Isa. 8 - Ebaibul

Toruwor lokoku a Isaya akitoodikinet neni a ŋituŋa

¹ Okolimok nai Ekapolon ayoŋ tema, “Tolemu akaratas ŋina ekatal kigir ŋakiro nu nen a ŋanyukutae a ŋuna eyenete ŋituŋa ‘Toŋatasi atipei! Toryetasi atipei!’

² Tonyarau ŋikilyok ŋiarei ŋulu ikinyoma, esacaradoti Uria ka Sakariya lokoku a Yeberekia toruworos ŋisuudae.”

³ Abu nai ayoŋ eryamakin ka aberu kaŋ ka abu topoti ka kidou ikoku ŋinisapat. Okolimok nai Ekapolon ayoŋ tema, “Tolimok iŋes ekiro ‘Toŋatasi atipei ka Toryatasi atipei.’

⁴ Kitiya ŋun eriŋa ikoku ŋin nyeanyuna atemar papa, kori toto. Ecunari erwosit ka Asiriya abaru a Damasko daadaŋ ka ŋiboro ŋulu eŋatunito ŋituŋa a Samaria daadaŋ.”

⁵ Kirwor Ekapolon nabo neni kaŋ tema,

⁶ “Aŋuna aŋeryoto ŋituŋa lu ŋakipi a Silo ŋuna eleleete iwadio ka aŋuna emaraniata ikes alokiŋaren Resin ka lokoku a Remalia,

⁷ eyauni Ekapolon erwosit ka Asiriya kaapei ka ŋasigarya keŋ akirem Yudaya. Epote ikes erimaete esibito ŋakipi a aŋolol Eupurate apaki ŋina ilelebar ka ilapitor.

⁸ Egiraarete ikes akwap a Yudaya daadaŋ lopite ŋolo egiraarya akalele akwap toburusiya ibore daadaŋ.” Ikirukit isua ka Akuj, imukito ŋabebenuk keŋ akwap kosi.

⁹ Okoe ŋituŋa a ŋakwapin, tocunakinos iwapei ka akuryanu, topupokisi ŋituŋa daadaŋ ŋulu a ŋakwapin a ŋuna alwanak, tosubakinos aŋuna ke ejie nai tokuryaka! Tosubakinos aŋuna ke ejie, nai tokuryaka!

¹⁰ Toyeutu akitiya ŋakiro kus, nai nyiyookinosi kirworo ŋakiro ŋuna icamito iyes daadaŋ, nai nyiyookinosi, anerae ikirukit isua ka Akuj.

¹¹ Abu Ekapolon kirwor neni kaŋ anapedor keŋ a ŋina agogoŋon akalimokinit ayoŋ atemar nyemaikina ayoŋ ewuap ŋakiro a ŋituŋa, abu iŋes tema,

¹² “Nyituko akitiya ŋadi kaapei ka ŋituŋa ka nyiker ŋakiro ŋuna ekerito ikes, kori nyikuryaniar nooi.

¹³ Nai Ekapolon ŋolo a ŋajoresyo iŋes bon emaikina ituruworyo ŋolo eseg, toker iŋes bon ka tokuryan nooi aŋuna keŋ.

¹⁴ Ekapolon iŋes eruwor asegis, amoru ŋina iguwanakini ŋituŋa a Yudaya ka Isirael ka ataaba ŋina ibusonokini ikes. Eruwor iŋes aloc ka auno ŋinakisurumet ŋituŋa ŋulu iboiyete alo Yerusalem;

¹⁵ igukini ŋulu alalak alokidiŋ kec, ibusokinosi ikes tobilas, ikamunio ikes torikoroe.”

Ŋikasyomak a Isaya

¹⁶ Torucokina anakiteyenikineta, ŋikasyomak kaŋ,

¹⁷ Edarit ayoŋ Ekapolon ŋolo iwuait ereet keŋ aneni a ŋituŋa a Yakob ka egenokin ayoŋ neni keŋ.

¹⁸ Kiŋolikinae ayoŋ lo ka ŋidwe ŋulu abu Ekapolon okoinak ayoŋ, ikirae akitoodikinet ka aumokinet alo Isirael aneni ke Ekapolon a ŋolo a ŋajoresyo a ŋolo iboi alomokura Sion.

¹⁹ Ani tokona ketemasi iyoŋ ŋituŋa ebe, “Kiŋitutu ŋakiro aneni a ŋipyan ka aneni a ŋililae a ŋulu iŋaiŋaasi ka iŋunuŋunosi, nyemaikina mono ŋituŋa kiŋitut ŋakiro aneni a ŋakujo kec aŋuna a ŋituŋa a ŋulu eyarete

²⁰ ka aŋuna ka akitatamya ta ayenunia ŋuna emaikina kitiyae a?” Kire jik ŋituŋa ŋulu irworosi lopite ŋol nyerubakinete eyarete.

²¹ Irimete ŋituŋa akwap ekadakinit ka enyamit akoro eŋoyete ikes nooi tolomakis akicen erwosit kec ka ŋakujo kec. Ireorete ikes kidiama,

²² kori ijuuruyete nai iŋolikinete ikes ŋican ka akiryonut, enyorididete ŋireetin kec ka eryebakinosi ikes, ido iritaryo ikes nakiryonut ŋinakiryonon cuc.