Isa. 56 - Ebaibul

Etodolun Acamunet neni a daadaŋ a ŋulu iwuapito ŋakiro ka Akuj

¹ Alimu Ekapolon ŋakiro nu, “Torubakisi irae ŋulu iyookino ka kitiyaete ŋuna iyookino, anerae aapuu ayoŋ aiun iyes, ido itoodiunio alotooma apaki ŋina eapi ŋuna ka alakun ayoŋ iyes.

² Erereŋ ituŋanan ŋini itiyae nu, ŋini iricakini nu a ŋinapaki: Ŋini itopoloorit akoloŋit ŋina a Sabato, ŋini nyiyanyi akoloŋit ŋin ka ŋini nyitiyae aronis adio akoloŋit ŋin.”

³ Nyemaikina igelaanot ŋini iboiyete kaapei ka iyes elimuni ebe, “Kire jik, akatyakari Ekapolon ayoŋ alotuŋa keŋ.” Nyemaikina ekolup elimuni ebe,

⁴ “Ikikwaan ayoŋ ka ekitoe ŋolo eonit,” anerae alimu Ekapolon ŋakiro nu, “Ŋikolupanotin ŋulu itopoloorito akoloŋit ŋina a Sabato, ŋulu itiyaete ŋakiro ŋuna eketalakarito ayoŋ ka ŋulu iricito a ŋinapaki acamunet kaŋ,

⁵ ainakini ayoŋ ikes ŋirorwa ŋulu etamunitae jik alo Kai kaŋ ka alotooma ŋarwatatain kaŋ, ŋirorwa ŋulu iloito tari ŋulu a ŋidwe a ŋulusapa ka ŋulupesur. Ainakini ayoŋ ikes ekiro ŋolo a ŋikaru ka ŋikaru ŋolo nyepedoryo alemar.

⁶ “Tosodi ŋigelaanotin ŋulu eruworosi ŋulu a Ekapolon, ŋulu elimonokinete ŋakiro keŋ, ŋulu eminakinete ekiro a Ekapolon ka ŋulu eruworosi ŋiketiyak keŋ, ikes daadaŋ ŋulu itopoloorito akoloŋit ŋina a Sabato tomam akiyany akoloŋit ŋin, ido kiricakinito a ŋinapaki acamunet kaŋ,

⁷ ayaari ayoŋ ikes lomoru kaŋ ŋolo asegan, oinak ikes alakara alokai kaŋ a ŋinakilipet. Ecamunio ŋainakineta kec ŋuna epeyo ka ŋamuronisya kec anamuroet kaŋ, anerae enyarao Akai kaŋ Akai ŋina ilipyata ŋituŋa daadaŋ.”

⁸ Alimu Ekapolon Akuj ŋina ecununi Ŋisirael ŋulu erikoritae nakwapin ebe, “Acununi ayoŋ ŋuluce daŋ neni eya ŋulu sek adaun acunun.”

Atuna a ŋikepukak a Isirael

⁹ “Potu iyes daadaŋ ŋityaŋ ŋulu ka ariet, potu tomunyasi ŋituŋa lu iyes ŋityaŋ ŋulu ka amoni daadaŋ.

¹⁰ Emudukaka ŋiketeok a Ŋisirael, emamukatar ikes daadaŋ aosou, ikwaan ikes daadaŋ ka ŋiŋokwo ŋulu nyikomosi; irujaete eperete alokwap, eminasi ikes ajot

¹¹ Ikwaan ikes ka ŋiŋokwo ŋulu edakaka, nyimwokeneneete ikes. Erae ikes ŋikeyokok ŋulu emamukatar ayenut, iwuapito ikes ŋuna kec a ŋilopeyek; iwarit ŋinituŋanan aryamun ŋini keŋ a ilope.

¹² Ebasi ikes, ‘Potu, potu olemutu epiini, omata ŋagwe ŋuna adwarak emwoko; ejokyar akwap moi taparacu daŋ ikwanapei ikona, ejokyar nabo akilo.’ ”