Isa. 57 - Ebaibul

Acaryoonut a akilipenen a Ŋisirael neni a ŋakujo

¹ Ani etwakete ŋituŋa ŋulu iyookino, emam ituŋanan emisit atamatam alotau keŋ. Ani earyo ŋituŋa ŋulu enupito nooi, emam ituŋanan eyeni ŋakiro ŋuna aarere ikes. Elemanaryo ŋituŋa ŋulu iyookino, anerae nyecamitae ikes toryamut ŋican,

² ido elomarete ikes lokisil ieŋunete alokicoloŋo kec ŋulu eyarete sek erae ŋulu iyookino.

³ Nai ani eruwor iyes, potu ne, iyes ŋidwe a ŋikekukujak, iyes ŋiletok a ikaloman ka imalaanot.

⁴ Ŋae mono ikyanatar iyes? Ŋae iŋenyanakinete iyes ka imyelanakinete iyes ŋaŋajepa? Meere iyes ŋidwe ŋulu ikiuriyo anabilibil ŋikisila ka ŋidwe a ŋimodiyanotin a?

⁵ Ilipete iyes neni a ŋakujo aneni eya ŋikuyono, ilipete neni a ŋakujo alokwap ŋikito daadaŋ ŋulu alibak, iŋoleneneete iyes ŋidwe kus anakadipaalae ka alokwap ŋatabab ŋunasulut.

⁶ Eyakasi ŋakujo kus neni eya ŋamoru ŋunasulut anayona, ŋakujo ŋun ikes iŋatarito iyes; iinanakinete iyes ikes ŋainakineta ŋuna a ŋimaten, iyaasi iyes neni kec ŋainakineta ŋuna a ŋikinyom. Apedori mono ayoŋ alakar aŋuna a ŋakiro a ŋun a?

⁷ Aruwor ŋakiboisyo ŋuna aoyak ka lokamukumukui ŋulu aoyak ilosenenete iyes; ilot iyes nen ainanakin ŋakujo ŋamuronisya.

⁸ Iwuanakis iyes ŋitorubei a ŋakujo lopukei ka nakito a ŋipukei kus; anakiŋer iyes ayoŋ, isileereut iyes ŋuna itiyaete, idokasi iyes lokitaadae kus ilerete akitiya asiilyanut.

⁹ Ipotu iyes toloto neni a Molek itiŋito akimyet ka ipotu kitalalata ŋamyeta ŋuna akukunyok. Ipotu iyes kiyakiyasi ŋituŋa neni alwanan, ipotu kiyakiyasi tari tooma nakibois a ŋikatwak.

¹⁰ Abu ikiup iyes irimito ŋirwa ŋulu alalak, nai nyelimuno iyes ebe, “Erae akirimit na akoŋinait.” Ipotu iyes toryamut ekibure kus iata nooi, ido abu nyikiup iyes akirimit.

¹¹ Ŋae ikerito ka ikuryanito iyes aŋuna keŋ, ŋini abu ikiinak iyes akirwor alyokonu, ido ikitojoŋo iyes atamunit ayoŋ, kori atamatam aŋuna kaŋ? Meere nai aŋuna abunio ayoŋ eliliŋ apaki ŋina aoyan iŋes iponiata iyes nyikitopoloosi ayoŋ a?

¹² Esileereuni ayoŋ akiyookino kus ka ŋiticisyo kus, ido emam ajokis iryamunete iyes anakiro a ŋun.

¹³ Ani ikalounete iyes icamito akiŋarakino, emaikina ŋakujo ŋuna irirato iyes ikilakut iyes. Iwokori ekuwuam ikes neni alwanan, ekutari ekieŋanu ikes nariet. Nai ŋini ekekinyomi ayoŋ, ebuni neni kaŋ aiuno, eryamuni akibois anakwap, eruwor emoru kaŋ ŋolo asegan akibois keŋ.

Akiikinet ŋina ka akiŋarakin ka akitaŋaleuno

¹⁴ Iiraryo ŋituŋa ebasi, “Todukokisi, todukokisi, kitemonokisi erot, tolemasi ibore daadaŋ ŋini epedori akiretakin ŋituŋa kaŋ alorot kec.”

¹⁵ Alimu Ekapolon ŋolo iboi alokidiama nooi, ŋolo iboi ŋikaru ka ŋikaru ŋolo erae ekiro keŋ ŋolo asegan ebe, “Eboi ayoŋ alokidiama ka anakibois a ŋina asegan, kaapei ka ŋituŋa ŋulu itiditeuna ka iapara alotai kec, ikotere ainakini ikes nabo ŋitai ŋulu itiditeuna ka oinak ikes nabo ŋitai ŋulu iapara.

¹⁶ Nyarubakini ayoŋ esitakinit ŋituŋa, kori nyarubakini ayoŋ aŋoit a ŋinapaki; anerae ekadanakini ikes alokiŋaren kaŋ ekadanakini tari ŋituŋa ŋulu abu ayoŋ oinak ekieŋanu kaŋ.

¹⁷ Abu ayoŋ oŋo aŋuna a ekibure kec a ŋolo ka asecit; abu ayoŋ esican ikes, oŋop ka oŋo, nai apotu ikes torubakis iwuapito ŋuna kec a ŋilopeyek.

¹⁸ Eŋolik ayoŋ ŋuna ewuapito ikes, nai etaŋaleuni ayoŋ ikes. Ariki ayoŋ ikes enyakak neni kec akiboi ka alakara, ainakini ŋulu igworosi aŋuna kec toeoto.

¹⁹ Eyakaun ekisil neni a ŋulu eapiyete ka ŋulu elwaka, etaŋaleuni ayoŋ ikes.

²⁰ Nai erubakinito ŋikaronok itiyaete aronis esibito ŋakipi a anam ŋuna imorokokoete jik, ŋuna nyecamito adipakin; ŋuna iwokito jik arimama ka ecoto.”

²¹ Emam nyeryamunete ŋulu itiyaete aronis ekisil. Alimu Akuj ŋakiro ŋun.