lepi, iboi anapis a ŋina etacere ocur. Tolimok Yesu iŋes tema, “Kiwuapakinae ayoŋ.”

²⁸ Tonyou nai Lepi, toesik ibore daadaŋ, kiwuapak iŋes.

²⁹ Kitiya Lepi ŋasuban alokai keŋ aŋuna a Yesu; aya nen ŋikerirak ocur ŋulu alalak ka ŋituŋa ŋuluce daŋ.

³⁰ Tosodo Ŋiparisayon ŋice ka ŋiketatamak a Ŋikisila ŋulu arukito ka iŋes, kiŋuruŋurakinos, kiŋita ŋikasyomak a Yesu temasi, “Nyo imujata ka imasyata iyes ka ŋikerirak ocur ta ŋikasecak?”

³¹ Toboŋok Yesu ikes tema, “Nyiitanito ŋituŋa ŋulu eŋaleete emuron, nai ŋulu edyakasi.

³² Nyabunit ayoŋ anyarare ŋulu iyookino, nai ŋikasecak, ikotere tokiwa ŋasecisya kec.”

Kiŋitae Yesu ŋuna ka akikany akimuj

³³ Tolimokis ikes iŋes temasi, “Ikanyeneneete ŋikasyomak a Yoana, nabo ilipete daŋ; ŋikewuapak a Ŋiparisayon daŋ ikote nenipei, nai imujete ŋikasyomak kon ka emaseneneete!”

³⁴ Toboŋok Yesu ikes tema, “Ipedorete iyes akisikany ŋituŋa ŋulu enyaraunitae lokiitanu eriŋa ikes erukito ka ekeitan a?

³⁵ Nai epote ŋirwa ŋulu edemarere ikes ekeitan. Ŋirwa ŋul, ikes nai ikanyakineta ikes.”

³⁶ Tolimok nabo Yesu ikes akitadapet na tema, “Emam ituŋanan ŋini eciluni arac alolou a ŋolokitete, todapak lolou ŋoloŋorot. Ani kitiya ituŋanan ikoŋina, ecili elou ŋolokitete, nabo emam nyikwaanikin arac keŋ ka elou ŋoloŋorot.

³⁷ Kori emam tari ituŋanan ŋini epedori atikakin ewinyiwiny lotwol ŋulu eŋorotonito. Ani ketikaki, ebwaŋabwaŋaari ewinyiwiny ŋitwol ŋul, tosodi tobukor ewinyiwiny daŋ.

³⁸ Nai etikanakinio ewinyiwiny lotwol ŋulu kitet!

³⁹ Ka daŋ emam ituŋanan ŋini iitanit ewinyiwiny kenaiki ŋagwe ŋuna adwarak, anerae etemari ebe, ‘Ejokak ŋuna adwarak.’ ”