Isa. 60 - Ebaibul

Acununo a ŋulu ielara

¹ Okoe ŋituŋa a Yerusalem, tonyoutu, kileereutu, anerae adolu ekaiunan kus ka abu neni kus apolou ŋina a Ekapolon.

² Epetakin akirwonut akwap daadaŋ, erapuwari akirwonut ŋituŋa daadaŋ, nai ebuni Ekapolon neni kus, etakanuni apolou keŋ neni kus.

³ Epote ŋituŋa anakwapin akiwuap ŋuna ka akica kus, epote ŋirwosi akiwuap ŋuna ka akica kus a ŋina ileere.

⁴ Kireosi kidiama ka toŋoleŋolekisi nawaetin; acunakin ikes daadaŋ, eponito neni kus, epote ŋidwe kus ŋulusapa aneni alwanan, edakunio ŋidwe kus ŋulupesur a ŋakan a ŋakedarak kec.

⁵ Iŋolikinete nai iyes ŋun, ido kileereut aneni kus ŋakiro; elakar ŋitai kus ka ilelyanete iyes, anerae iudunio ebari a anam daadaŋ neni kus, eyaunio ebari a ŋakwapin neni kus.

⁶ Eburusiyarete ŋikaala ŋulu alalak akwap kus, epote neni kus ŋitak a ŋikaala ŋulu a Midian ka Epa, epote ŋikaala ŋulu alo Seba daadaŋ neni kus. Iwokunete ikes neni kus egolid ka ekinyate, ido iseraete ŋikametok kec ipurosi Ekapolon.

⁷ Iudunio ŋamesekin a Kedar daadaŋ neni kus, eyaunio neni kus ŋimesekin a Nebaiyos ikwapei ŋamuronisya ŋuna epeyo, acamuni ayoŋ ikes anamuroet kaŋ, esibusi ayoŋ Akai kaŋ ŋina ka apolou.

⁸ Ataŋae ŋul ŋulu eporete alokidiama esibit ŋidouwon ŋulu elosete alokidiama, ŋulu eporete ikwa ŋakuryo elosete nakais kec?

⁹ Kire jik, ekewarete ayoŋ ŋituŋa ŋulu iboiyete alodiyete anam; iŋarenunete ŋameeli ŋuna a Tarisis, eyaunete ikes ŋidwe kus ŋulusapa aneni alwanan, eyaunete ikes esilipa ka egolid kec aŋuna ka akitopoloor ekiro a Ekapolon, Akuj kus ŋina asegan ŋina a Isirael, anerae ikitopoloo iŋes iyes.

¹⁰ Edukete ŋigelaanotin ŋarwatatain kus, ikitiyanakinete iyes ŋirwosi kec, anerae abu ayoŋ ananyunyura kaŋ ekesican iyes; nai anajokis kaŋ, adau ayoŋ akisyon iyes.

¹¹ Erubakinete ŋipukei kus eŋaara; nyegolokinio ikes naparan ka nakwaare, ikotere ikiinunete iyes ŋituŋa a ŋakwapin ebari kec, iŋarenikinito ŋirwosi kec ikes eropiunito.

¹² Emunyaryo ŋituŋa a akwap, kori a apukan a ŋina nyikitiyanakini iyes; inyasunio nooi ŋakwapin ŋun.

¹³ Eyaunio ebari a Lebanon daadaŋ neni kus, eyaunio ŋikito a Cipres ka ŋuluce daadaŋ aŋuna ka akisibusya akibois kaŋ ŋina asegan, ido esibusi ayoŋ akibois kaŋ.

¹⁴ Epote ŋiletok a ŋituŋa a ŋulu sek isicanito etaun kus neni kus itiditeuna, eryedikete anakejen kus daadaŋ ŋulu sek ikijamuwarito iyes; enyaraete ikes etaun kus etaun a Ekapolon Sion ŋolo a Akuj a ŋina asegan a ŋina a Isirael.

¹⁵ Tari sek kikiŋeritoe ka kikimanitae iyes ka kemam ituŋanan etorununui nakwap kus; eketuruwori ayoŋ iyes ŋulu ailiilok ŋikaru ka ŋikaru; alelyanu ŋina ka anyamet ka apei tari ŋinace.

¹⁶ Ikitanete iyes ŋituŋa a ŋakwapin lopite ŋolo itanakia toto ikoku. Ikitanete iyes ŋirwosi, ido iyenunete iyes atemar ayoŋ Ekapolon arae ekaiunan ka ekalakunan kus, Akuj ŋina etiron ŋina a Yakob.

¹⁷ Akainuni ayoŋ iyes egolid akilo eburonis, esilipa akilo ŋasuwa, eburonis akilo ŋakito, ŋasuwa akilo ŋamoru. Ewuakini ayoŋ ekisil ikipuka iyes ka akiyookino ikiyok iyes.

¹⁸ Nyiiraryo nabo ŋuna ka aryenyeo anakwap kus, kori ŋinyas ka amunyoro alokukoryo ka akwap kus. Enyarao iyes ŋarwatatain kus ŋuna ikiunete ka enyarao iyes ŋipukei kus ŋulu ka akipuro.

Akuj akapolon a Sion

¹⁹ Nyeruwor nabo akoloŋ ikiinakini iyes akica naparan, kori nyecauni neni kus nakwaare akica ŋina ke elap, nai Ekapolon eruwor akica kus ŋina a ŋikaru ka ŋikaru ka eruwor Akuj kus apolou kus.

²⁰ Nyedoiyori nabo akoloŋ aneni kus, kori nyedoiyori nabo elap aneni kus, anerae Ekapolon iŋes eruwor akica kus ŋina a ŋikaru ka ŋikaru, ido edaunosi ŋirwa ŋulu ka akiyaloloŋ kus.

²¹ Eruworosi ŋituŋa kus ŋulu iyookino; ituruworete ikes akwap ŋina kec ŋikaru ka ŋikaru. Erae ikes ŋaten ŋuna abu ayoŋ etolomu, erae ikes etic ŋolo a ŋakan kaŋ, ikotere ayoŋ epedoryo akitopoloor.

²² Tari ekal ŋolo sek edit aneni kec, eruwor ateker, eruwor ateker kec ŋina sek edit akwap apei. Arae ayoŋ Ekapolon, esiyookini ayoŋ ŋun atipei anapaki a ŋina itemokino.