Isa. 65 - Ebaibul

Akiyookino ŋina ka akitub ka Akuj ŋakiro

¹ Abu ayoŋ etoodiun neni a ŋulu pa ekeitanito ayoŋ; apotu ŋulu pa ekewarito ayoŋ okoryamut ayoŋ. Abu ayoŋ otema neni kec, “Ayai ayoŋ ne, ayai ayoŋ ne.”

² Ŋapakio daadaŋ, abu ayoŋ ebaki ŋakan kaŋ neni a ŋituŋa a ŋulu akaŋerito ayoŋ; a ŋulu nyiwuapito ŋipitesyo ŋulu ajokak; a ŋulu iwuapito ŋuna kec a ŋilopeyek,

³ a ŋituŋa a ŋulu erubakinito itiyaete aronis alokiŋaren kaŋ, a ŋulu earete ŋamuronisya alomanikorin ka einanakinete ekinyate namatapali;

⁴ a ŋituŋa a ŋulu iboiyete alotooma ŋalyalin ka iboiyete nakwaare anakiboisyo a ŋuna nyeyenio; a ŋituŋa a ŋulu enyamete akiriŋ a ŋiguruwei ka eboka ŋolo eya ŋiboorei ŋulu itoroniyaritae;

⁵ a ŋituŋa a ŋulu ebasi, “Kiboi bon ai na, nyibu diyete kaŋ, anerae aseg ayoŋ nooi akilo iyoŋ.” Erae ŋituŋa ŋulu ikote ŋul ŋikoŋinae aneni kaŋ ikwaan ka apuru a ŋikumes, ikwaan ka akim ŋina enoki apaaran daadaŋ.

⁶ Kiirasi, etakanete ŋakiro nu alokiŋaren kaŋ igiritae ebe, “Nyeliliŋi ayoŋ, nai enyaŋari ayoŋ, esicani ayoŋ ikes jik;

⁷ esicani ayoŋ ikes kaapei aŋuna a ŋasecisya kec ka aŋuna a ŋasecisya atapapaa kec, anerae apotu ikes inakis ekinyate alokidiama ŋimoru ka ekeyanya ayoŋ alokidiama ŋikamukumukui. Esicani ayoŋ ikes lotyae ŋolo itemokino aŋuna a ŋiticisyo kec.”

⁸ Alimu Ekapolon ŋakiro nu, “Ikwaŋina eryamunere ŋaraito a epiini eya lonene, ido temasi ŋituŋa, ‘Nyimunaasi, eriŋa ikes ejokak;’ Ikwaŋinapei aŋuna a ŋiketiyak kaŋ etiyae ayoŋ ŋun, nyamunyari ayoŋ ikes daadaŋ.

⁹ Ayauni ayoŋ ŋiletok aneni a Yakob ka ayauni aneni a Yuda ŋulu einakinio emoru kaŋ toruwor ŋolo kec, eruwor nen neni a ŋituŋa kaŋ a ŋuluseuna ka iboikinosi ŋiketiyak kaŋ nen.

¹⁰ Eruwor Saron neni edakasi ŋamesekin ka eruwor akadipaalat ka Acor neni euryaketa ŋisipanin a ŋaatuk, anerae apotu ŋituŋa kaŋ ekewara ayoŋ.

¹¹ Nai ani eruwor iyes ŋulu iŋerito Ekapolon, ŋulu ikimuryak emoru kaŋ ŋolo asegan iyes ŋulu ilipete neni a ŋakujo ŋuna a ŋabaatyo ka ŋuna a ŋakiro a ŋuna etakanunete,

¹² ekemyekini ayoŋ iyes ikiari alojie ka iryedikete iyes daadaŋ alokiŋaren ŋikaarak kus; anerae ipotu iyes nyikiboŋokis ayoŋ apaki ŋina akanyaritor ayoŋ iyes, ipotu iyes nyipupokis ŋakiro kaŋ apaki ŋina erworor ayoŋ neni kus, nai ipotu iyes kitiyata ŋuna aronok alokiŋaren kaŋ, ipotu iyes toseut akitiya ŋuna pa eketalakarito ayoŋ.”

