Luk. 1 - Ebaibul

Emalas

¹ Ekapolon Teopilo, Ageut ŋikalalak akigir ŋiemuto a ŋakiro a ŋuna etiyakinosi alokidiŋ yok.

² Ikote nenipei ikilimokinitotor iwon ŋituŋa ŋulu aanyunito ka kiseraete daŋ anageunet.

³ Aŋun, esibit ejok ayoŋ daŋ akigir ŋakiro ŋun iriyan neni kon, anerae adau ayoŋ akimimaun ŋakiro ŋun daadaŋ, ameun anakisyakinet kec.

⁴ Etiyae ayoŋ ŋun, ikotere toyenunia iyoŋ abeit kire ŋina a ŋakiro a ŋuna kikitatamianakinio iyoŋ.

Todwar emalaika akidouno a Yoana ke Ekebatisan

⁵ Ŋirwa ŋulu araakar Erode erwosit a Yudaya, ayai esacaradoti ŋolo anyaritae Sakariya, ŋolo ka atukot a ŋina ka Abiya. Ayai iŋes aberu ŋina anyaritae Elisabet, ŋina arae ŋina anateker ka Aron.

⁶ Eyookino ikes daadaŋ alokiŋaren Akuj, ericakinito ŋakiciketa ka Ŋikisila ŋulu ke Ekapolon, emam akisec.

⁷ Nai amamukatar ikes ikoku, anerae akolupana Elisabet; nabo daŋ amojoŋito ikes.

⁸ Apeikoloŋit etiyae Sakariya ekeetic ŋolo ke esacaradoti alokiŋaren Akuj, akoloŋit ŋina araakar akitiyaet ŋina ka atukot a ŋina a ŋisacaradotin a ŋulu ayai Sakariya.

⁹ Aponi iŋes toseunae alomar Kai ka Akuj a Ekapolon akicunyakin eminae ŋolo ke ekinyate a Namuroet, ikwaŋina ecikakinitere ŋisacaradotin.

¹⁰ Elipi asepic a ŋituŋa alokiŋa nen apaki ŋina ecunyakinere eminae ŋolo ke ekinyate.

¹¹ Apaki ŋin, totakanu emalaika ŋolo ke Ekapolon neni keŋ ewuoi aloteten Namuroet ŋina ecunyere eminae ŋolo ke ekinyate.

¹² Ani iŋolikini Sakariya emalaika, toryaŋakin tobul.

¹³ Nai tolimok emalaika iŋes tema, “Nyikuryaniar Sakariya, anerae eira Akuj akonikilip, idouni akoniberu Elisabet ikoku ŋini sapat, ilimokini iyoŋ ekeekiro Yoana.

¹⁴ Iryamuni iyoŋ alelyan ka alakara, elakarosi nooi ŋikalalak aŋuna ka akidouno keŋ;

¹⁵ anerae erwoniar iŋes alokiŋaren Ekapolon. Nyitemokino iŋes tomat epiini kori idiobore ŋini ikitemerakini, ilelebun iŋes Etau ŋolo Asegan, tari eriŋa eyai nakook a toto keŋ.

¹⁶ Inyakuni iŋes ŋituŋa ŋulu alalak ŋulu a Isirael neni ke Ekapolon Akuj kec.

¹⁷ Iŋarenikini iŋes Ekapolon, etitiny ka togogoŋ ikwa ekadwaran Eliya. Imorikini iŋes atapapa ka ŋidwe, tocamunos; nabo ibelekini iŋes ŋulu eŋerito Akuj kiwuapa aosou a ŋulu itiyaete ŋuna iyookino, kitemok ŋituŋa kidarut Ekapolon.”

¹⁸ Kiŋit Sakariya emalaika tema, “Ekokini ayoŋ aanyuni ŋakiro ŋun ai? Anerae amojoŋit ayoŋ, akaaberu daŋ alunyarosi ŋikaru keŋ.”

¹⁹ Toboŋok emalaika tema, “Ayoŋ Gaburiel, ŋolo awuoi alokiŋaren Akuj. Ekeyakuunitae ayoŋ neni kon, alimokin iyoŋ ŋakiro ŋuna ajokak ŋun.

²⁰ Tokona aŋuna iwuounia iyoŋ akinup ŋakiro kaŋ ŋuna iyookin apeikoloŋit, ikisililiŋio iyoŋ nyirworik akitodol akoloŋit ŋina iyookinotor ŋakiro ŋun.”

²¹ Apaki ŋin edarito ŋituŋa Sakariya, toumokinito daŋ aŋuna adidiyo iŋes alo Kai ka Akuj.

²² Ani elomuni iŋes kiŋa, nyepedo akisirwor ikes. Toyenut nai ikes atemar keanyu iŋes atakanikinet alo Kai ka Akuj. Kisirwor iŋes ikes a ŋakan, ido torubak pa irworo.

