Isa. 50 - Ebaibul

¹ Alimu Ekapolon ŋakiro nu, “Ai eyai abaruwa ŋina alakitor ayoŋ toto kus? Kori alu alotuŋa ŋulu etiŋito ŋisiliŋa kaŋ abu ayoŋ okogyelak iyes? Mam, erae aŋuna a ŋasecisya kus iŋes aponere ikigyelar iyes ka eritaryo toto kus aŋuna a ŋaronisya kus.

² Kaanukiro amamukar idiotuŋanan apaki ŋina abunio ayoŋ? Kaanukiro pa aboŋokinio ayoŋ ituŋanan apaki ŋina anyarar ayoŋ? Emam mono ayoŋ apedor ŋina akalakunia iyes a? Kori emam mono ayoŋ apedor ŋina akaiunia iyes a? Kalimu ayoŋ akirot eoni anam, eturuwori ayoŋ ŋaŋololin aonite; etobosuni ayoŋ ŋikolya ŋulu eya tooma kec aŋuna icanakinotor ŋakipi idio totwaka aŋuna ka akure.

³ Ayoŋ esiryoni kidiama totakan esibit igworo aŋuna a ŋikatwak.”

Akitiditeuno ka Akisiyookino a eketiyan ka Akuj

⁴ Akainaki Ekapolon Akuj ayoŋ apedor ŋinakitatamet ikwapei eketataman, ikotere apedorya akisirworiunia ŋulu apapanut anakiyar kec. Aŋinataparacu eketonyoununui iŋes ayoŋ, akainanakini iŋes ayoŋ akitemokin akiirar ŋakiro ikwa ŋulu itatamyo.

⁵ Aŋaa Ekapolon Akuj ŋaki kaŋ ka abu ayoŋ nyaruwor ekaŋeron ŋakiro keŋ, abu ayoŋ nyaboŋo aneni keŋ.

⁶ Abu ayoŋ oinak akau kaŋ neni a ŋulu ekebuŋaete ayoŋ ka ŋikelyo kaŋ neni a ŋulu arusete epenek kaŋ; nyiwua ayoŋ ereet kaŋ aneni a ŋulu ekeyenyete ka ekemwaanakinete ayoŋ.

⁷ Ekeŋarakinit Ekapolon Akuj ayoŋ; aŋun, emam ajokis alemar aneni kaŋ, aŋun, emam akuryanu eyai loreet kaŋ, ido ayeni ayoŋ atemar nyekesurumyo ayoŋ ŋileec,

⁸ eapi ŋolo eketuruwori ayoŋ ŋolo eyookino. Ŋae eketidiŋi ayoŋ? Emaikina ŋul ekesitakis ayoŋ kaapei. Ataŋae erae ŋimoe kaŋ? Emaikina ikes eketoŋoa ayoŋ.

⁹ Ekapolon Akuj iŋes ekeŋarakinit ayoŋ; ŋae epedori alimun atemar asecit ayoŋ? Enyamunosi ikes daadaŋ lopite ŋolo enyamunor elou; irikari ekurut ikes.

¹⁰ Ŋae alokidiŋ kus itopoloorit Ekapolon ka ŋini iwuapit ŋakiro a eketiyan keŋ? Ŋae elosi anakiryonut ka ŋini emamukar akica? Emaikina ŋin kikinyom ekiro ŋolo a Ekapolon ka toyarikinite neni ka Akuj keŋ?

¹¹ Nai irae iyes daadaŋ ŋulu itukosi amunyar ŋuluce, ikimunyarete iyes ŋakiro ŋunapei itukete iyes ŋikulepek. Ŋakiro nu ikes iryamunete aneni kaŋ a Ekapolon; iperete iyes irae ŋulu ikisicanitae nooi.