Isa. 54 - Ebaibul

Acamunet ŋina a ekisil ŋina nyesaluni

¹ Alimu Ekapolon ŋakiro nu, “Okoe iyoŋ aberu ŋina ikolupana, toeik, tocelu ieo ka kiworou iyoŋ ŋina nyeanyuna aryeba ŋina ka akidoun! Anerae aryamu aberu ŋina abu lokile keŋ toesik ŋidwe ŋulu alalak, akilo aberu ŋina eyakar ekile.

² Tonyaa eema kon, tolalaar neni iboiyo iyoŋ, topeta ŋanaŋgae ŋuna inenosi nakibois ŋina iboiyo iyoŋ, nyimyek ikes ecunakina iwapei, kitayaa ŋaunoi kon ka kitogogoŋ ŋases ŋuna iguritere eema kon,

³ isiyotoryo ŋikukorin a akibois kon lowae ŋolo aloteten ka ŋolo alokedyeny, ikamarete ŋiletok kon ŋakwapin ka iboikinosi lotaunio ŋulu apotu toruwor ŋireŋoroto.

⁴ Nyikuryaketa, anerae nyikisirumyo iyes ŋileec nyikikadanak, anerae nyikijamuwaryo iyes. Nyitamunete nabo iyes ŋileec ŋulu iyakatar iyes eriŋa isorokaka, nyitamunete nabo iyes ŋiyany ŋulu iboiyoto iyes isibito ŋapuseru.

⁵ Ikiŋarakini iyes Ekapolon lopite ŋolo iŋarakinitor ekile aberu keŋ, erae ekiro keŋ Ekapolon ŋolo a ŋajoresyo. Akuj ŋina asegan ŋina a Isirael iŋes erae Ekalakunan kus, enyaritae iŋes Akuj a akwap a daadaŋ.

⁶ Ikinyar iyoŋ Ekapolon esibit irae iyoŋ aberu ŋina eŋeritoe, ŋina iyaloloŋi alotau keŋ, esibit irae iyoŋ ateran ŋina iritari ekile eriŋa esorokana.

⁷ Alimu Ekapolon Ekalakunan kus ŋakiro nu, Abu ayoŋ okeŋer iyoŋ alotooma apaki ŋina euruwuana, nai anakisyon a ŋina apolon nooi, akacununi ayoŋ iyoŋ.

⁸ Abu ayoŋ ananyunyura kaŋ a ŋina alalan ewua ereet kaŋ aneni kon, nai anamina kaŋ a ŋina a ŋikaru ka ŋikaru, ekesyoni ayoŋ iyoŋ.

⁹ Ikwaan nu aneni kaŋ ka ŋuna a ŋirwa a ŋulu a Noa, apaki ŋina abunio ayoŋ olimunio atemar nyilelebun nabo ŋakipi a Noa nakwap, aŋun, ekoŋ ayoŋ tokona atemar nyakaŋoikini nabo ayoŋ iyoŋ ka nyekeŋenyakini nabo ayoŋ iyoŋ.

¹⁰ Epedorete ŋimoru aŋopiyar ka epedoryo ŋikamukumukui alemar, nai nyalemari ayoŋ amina kaŋ ŋina nyiryaŋiryaŋa aneni kon, nyepedoryo alemar aneni kon acamunet kaŋ ka iyoŋ ŋina ke ekisil. Alimu Ekapolon ŋolo ikisyonit iyoŋ ŋakiro ŋun.

¹¹ Alimu Ekapolon ŋakiro nu, Okoe Yerusalem, etaun ŋolo ikisicanitae ikimemeo ka ŋolo emam ikesirworiunan ŋituŋa kon, eapi ayoŋ adukokin iyoŋ nabo a ŋamoru a ŋuna egogoŋ egyelit, adukokini ayoŋ nabo akisyakinet a ŋarwatatain kon a ŋamoru a ŋuna enyaritae Sapire.

¹² Adukokini ayoŋ ŋaduketa kon ŋuna aoyak a ŋamoru a ŋuna enyaritae Rubi, adukokini ayoŋ ŋipukei kon a ŋamoru a ŋuna amilimilak ka adukokini ŋarwatatain kon a ŋamoru a ŋuna epol egyelit.

¹³ Itatami Ekapolon ŋituŋa kon daadaŋ ka ebarete ŋituŋa kon nooi.

¹⁴ Iyakaun iyoŋ irae ŋolo ijok aŋuna ka akiyookino, nyikisicanio nabo iyoŋ, anerae emam ŋini ikitukuryani iyoŋ; Elemaryo ekabule aneni kon, anerae nyeapuuni neni kon.

¹⁵ Ani kikitijik iyoŋ ituŋanan idio, toyeni iyoŋ atemar meere ayoŋ eyakuunit iŋes ituŋanan daadaŋ ŋini elosikini akitijikin iyoŋ, ebuni bon akimorikin ka iyoŋ.

¹⁶ Topupok, erae ayoŋ asubuni eketyakan ŋasuwa, ayoŋ ayaunit ekuwuam ŋolo itule akim, ido neni kaŋ ebunitor aosou ŋina itiyaunere ibore ŋinijiet ŋini itemokino akitiyaa ŋuna itiyaunitere adau daŋ ayoŋ asubun ekenyasan, akitiya ŋuna aronok.

¹⁷ Mam eborosit a ejie ŋolo ikimanitere iyoŋ ŋolo epedori akiwan iyoŋ, ilouni iyoŋ aloikiiko daadaŋ ŋulu ikisitakinito iyoŋ. Erae ŋun ŋajokisya ŋuna eryamunete ŋiketiyak a Ekapolon ka erae ŋun ŋuna isiyookinito ŋuna alimu ayoŋ.”