Luk. 18 - Ebaibul

Akitadapet ŋina ka apuserut ke ekatubon ŋakiro

¹ Tosodi Yesu tolimok ŋikeekasyomak akitadapet aŋuna ka akitatamya ikes atemar itemokino ikes akilipenen jwi jwi tomam akiup.

² Tolimu iŋes tema, “Ayai lotaun ece ekatubon ŋakiro ŋolo pa akerit Akuj ka pa amisit ŋituŋa.

³ Ayai apuserut lotaun ŋolopei ŋol, ŋina abuneene neni ke ekatubon, ecamit kiirarae ŋakiro keŋ ebala, ‘Totub akirot ŋina akatyakit ayoŋ ka ituŋanan ŋini ikiŋoitor!’

⁴ Abu ekatubon ya apaki ŋina aoyan nyetyaka ŋakiro; nai ani ekaku, totamu iŋes tema, ‘Tari pa kakerit ayoŋ Akuj kori ŋituŋa,

⁵ nai aŋuna ekecania ayoŋ apuserut naga, atubi ayoŋ ŋakeekiro eriyan, anerae acepaki akanipi iŋes ayoŋ aŋuna ka abunenen keŋ jik!’ ”

⁶ Tema Ekapolon, “Kiirasi ŋakiro ŋuna alimuni ekatubon ŋolo aronon.

⁷ Ani bo Akuj, nyepedori mono iŋes akitiya neni ajokan loseuna keŋ ŋulu igworonokinete iŋes apaaran jwii ka akuwar kya ecamito akiŋarakino a? Edidi iŋes akiŋarakin ikes a?

⁸ Akalimokini ayoŋ iyes atemar, einakini iŋes ikes ibore ŋini ecamito atipei. Nai ŋina ebunio Lokoku a Ituŋanan, eryamuni mono iŋes anupit anakwap a?”

Eparisayot ka ekeriran ocur

⁹ Tolimu Yesu akitadapet naga ikotere ŋituŋa ŋulu abasi ikirae ŋulu iyookino ka tojamuwarito daŋ ŋuluce.

¹⁰ “Apotu ŋikilyok ŋiarei, toloto Kai ka Akuj akilip; arae epei Eparisayot, torae ŋoloce ekeriran ocur.

¹¹ “Towo Eparisayot kilip nenipei keŋ bon tema, ‘Akuj, alakara ayoŋ neni kon, anerae nyikikwaan ayoŋ ka ŋituŋa ŋuluce, ŋikademanarak, ŋikokolak, ŋikalomak, kori daŋ ikwa ekeriran ocur ŋol.

¹² Aroneene ayoŋ ŋaroniet ŋaarei a ŋolosabit, nabo akalemianakini iyoŋ atutubet apei ŋina kitomonet a ŋinibore a daadaŋ aryamuni ayoŋ.’

¹³ “Towo ekeriran ocur aneni alwana, nyireo ŋakeekonyen tari nakuj, toram etau keŋ tema, ‘Akuj, kisyoni ayoŋ ekasecan!’

¹⁴ Akalimokini ayoŋ iyes atemar, abu ekeriran ocur tolot lore keŋ iyookino alokiŋaren Akuj, akilo Eparisayot; anerae ŋinituŋanan itopolooryo bon, itiditeunio; nai ŋini itiditeuna bon, itopolooryo.”

Kiterereŋ Yesu ŋidwe ŋulu cicik

¹⁵ Torikut ŋicetuŋa ŋidwe neni a Yesu, ecamito iŋes kidokok ŋakeekan neni kec; nai ani iŋolikinete ŋikeekasyomak ŋun, kiretakis ikes.

¹⁶ Tonyarau Yesu ŋidwe neni keŋ tema, “Kimyekisi ŋidwe potu neni kaŋ! Nyiretakis ikes, anerae erae Apukan ka Akuj ŋina a ŋulu ikote lu.

¹⁷ Akalimokini ayoŋ iyes kire atemar, ŋinituŋanan nyijauni Apukan ka Akuj ikwa ikoku ŋini cici, nyelomari jik Napukan ŋin.”

Ekile ŋolo abarit

¹⁸ Kiŋit ekepukan ece ŋolo a Ŋiyudayan Yesu tema, “Eketataman ŋolo ajokan, nyo itemokino ayoŋ etiya oryamunia akiyar ŋina nyedaun?”

¹⁹ Kiŋit Yesu iŋes tema, “Kaanukiro ikinyaritor iyoŋ ayoŋ ŋolo ajokan? Emam ituŋanan ŋini ajokan, mati Akuj bon.

