Isa. 58 - Ebaibul

Akilip ŋina a kire ka ŋina nyiyookino

¹ Alimu Ekapolon ebe, “Tocelutu nooi, nyililiŋiyasi! Tocelutu a ŋitoilon a ŋulu apolok esibit arupepe erwo. Tolimokisi ŋituŋa kaŋ ŋakiro ŋuna akaŋeryoto ayoŋ, tolimokisi ŋiletok a Yakob ŋasecisya kec.

² Kikote neni daŋ, ekewarito ikes ayoŋ a ŋinakoloŋit etakanete esibit iwarito akiwuap acamit kaŋ, esibito ŋituŋa ŋulu itiyaete ŋuna iyookino ka ŋulu nyeŋero akiwuap ŋakiro ŋuna etubunit Akuj kec, iŋitasi ikes aneni kaŋ aryamun akitub ŋakiro anakiyookino, emaikina ikes aponare diyete Akuj.”

³ Ebasi ikes, “Kaanukiro ikiredanakinia isua akiron, nai nyikite iyoŋ isua? Ikitiditeunun isua make, nai nyimisit iyoŋ.” Topupokisi, itiyaete iyes ŋuna ikitalakarito iyes pei akoloŋit ŋina iredanakineta akiron, ido isicanito iyes ŋiketiyak kus.

⁴ Kiirasi, iredanakinete iyes akiron aŋuna ka akiburaa ka ajio, ta aara make iyakatar aronis. Aronenen ŋina itiyaete iyes, nyepedori ainakin ayoŋ aboŋokin akigworo kus.

⁵ Itamete iyes erae ŋin akiredakin akiron ŋina acamit ayoŋ a? Itiditeuna iyes alotooma akoloŋit apei bon a? Acamit mono ayoŋ akijurur a ituŋanan esibit eoot ŋolo isijuurui ekuwuam a? Acamit mono ayoŋ akiper kus aloguniyae ka alokurono a? Erae mono ibore ŋin akiredanakin akiron a? Erae mono ŋin akoloŋit ŋina italakarit Ekapolon a?

⁶ Akiredanakin akiron ŋina acamit ayoŋ iŋes akitiya ŋuna iyookino alemarya ŋuna nyiyookino, alacakin ŋarukanes a ayokot a ŋina eenit ŋituŋa, isicanitae toryamut alacakina ka alemar ŋinibore daadaŋ isicanit ŋituŋa.

⁷ Aronenen ŋina acamit ayoŋ iŋes akimor akimuj kus ka ŋulu enyamit akoro, akijaun ŋulu a ŋican ŋulu emam ŋakais nakais kus, iŋes akitanap ŋulu iŋolikinete iyes emam ŋilowi ka alemar aŋopenen iŋolikinete ŋiyeneta kus.

⁸ Kitiyata iyes ŋun, ijokyata iyes ikwa akoloŋ elomuni taparacu ka ikitaŋaleunio iyes atipei, ido ikiŋarenikini iyes akiyookino kus, ikiyoki apolou a Ekapolon iyes alokaku.

⁹ Ipote nai iyes anyarare Ekapolon, ido ikiboŋok iŋes iyes; igworete iyes iŋitasi akiŋarakino, ido eboŋokini iŋes tema, “Ayoŋ lo.” Ani kilemasi iyes epite ŋolo iteryamunitotor ŋuluce ŋican, epite ŋolo idoditotor iyes ŋuluce ka irworotor,

¹⁰ ani kiinakis iyes akimuj kus neni a ŋini enyamit akoro, ido kiŋarakis ŋulu iteryamunitae ŋican, etakanuni nai ajokis kus ŋina sek nyetakani, edaun akiyaloloŋ kus ileereuni ajokis kus ikwa akoloŋ kidiŋ apaaran.

¹¹ Ikiyoki Ekapolon iyes a ŋinapaki, ikiinakini iŋes iyes ibore daadaŋ ŋini iitanito iyes tari anakiboisyo a ŋuna erae ŋalaroi, itogogoŋi iŋes ŋakoyo kus. Ikwaanikinosi nai iyes ka emanikor ŋolo eya ŋakipi ŋuna itemokino, ikwaanikinosi iyes ka eitanit a ŋakipi ŋolo nyijuwanari jik.

¹² Edukokinio nabo ŋakais kus ŋunakoloŋ ŋuna aritanakina, idukokinete iyes ŋakais ŋuna a ŋanyemeta a ŋuna alalak; ikinyarao iyes ŋikadukokinak nabo ŋarwatatain ŋuna abwaŋabwaŋaara, ŋikewuakinak nabo ŋirotin a etaun ŋulu eya ŋakais nawae.

¹³ Ani pa kibila iyes akiciket ŋina ka akiricakinit akoloŋit ŋina a Sabato, pa kiwuap iyes ŋuna icamito iyes ŋikulepek alotooma akoloŋit kaŋ ŋina asegan, ani kinyarata iyes Sabato akoloŋit ŋina ka alakara, ani kinyarata iyes akoloŋit ŋina asegan ŋina a Ekapolon akoloŋit ŋina itopolooritae; ani kitopoloosi iyes iŋes anaesikin akitiya ŋuna icamito iyes ŋikulepek, kori anaesikin akitiya ŋuna ikitalakarito iyes, kori akiwarit akitiya ŋuna kus a ŋikulepek,

¹⁴ ŋun nai ilelyaniata iyes aneni a Ekapolon, ido eketopoloori ayoŋ iyes akilo ŋituŋa daadaŋ anakwap, akainakini ayoŋ iyes ŋarereŋisyo a papaa kus a Yakob. Adau Ekapolon alimun ŋakiro ŋun.