Luk. 3 - Ebaibul

Akitatam a Yoana ke Ekebatisan

¹ Alokaru a ŋolo a ŋitomon ka ŋikan ipukat Tiberio akwap ŋina a Roma, torae Ponitio Pilato ekepukan a Yudaya, kipukate erwosit Erode Galileya, kipukate Pilipo lokaato ke Erode ŋakwapin ŋuna a Iture ka Trakonita, kipukate Lusania akwap ŋina ka Abilene,

² toraakas Anas ka Kaipa ŋisacaradotin ŋulu Apolok nooi, abu akirot ŋina ka Akuj bu neni a Yoana a Lokoku a Sakariya analoŋisat.

³ Tolot Yoana nakwapin daadaŋ ŋuna edunyasi ka aŋolol Yorodan, kitatam ŋituŋa ŋakiro ŋuna ka Akuj ebala, “Tokiwa ŋasecisya kus, ikibatisae a ŋakipi, kisyonio Akuj ŋasecisya kus.”

⁴ Ikwaŋinapei igiritere lokitaabo ŋolo ke ekadwaran Isaya ebe, “Iworoe etoil a ituŋanan a ice analoŋisat ebala: ‘Kitemonokisi erot ŋolo ke Ekapolon; kisidiiryata neni itori iŋes!

⁵ Itemokino nenidipal daadaŋ kitiriyanae, itemokino ŋimukura ka ŋimoru tobwaŋabwaŋae. Itemokino ŋirotin ŋulu ilugilugito kisidiiri ka ŋirotin ŋulu sagam kitusulututae;

⁶ nabo eanyunete ŋituŋa daadaŋ aiuno ŋina ka Akuj!’ ”

⁷ Tolimok Yoana ŋasepico ŋuna aponito neni keŋ akibatisao tema, “Iyes ŋulu iroko ŋulu ikote ŋapomia, ŋae ikilimokini iyes atemar ipedorete abucar ananyunyura a ŋina ebunit aneni ka Akuj?

⁸ Kitiyata ŋiticisyo ŋulu itoodiunete atemar ikiwa iyes kire ŋasecisya kus. Tojoŋoto atemar alotai kus erae Aburaam papa kus. Akalimokini ayoŋ iyes atemar, epedori Akuj akilocokin ŋamoru nu toruworos ŋidwe ŋulu ka Aburaam!

⁹ Edikino aep iteli ŋikito anataagor; ekitoe daadaŋ ŋolo nyeraii ŋaraito ŋuna ajokak, itelunio, tocakakinae nakim.”

¹⁰ Kiŋita ŋasepico iŋes temasi, “Ikokinio nai tokona isua ai?”

¹¹ Toboŋok iŋes tema, “Ituŋanan daadaŋ ŋini eyakar ŋilowi ŋiarei, itemokino tomora ka ŋini eleri; ani nabo ŋini eyakar akimuj, itemokino tomora ka ŋuluce.”

¹² Potu ŋikerirak ocur daŋ akibatisao. Kiŋita ikes iŋes temasi, “Eketataman, nyo itemokino isua kitiyae?”

¹³ Toboŋok iŋes ikes tema, “Nyiriraut ŋisiliŋa ŋulu edeparito ŋulu ikilimokinitae iyes.”

¹⁴ Kiŋita ŋisigarya daŋ iŋes temasi, “Ani bo isua ikikokini ai?” Toboŋok iŋes tema, “Nyidemasi tari ipeituŋanan daŋ idiobore ka agogoŋu, kori nyisitakis ituŋanan idio koŋin; tonaikinitotor eropit kus.”

¹⁵ Ikwaŋina edaritotor ŋituŋa daadaŋ, totamakis ikes atemar kori erae Yoana Messia.

¹⁶ Toboŋok Yoana ikes daadaŋ tema, “Kire ekebatisae ayoŋ iyes a ŋakipi, nai ebunit ŋolo ekeloit ayoŋ ŋolo nyapedori ayoŋ tari alacakin ŋakeemuk. Ikibatisae iŋes iyes a Etau a ŋolo Asegan ka akim.

¹⁷ Eyakar iŋes nakan keŋ erite, ikotere epyetarya ŋimomwa ejok analos, tocunak lodulae keŋ; kicunyak nai ŋatunyeny anakim a ŋina nyeduŋe.”

¹⁸ Alorotin a ŋice a ŋulu alalak, abu Yoana kiserak Ŋakiro ŋuna Ajokak lotuŋa.