²³ Ani kelunyar ŋirwa ŋulu ke etic keŋ, tolot Sakariya lore keŋ.

²⁴ Ekaku a ŋirwa a ŋul, abu akeeberu Elisabet topoti, kiboi iŋes alokai ŋilapyo ŋikan ebala,

²⁵ “Erae nu ŋuna etiyak Ekapolon neni kaŋ, ŋirwa lu ŋulu ekesyonio iŋes ayoŋ; alema ŋileec kaŋ alotuŋa!”

Todwar emalaika akidouno a Yesu

²⁶ Ani edoli Elisabet ŋilapyo ŋikanikapei epoti, kiyakiya Akuj emalaika Gaburiel nakwap ŋina a Galileya, lotaun ŋolo anyaritae Nasaret;

²⁷ neni ka apese a ŋina pa eryamakina ka ekile, ŋina eikinitere Yosepu ŋolo anateker a Daudi. Arae ekiro ka apese Maria.

²⁸ Tolot emalaika toloma kai ŋina ayai Maria, kimala iŋes tema, “Maata iyoŋ ŋina ikitojokit Akuj! Iyakasi iyoŋ ke Ekapolon!”

²⁹ Tosuri etau a Maria nooi totamatama ebala, “Okoe, alimalas lo?”

³⁰ Tolimok emalaika iŋes tema, “Nyikuryaniar Maria, anerae ikiseu Akuj iyoŋ,

³¹ ipotiuni iyoŋ kidou ikoku ŋini sapat, tolimok ekeekiro Yesu.

³² Erwoniar iŋes ka enyarao Lokoku ka Akuj a ŋina alokidiama nooi. Isiboikini Akuj iŋes lokicoloŋ a papa keŋ Daudi.

³³ Ipukae iŋes ateker a Yakobo ŋikaru ka ŋikaru, nabo nyedaun Apukan keŋ!”

³⁴ Tolimok Maria emalaika tema, “Arae ayoŋ apese ŋina nyikiryamakina ka ekile, epedor ŋakiro ŋun ikwaani?”

³⁵ Toboŋok emalaika tema, “Ebuni Etau ŋolo Asegan neni kon, nabo ikirapuwari iyoŋ apedor ŋina ka Akuj a ŋina alokidiama, ikwa aribo ŋina ke edou. Aŋun, ikoku ŋini idouni iyoŋ, eruwor ŋini ka Akuj ka enyarao Lokoku ka Akuj.

³⁶ Toanyu mono iyoŋ tari nakaaya kon daŋ Elisabet, ŋina sek ebookoi akolup, adol ŋilapyo ŋikanikapei epoti ikoku ŋini sapat, tari kemojoŋit daŋ.

³⁷ Anerae emam ibore ŋini ipiyori Akuj.”

³⁸ Tema nai Maria, “Arae ayoŋ aketiyan ŋina ke Ekapolon; kitiyakin neni kaŋ ikwaŋinapei ilimunio iyoŋ.” Kelunyar ŋun, tonyou emalaika tolot.

Kilaar Maria neni ke Elisabet

³⁹ Alorwa a ŋulupei, abu Maria tonyou atipei, tolot nakwap ŋina a ŋikamukumukui lotaun ŋolo a Yudaya.

⁴⁰ Toloma iŋes lore a Sakariya, kimala Elisabet.

⁴¹ Ŋolopite eirarya Elisabet emalas a Maria, kicurok ikoku anakook keŋ, kilelebikin Etau ŋolo Asegan tooma keŋ.

⁴² Kiworou iŋes a etoil a ŋolo apolon tema, “Irereŋ iyoŋ alokidiŋ ŋaberu ka ikoku ŋini ipoti iyoŋ erereŋ iŋes daŋ.

⁴³ Okoe, anukiro apolok etiyakin neni kaŋ nu, ŋuna abunio tari toto ke Ekapolon kaŋ neni kaŋ?

⁴⁴ Anerae ŋolopite eirarya ayoŋ emalas kon, kicurok ikoku ka alelyan anakook kaŋ.

⁴⁵ Irereŋ iyoŋ aŋuna inupya atemar iyookin akirot ŋina ke Ekapolon aneni kon!”

Eete ŋolo epuror Maria Akuj

⁴⁶ Tema Maria, “Itopoloorit ekaatau Ekapolon;

⁴⁷ elelyani etau kaŋ aŋuna ka Akuj Ekaiunan kaŋ,

⁴⁸ anerae adau iŋes akiŋolikin akitiditeuna a aketiyan keŋ. Ameun tokona, akanyaraete ayoŋ ŋanyameta daadaŋ akarereŋon,

⁴⁹ anerae Akuj ŋina ka apedor eketiyak ayoŋ ŋakiro ŋuna apolok, eseg ekiro keŋ.