¹³ Aŋun, alimu Ekapolon Akuj ebe, “Imujete ŋiketiyak kaŋ, nai ikinyami iyes akoro; emasete ŋiketiyak kaŋ, nai ikinyami iyes akure, elelyanete ŋiketiyak kaŋ, nai ikisirumyo iyes ŋileec.

¹⁴ Eokinete ŋiketiyak elakara alotai kec, nai igworete iyes aŋuna ka aryeba a ŋitai kus ka iwololoete aŋuna ka akiyaloloŋ a ŋitai kus.

¹⁵ Imyekinete iyes ŋirorwa kus aneni a ŋuluseuna kaŋ erae ŋulu ilamare; ido ikimunyari Ekapolon Akuj iyes; nai einakini iŋes ŋiketiyak keŋ ekiro ŋolo egelaana.

¹⁶ Ituŋanan daadaŋ ŋini egatanakini arereŋu nakwap, emaikina togatak alokiro ka Akuj a ŋina ikinyoma; ituŋanan daadaŋ ŋini ikoŋi anakwap, emaikina kikoŋ alokiro ka Akuj a ŋina ka akikinyoma; anerae emuryakin ŋican ŋulu koloŋ ka nyeriŋa ayoŋ ete ŋican ŋul.”

Ŋisubuna ŋulukitet ŋulu ajokak

¹⁷ “Eapi ayoŋ asubun nakuj ŋinakitete ka akwap ŋinakitete, nyetamunio nabo ŋiboro ŋuluŋorok, kori nyerubakinete eya natameta.

¹⁸ Nai tolakaros ka tolelyana ŋikaru ka ŋikaru aŋuna a ŋiboro a ŋulu asubuni ayoŋ, anerae eapi ayoŋ asubun Yerusalem ikwapei neni eyai alelyanu kaŋ, neni eyai alakara kaŋ lotuŋa keŋ.

¹⁹ Abuni ayoŋ alelyan alo Yerusalem ka alakar aŋuna a ŋituŋa kaŋ; nyiiraryo nabo akigworo alotooma keŋ, kori nyiiraryo nabo akigworo aŋuna a ŋican.

²⁰ Nyeyakaun nabo tooma keŋ ŋiŋwea ŋulu eyarete ŋirwa ŋidikudyo, kori ŋimojoŋi ŋulu nyikoŋikoŋete, anerae ŋini etwani erae ŋikaru keŋ amiat etamakinio atemar ariŋa esorokana, ido ŋini nyedolete ŋikaru keŋ amiat etamakinio atemar ilamitae iŋes.

²¹ Edukete ikes ŋakais, ido kiboiyoto alotooma kec, edupakinete ikes ŋikito a epiini lomanikor kec, ido enyamete ŋaraito a ŋikito a ŋul.

²² Nyedukete ikes ŋakais, ido bu ituŋanan ice akiboi a nen, nyedupete ikes ŋikito bu ituŋanan ice akinyam ŋaraito kec, Iriyanikin ŋirwa a akiyar a ŋituŋa kaŋ ka ŋulu a ekitoe, imujete ŋituŋa kaŋ ŋuluseuna alotooma alelyanu apaki ŋina aoyan ŋinyomen ŋulu itaunete a ŋakan kec.

²³ Nyitiyaete ikes ikoŋin, kori nyeuruunete ŋidwe ŋulu eryamunete ŋican, anerae eruwor ikes ŋiletok ŋulu iterereŋit Ekapolon kaapei ka ŋipapae kec.

²⁴ Ani eriŋa ikes nyenyara ayoŋ akiŋarakin ikes, aboŋokini ayoŋ ikes, ani eriŋa ikes irworosi, eirari ayoŋ ŋuna irworosi ikes.

²⁵ Eryamunete epeot ka ikale akimuj anakibois kaapei, enyami eŋatuny ŋinya ikwa emoŋ, nai eruwor akimuj a emun apuwa. Nyewanio ikes, kori nyemunyaryo ikes alomoru kaŋ a ŋolo asegan.”