Isa. 66 - Ebaibul

Akilip ŋina ecamit Akuj

¹ Ŋakiro ŋuna irworo Ekapolon ikes nu, “Erae nakuj neni epukator ayoŋ ka erae akwap neni ecakit ayoŋ; Akai ŋina ikoni ai ikidukokinete iyes ayoŋ, ai eyai neni kieŋunet kaŋ?

² Ŋakan kaŋ etiyaunete ŋiboro lu daadaŋ, ido erae ŋiboro lu daadaŋ ŋulu kaŋ. Nai ituŋanan ŋini ikoni ne iŋes alakaror ayoŋ: Ituŋanan ŋini itiditeuna bon ŋini ekiit alotau keŋ, ŋini itopoloorit akirot kaŋ.

³ “Ituŋanan daadaŋ ŋini akaaranakini ayoŋ emoŋ erae amuronot, ikwaan ituŋanan ŋin ka ŋini eari ituŋanan; ituŋanan daadaŋ ŋini akaaranakini ayoŋ ikale ŋinimesek erae amuronot, ikwaan ituŋanan ŋin ka ŋini emojiri emosiriŋ a iigok tobil; ituŋanan daadaŋ ŋini akainakini ayoŋ ainakinet ŋina a ŋikinyom ikwaan ituŋanan ŋin ka ŋini akainakini ayoŋ ŋaokot a eguruye; ituŋanan daadaŋ ŋini icunyi ekinyate aŋuna ka atamunitor ayoŋ, ikwaan ituŋanan ŋin ka ŋini ilipi neni ka etorube a ŋolo itiyaunitae. Adaut ŋituŋa ŋulu ikote ŋul akiwuap ŋuna kec a ŋikulepek, ido elakara ikes anakitiya asiilyo kec;

⁴ ayoŋ daŋ, aseuni ajamuwar ikes, ainakini ikes ibore ŋini ekerito ikes, anerae ani anyarae ayoŋ ikes, mam ŋini abu okoboŋok ayoŋ ŋakiro, ani esirworikini ayoŋ ikes, apotu ikes nyepupokis ŋakiro kaŋ, nai apotu ikes kitiyata ŋuna aronok alokiŋaren kaŋ, toseut akitiya ŋuna pa eketalakarito ayoŋ.”

Kisiyook Ekapolon ŋakiro keŋ alo Sion

⁵ Kiirasi ŋakiro ŋuna irworo Ekapolon, iyes ŋulu itopoloorito ŋakiro keŋ, “Adaut ŋituŋa kus pei ŋulu ikiremokino iyes ka ikiŋerito iyes aŋuna a ekiro kaŋ alimun ebe, ‘Emaikina Ekapolon kitoodiu apolou keŋ, ikotere isua ikiŋolikini iyes ilelyanete.’ Nai ikes ŋikulepek isurumyo ŋileec.

⁶ “Kiirasi mono iyes ecelet ŋolo ebunit alotaun, kiirasi mono iyes etoil ŋolo ebunit alo Kai ka Akuj. Erae ecelet ŋol etoil ŋolo a Ekapolon, isicani iŋes ŋimoe keŋ alotooma daadaŋ ŋuna emaikina kisicanere.

⁷ “Ekok etaun kaŋ ŋolo asegan aberu ŋina idouni eriŋa nyeryabakina, ekok iŋes aberu ŋina abu kidou ikoku ŋinisapat eriŋa nyeryabakina.

⁸ Ŋae mono ŋinapei koloŋ eira ŋakiro ŋun? Ŋae mono ŋinapei eŋolik ŋakiro ŋun? Eyai mono akwap epedoryata ŋituŋa ŋulu egelegelya aruwor ŋipei alotooma akoloŋit apei a? Eyakaun mono erae apei akwap a ŋituŋa a ŋulu egelegelya alotooma apaki apei a? Nai abu Sion toryamu ŋituŋa alotooma apaki ŋinapei eitanitor.”

⁹ Ebala Ekapolon, “Apedori mono ayoŋ acamakin ituŋanan topoti, ido nyidou a?” Ebala Akuj kon, “Apedori mono ayoŋ ŋina acamakinit ŋituŋa akidounun agolokin ŋakookyes kec a?”

¹⁰ Tolelyana ka Yerusalem ka tolakaros aŋuna keŋ, iyes daadaŋ ŋulu iminasi iŋes, Tolelyana ka iŋes analelyanu keŋ iyes daadaŋ ŋulu iyaloloŋete aŋuna keŋ,

¹¹ ikotere ilelyanete anakitiya ŋinibore ejok, lopite ŋolo eyakar ikoku natorobu atoto keŋ, ikotere ilakara nooi anakimat ibore ŋini alalan nooi ŋini eleleunit aneni keŋ.