²⁰ Iyeni iyoŋ Ŋakiciketa, ‘Nyilom, nyiar, nyikoko, nyisudi ŋakiro, tokerite papa kon ka toto kon.’ ”

²¹ Tolimu ekepukan tema, “Eketataman, ŋinapei koloŋ alokiditeu kaŋ, ericit ayoŋ Ŋakiciketa ŋun daadaŋ.”

²² Ani iirari Yesu ŋakiro ŋun, tolimok iŋes tema, “Ipeibore bon ikibucit iyoŋ: togyela ibore daadaŋ ŋini iyakar iyoŋ, tokorak ŋisiliŋa lokulyak, ikotere min ebari kon nakuj. Ani ekaku, ibu ikiwuapak ayoŋ.”

²³ Ŋolopite eirarya iŋes ŋakiro ŋun, torotok esiliyorit nooi, anerae abarit iŋes nooi.

²⁴ Kiŋolik Yesu iŋes kesiliyo, tolimu tema, “Egogoŋ nooi ŋikabarak alomar Napukan ka Akuj!

²⁵ Epatana ekaal akitor napedot ŋina ke esindan, akilo ekabaran alomar Napukan ka Akuj!”

²⁶ Potu ŋituŋa ŋulu eirarete ŋakiro ŋun, kiŋita iŋes temasi, “Ŋae bo nai eiun?”

²⁷ Toboŋok Yesu ikes tema, “Ŋuna nyepedorosi alotuŋa, epedorosi aneni ka Akuj!”

²⁸ Tolimok Petero iŋes tema, “Ikijal isua ŋiboro kosi daadaŋ, ikiwuapak iyoŋ.”

²⁹ Toboŋok Yesu ikes tema, “Akalimokini ayoŋ iyes kire atemar, emam ituŋanan aesiki ekal keŋ, kori akeeberu, ŋikeekaitotoi, ŋikeekauruunak ka ŋikeedwe aŋuna ka Apukan ka Akuj,

³⁰ ŋini nyeryamuni abaru ŋina alalan tokona ka akiyar ŋina nyedaun alokaru a ŋulu esidyok.”

Kirwor Yesu akirworet ŋina a ŋauni ŋakiro ŋuna ka atwanare keŋ

³¹ Tonyaraiya Yesu ŋikasyomak keŋ ŋulutomon ka ŋiarei nawae, tolimok ikes tema, “Kiirasi! Ikidokari iwon tokona Yerusalem, nabo ŋuna daadaŋ igirito ŋikadwarak ikotere Lokoku a Ituŋanan iyookinosi.

³² Ipotokinio iŋes lobukui ŋulu nyerae ŋulu a Ŋiyudayan, tokyenatar ikes iŋes kibuŋata ka kimwaanakis.

³³ Ibuŋaete ikes iŋes toara; nai kelunyar ŋirwa ŋiuni, eyaruni iŋes.”

³⁴ Nai nyeyenut ŋikasyomak apolou a ŋakiro a ŋuna erworo iŋes tari iwadio, anerae ewuaitae apolou ŋina ke erwor keŋ aneni kec ka pa ayenete ikes ŋakiro ŋuna acamit Yesu alimun.

Kitaŋaleu Yesu emuduk ŋolo elipanar

³⁵ Ani edoli Yesu diyete Yeriko, eboi ekile ŋolo amudukana alodiyete erot kilipanar.

³⁶ Ani iirari emuduk asepic a ŋituŋa itori diye, kiŋit tema, “Anukiro nu?”

³⁷ Tolimokinae iŋes temarae, “Yesu ŋolo a Nasaret iŋes itorunit diye ne.”

³⁸ Tosodi iŋes kiworou tema, “Yesu! Lokoku a Daudi! Kisyoni kare ca ayoŋ!”

³⁹ Kiŋenyakis ŋituŋa ŋulu eŋarenete iŋes temasi, “Kililiŋ!” Nai torebor iŋes nooi tema, “Lokoku a Daudi! Kisyoni kare ca ayoŋ!”

⁴⁰ Towo Yesu tolimu tema, “Yautu ekile neni kaŋ.” Ani eapuuni emuduk diyete keŋ, kiŋit Yesu iŋes tema,

⁴¹ “Inyoni icamit iyoŋ ayoŋ etiyak neni kon?” Toboŋok iŋes tema, “Ekapolon, acamit okienyu nabo.”

⁴² Tolimok Yesu iŋes tema, “Tokienyu nabo! Ikitaŋaleu iyoŋ akoninupit.”

⁴³ Tokienyu iŋes atipei, kiwuapak Yesu ipuro Akuj elakara. Ani iŋolikini asepic a ŋituŋa ŋakiro ŋun, kipur Akuj.