Isa. 7 - Ebaibul

Akisimukekinet a Isaya neni ka Aas

¹ Alorwa a ŋulu epukator Aas lokoku a Yosam a ŋolo arae lokoku a Usia ŋina araakar iŋes erwosit a Yudaya, apotu erwosit Resin ŋolo ka Aram ka erwosit Peka lokoku a Remalia ŋolo anakwap a Isirael toloto akirem Yerusalem, nai apotu nyepedosi akitijiore ŋituŋa a Yerusalem.

² Ani iirarete ŋituŋa a Daudi atemar ariwo Aram ka Epuraim, tomaranikis Aas ka ŋituŋa keŋ daadaŋ lopite ŋolo emaranikiniata ŋikito anamoni apaki ŋina ekutunia ekuwuam.

³ Tolimok nai Ekapolon Isaya tema, Toloto ka lokoku kon Sear-Yasub kisiryama Aas anakisalet a edoket a ŋolo elosere neni eya ŋakipi anabwal a ŋina alokidiama a ŋina eyai lorot ŋolo elosere neni ilosyata ŋiketiyak ŋilowi,

⁴ tolimok iŋes atemar, totenite, kililiŋ, nyikuryaniar ka totitinyor aŋuna a erwosit Resin ka erwosit Peka ta Aram ta lokoku a Remalia nyepedorete ikes akiwan iyoŋ, anerae ikwaan ikes ka ŋakito a akim ŋaarei ŋuna epuruyete koŋin.

⁵ Eyeunito ŋakiboisyo nu Aram kaapei ka Epuraim ta lokoku a Remalia akitiya aronis neni kon ebasi,

⁶ “Etipeiyosi etijikisi ŋituŋa a Yudaya, oremo Yerusalem ekamasi iŋes toruwor etaun yok, ido eturuwosi lokoku a Tabeel erwosit a Yerusalem.”

⁷ Aŋun irworo Ekapolon Akuj ebala, “Nyetakanunete ŋun ka nyitiyakin ŋun,

⁸ anerae etaun ka Aram ŋolo apolon iŋes Damasko ka ekapolon a Damasko iŋes erwosit Resin, alotooma ŋikaru ŋatomonikanikapei ka ŋikan, ielaryo ŋituŋa a Epuraim tojoŋoto araakau ŋulu ka akwap a apei.

⁹ Etaun a Epuraim ŋolo apolon iŋes Samaria ka ekapolon ŋolo a Samaria iŋes lokoku a Remalia. Ani pa kigogoŋior iyoŋ ananupit, nyirubakini idaŋidaŋi jik.”

Inak Isaya Aas akitoodikinet ŋina ke Emmanuel

¹⁰ Kirwor nabo Ekapolon neni ka Aas tema,

¹¹ “Kiŋit akitoodikinet aneni ke Ekapolon Akuj kon, akitoodikinet ŋina ebuni kerae alotooma akwap anakwap a ŋina a ŋikatwak kori alokidiama nooi.”

¹² Nai abu Aas tema, “Nyeŋisi ayoŋ akitoodikinet adio, nyekatakini ayoŋ Ekapolon.”

¹³ Tema nai Isaya neni ka Aas, “Kiirasi tokona iyes ŋiletok a Daudi, nyituupa mono iyes ŋituŋa anakidaŋidaŋ ŋakiro kus, ido icamito akituup Akuj kaŋ daŋ a?

¹⁴ Aŋun, Ekapolon elope iŋes ikiinakini iyoŋ akitoodikinet. Topupok, epotiuni apese ŋina nyiryamakina ka ekile ikoku, idouni iŋes ikoku ŋinisapat, elimokini iŋes ekiro a ikoku a ŋin Emmanuel

¹⁵ Apaki ŋina eyenunia iŋes akityak ŋakiro, toŋer aronis ka toseu ajokis, imuji iŋes ŋilaboi ka ao.

¹⁶ Eriŋa ikoku ŋin nyeyenuna akiŋer aronis ka aseun ajokis, eruwor akwap a ŋirwosi a ŋiarei a ŋulu ikerito iyes ekasile.

¹⁷ Eyauni Ekapolon neni kon ka neni a ŋituŋa kon ta nateker kon ŋirwa ŋulu a ŋican ŋulu nyetakanuna ŋinapei ameun anakoloŋit a ŋina atyakaror Epuraim alo Yudaya. Iyakuuni Ekapolon erwosit ka Asiriya neni kon.

¹⁸ “Akoloŋit ŋin, ekutakini Ekapolon ekapiriicit anyaraunia Ŋijipitian, potu anakisaleta a ŋaŋololin a Ijipit elalak nooi esibito ŋicuc ka enyarauni ŋituŋa ka Asiriya potu elalak nooi esibito ŋicuc a ao.

¹⁹ Epote ikes daadaŋ kiboiyoto anayona a ŋuna eya nakadipaalae, aneni etyakatyaka anatabab, anamon a ŋuna a ŋikukwa ka neni daadaŋ edakasi ŋibaren.

²⁰ “Akoloŋit ŋin, ipaŋgauni Ekapolon erwosit ŋolo ka Asiriya alokekwaye aŋolol Eupurate tobany ŋakyes kus, ŋitim ŋulu a ŋakejen kus ka ŋipeneka kus.

²¹ “Akoloŋit ŋin, eyakaunor ituŋanan ataok ka ŋamesekin ŋaarei,

²² ido imuji elabo, anerae eryamuni iŋes elabo anakile a ŋuna alalak. Ŋituŋa daadaŋ ŋulu idoŋete nakwap ŋin, imujete elabo ka ao.

²³ “Akoloŋit ŋin, eruworosi ŋimanikorin a ŋikito a epiini ŋulu sek ajokak ŋulu ayakatar ŋikito a epiini aliput ŋulu apedoryo akigyel a ŋisilipae a aliput ŋamon ŋuna a ŋikukwa.

²⁴ Epedori ituŋanan alosit nen akirika ŋityaŋ etiŋit akau a ŋikaleŋeleŋe ka ŋikaleŋeleŋe, anerae eruwor akwap ŋin daadaŋ neni eya ŋikukwa ka ŋamon a ŋikukwa.

²⁵ Ŋikamukumukui daadaŋ ŋulu sek etao ŋikinyom, nyipedorete iyes alosit nen, anerae ikuryaketa iyes aŋuna a ŋikukwa ka ŋamon a ŋikukwa, nai eruwor nen neni imyekinitae edakasi ŋaatuk ka ŋamesekin.”