⁵⁰ Eyai akisyon keŋ neni a ŋulu ekerito iŋes ananyameta a daadaŋ.

⁵¹ Etiya iŋes ŋakiro ŋuna apolok a akeekan, eela ŋulu eturok alotai kec.

⁵² Ekota iŋes ŋikapolok alokicoloŋo kec, ka etopoloo ŋulu itiditeuna alotai kec.

⁵³ Esimwon a ŋiboro a ŋulu ajokak ŋulu enyamit akoro, erita ŋulu abarak eokito ŋakan.

⁵⁴ Eŋarak iŋes Isirael eketiyan keŋ, aŋuna atamunia akisyon keŋ;

⁵⁵ ikwaŋina kirworor neni atapapaa yok, Aburaam ka ŋiletok keŋ ŋikaru ka ŋikaru.”

⁵⁶ Kiboyoto nai Maria ka Elisabet ŋilapyo ŋiuni; ani ekaku, toboŋo lore kec.

Akidouno a Yoana ke Ekebatisan

⁵⁷ Todol ŋirwa ŋulu edounio Elisabet, kidou iŋes ikoku ŋini sapat.

⁵⁸ Kiirasi ŋikeekidunyet ka ŋikeeyeneta atemar esyon Akuj iŋes, tolakaros ka iŋes kaapei.

⁵⁹ Ani edoli ŋirwa ŋikanikauni ŋulu kileŋeret ikoku, kiitana ŋituŋa alimokin iŋes ekiro ŋolo anyaritae Sakariya, ekiro a papa keŋ.

⁶⁰ Tema toto keŋ, “Nyenyarao iŋes ikoŋina, elimokinio Yoana.”

⁶¹ Temasi ikes, “Emam anateker kon ituŋanan elimokinitae ekiro ŋol.”

⁶² Toketut nai ikes papa keŋ akiŋit ekiro ŋolo ecamit iŋes tolimokinae ikoku.

⁶³ Kilipu iŋes abao ŋina kigira, kigir ebe, “Erae ekeekiro Yoana.” Toumokis ŋituŋa daadaŋ.

⁶⁴ Anenipei tolacakin aŋajep a Sakariya, toŋaar etoil keŋ, togeu iŋes akipuro Akuj.

⁶⁵ Min akuryanu lokidunyet daadaŋ, tokeikin daŋ ŋakiro ŋun akwap ŋina a Yudaya daadaŋ ŋina a ŋikamukumukui.

⁶⁶ Ŋulu daadaŋ eirarete, apotu totamatamata alotai kec temasi, “Okoe, eruwor ikoku en nyo? Anerae ileere atemar eyai apedor ŋina ke Ekapolon neni keŋ.”

Ŋakiro ŋuna adwari Sakariya

⁶⁷ Kilelebun Etau ŋolo Asegan neni a Sakariya todwar iŋes tema,

⁶⁸ “Kipuroe Ekapolon Akuj a Isirael, anerae abu iŋes lotuŋa keŋ alacakin ikes.

⁶⁹ Ikiinak iwon Ekaiunan ŋolo etiron anateker a Daudi eketiyan keŋ.

⁷⁰ Erae nu ŋuna koloŋ ikiikinit iŋes iwon alorwor a ŋikadwarak a ŋulu ka Akuj

⁷¹ ebe, itemokino iwon itoiun alomoe yok ka anapedor a ŋulu ikiremokino iwon.

⁷² Etoodik iŋes atapapaa yok akisyon keŋ ka atamu Acamunet keŋ ŋina asegan.

⁷³ akikoŋiet ŋina koloŋ ekoŋi iŋes neni a papa yok Aburaam.

⁷⁴ Erae akikoŋiet keŋ aiun iwon alomoe yok, opedoryata nai iwon akitiya ekeetic emam akuryanu.

⁷⁵ Oruworotor iwon ŋulu asegak ŋulu ikiyookino aneni keŋ ŋirwa daadaŋ ŋulu ikiyarya iwon.

⁷⁶ Iyoŋ ikoku ŋini cici, ikinyarao ekadwaran ŋolo ka Akuj a ŋina alokidiama nooi; anerae iŋarenikini iyoŋ Ekapolon, kitemonok ŋirotin keŋ.

⁷⁷ Tolimonok ikes atemar eiunio ikes aŋuna isyoniyere ŋasecisya kec.

⁷⁸ Epatana nooi Akuj yok ka isyoniono. Abu aiuno keŋ neni yok ikoni neni ipiripirunia akoloŋ

⁷⁹ ka ayau akica neni a ŋulu eyakasi nakiryonut ŋina ka asecit ka atwanare, ikitena iwon lorotin ŋulu ke ekisil.”

⁸⁰ Topolou ikoku togogoŋior alotau keŋ; kiboi iŋes anariet akitodol akoloŋit ŋina etoodikinere iŋes neni a Ŋisirael.