¹⁹ Nai abu Erode erwosit, aŋuna etoronia Yoana iŋes aŋuna eturuworya iŋes Erodiya ŋina arae aberu a lokaato keŋ ŋina keŋ ka aŋuna a ŋiboro a ŋulu aronok a daadaŋ a ŋulu kitiyat iŋes;

²⁰ kiyatak aronis keŋ, toen Yoana alomabus.

Kibatisae Yesu

²¹ Apeikoloŋit kedaun akibatis ŋituŋa daadaŋ, kibatisae Yesu daŋ. Ani eriŋa Yesu ilipi, toŋaar nakuj.

²² Bu Etau ŋolo Asegan ikoni akuri min kidiama keŋ, ido kirworik etoil anakuj tema, “Irae iyoŋ Lokoku kaŋ ŋolo minat ŋolo alelyania ayoŋ.”

Ŋirorwa atapapaa a Yesu Kristo

²³ Aapikinito ŋikaru a Yesu ŋatomoniuni apaki ŋina esyakinia iŋes akitatam. Atamakinito ŋituŋa atemar erae iŋes lokoku a Yosepu, a ŋolo arae lokoku ke Eli, ŋolo arae

²⁴ lokoku a Matat, a ŋolo arae lokoku a Lepi, a ŋolo arae lokoku a Malaki, a ŋolo arae lokoku a Yannai, a ŋolo arae lokoku a Yosepu, a ŋolo arae

²⁵ lokoku a Matatia, a ŋolo arae lokoku ka Amos, a ŋolo arae lokoku a Naum, a ŋolo arae lokoku ke Esili, a ŋolo arae lokoku a Nagai,

²⁶ a ŋolo arae lokoku a Maat, a ŋolo arae lokoku a Matatia, a ŋolo arae lokoku a Semein, a ŋolo arae lokoku a Yosek, a ŋolo arae lokoku a Yoda,

²⁷ a ŋolo arae lokoku a Yoanan, a ŋolo arae lokoku a Resa, a ŋolo arae lokoku a Serubabel, a ŋolo arae lokoku a Selatiel, a ŋolo arae lokoku a Neri,

²⁸ a ŋolo arae lokoku a Meleki, a ŋolo arae lokoku ka Adi, a ŋolo arae lokoku a Kosam, a ŋolo arae lokoku ke Elimadam, a ŋolo arae lokoku ke Ere,

²⁹ a ŋolo arae lokoku a Yosua, a ŋolo arae lokoku ke Eliesa, a ŋolo arae lokoku a Yorim, a ŋolo arae lokoku a Matat, a ŋolo arae lokoku a Lepi,

³⁰ a ŋolo arae lokoku a Simeon, a ŋolo arae lokoku a Yuda, a ŋolo arae lokoku a Yosepu, a ŋolo arae lokoku a Yonam, a ŋolo arae lokoku ke Eliakim,

³¹ a ŋolo arae lokoku ka Melea, a ŋolo arae lokoku a Mena, a ŋolo arae lokoku a Matata, a ŋolo arae lokoku a Natan, a ŋolo arae lokoku a Daudi,

³² a ŋolo arae lokoku a Yese, a ŋolo arae lokoku a Obed, a ŋolo arae lokoku a Boas, a ŋolo arae lokoku a Salimon, a ŋolo arae lokoku a Nason,

³³ a ŋolo arae lokoku ka Aminadab, a ŋolo arae lokoku ka Arani, a ŋolo arae lokoku ke Esiron, a ŋolo arae lokoku a Peres, a ŋolo arae lokoku a Yuda,

³⁴ a ŋolo arae lokoku a Yakobo, a ŋolo arae lokoku a Isaka, a ŋolo arae lokoku ka Aburaam, a ŋolo arae lokoku a Tera, a ŋolo arae lokoku a Nakor,

³⁵ a ŋolo arae lokoku a Serugo, a ŋolo arae lokoku a Reu, a ŋolo arae lokoku a Peleg, a ŋolo arae lokoku ke Eber, a ŋolo arae lokoku a Sela,

³⁶ a ŋolo arae lokoku a Kainan, a ŋolo arae lokoku ka Arupakisad, a ŋolo arae lokoku a Sem, a ŋolo arae lokoku a Noa, a ŋolo arae lokoku a Lamek,

³⁷ a ŋolo arae lokoku a Metusela, a ŋolo arae lokoku ke Enok, a ŋolo arae lokoku a Yared, a ŋolo arae lokoku a Malaleel, a ŋolo arae lokoku a Kainan,

³⁸ a ŋolo arae lokoku ke Enos, a ŋolo arae lokoku a Set, a ŋolo arae lokoku ka Adam, a ŋolo arae lokoku ka Akuj.