¹² Irworo Ekapolon ebala, “Ainakini ayoŋ Yerusalem ebari kikwaanikin ka ŋakipi anaŋolol. Ainakini ayoŋ iŋes ebari a ŋakwapin kikwaanikin ka ayonae ŋina elele kilap, ikidari ka ikidaki iŋes iyes ka ikikanikani ikiuryarit ejok.

¹³ Ikwaŋina imaimaya toto ikoku keŋ, ayoŋ daŋ ekemaimai iyes, ekemaimai ayoŋ iyes alo Yerusalem.”

Epite ŋolo ipukaa Akuj ka ŋolo eŋoya Akuj

¹⁴ “Iŋolikinete iyes ka elelyanete ŋitai kus, etumete ŋawat kus totulejejeta ikwa ŋinya, ido eyenunio atemar eyai apedor a Ekapolon neni a ŋiketiyak keŋ ka eŋoikinit iŋes ŋimoe keŋ.”

¹⁵ Ebuni Ekapolon ecai ikwa a akim ka epote ŋagaari keŋ ŋuna iritae a ŋaŋolei ekerete ikwa ekuwuam ŋolo ipiripiri, ebuni iŋes anaŋoit keŋ enyunyura ka eyakaun akisicanet keŋ ikwaan ka arira.

¹⁶ Anatubokin a ŋina ke Ekapolon, isicani iŋes ka akim ka ekileŋ ŋituŋa daadaŋ ŋulu eryamuni esecito, elalaketa ŋulu eari Ekapolon.

¹⁷ Ŋituŋa ŋulu italeosi ka itesegasi aŋuna ka alosit akilip neni a ŋakujo alomanikorin, ŋulu elosete erae ŋikewuapak a ŋolo isilipi ikes neni a ŋakujo, ŋulu enyamete akiriŋ a ŋiguruyei ka ŋamuja ŋuna itoroniyaritae ta ŋisolimae, emunyaryo daadaŋ kaapei.

¹⁸ Ebala Ekapolon, “Ayeni ayoŋ ŋiticisyo ka ŋatameta kec, ido abuni ayoŋ acunakin ŋituŋa a ŋakwapin a daadaŋ ka a ŋaŋajepa a daadaŋ, epote ikes ka iŋolikinete apolou kaŋ.

¹⁹ Ewuakini ayoŋ neni kec akitoodikinet, ido eyakiyari ayoŋ ŋipiya kec nakwapin, eyakiyari ikes Tarisis, Put ka Lud nakwapin a ŋituŋa a ŋulu eyenete akisitiya ŋikaleŋeleŋe; eyakiyari ikes Tubal ka Yapan nakwapin ŋuna alwanak ŋuna idunyito anam, neni a ŋituŋa a ŋulu nyiirarito ŋuna ka arwonu kaŋ, kori nyiŋolikina apolou kaŋ, elimorete ŋikiyakia ŋul apolou kaŋ nakwapin.

²⁰ Eyaunete ikes ŋiyeneta kus daadaŋ anakwapin a daadaŋ erae ainakinet neni ke Ekapolon iwuokito a ŋaŋolei ka a ŋagaari a ŋuna iritae a ŋaŋolei, a ŋitak a ŋaŋolei, a ŋaŋolei-sigirya ka a ŋikaala, eyaunete ikes ŋituŋa ŋul lomukura kaŋ ŋolo asegan Yerusalem, lopite ŋolopei eyaununiata Ŋisirael ŋainakineta a ŋikinyom, a ŋiboro a ŋulu asegak Kai a Ekapolon.

²¹ Eturuwori ayoŋ ikes ŋice ŋisacaradotin ka ŋilepi.

²² Erubakinio enyaritae ekiro kus ka ŋiletok kus lopite ŋolo erubakiniata nakuj ka akwap ŋunakitet eyakasi.

²³ Ameun alolap ke epei tari lolap ŋoloce ka ameun anakoloŋit a Sabato ka apei tari ŋinace, epote ŋituŋa daadaŋ akilip neni kaŋ.

²⁴ Tosodi elomarete ikes kiŋa kiŋolikis ŋawat a ŋituŋa a ŋulu etwakito a ŋulu apotu okoŋero ayoŋ, anerae nyetwakete ŋikur ŋulu enyamete ikes ka nyituduŋeo akim kec, eruworosi nai ikes ŋulu eŋerer alotuŋa a daadaŋ.”