Isa. 48 - Ebaibul

Akuj akasuban ka akalakunan

¹ “Kiirasi ŋakiro nu okoe ŋiletok a Yakob ŋulu ikinyaritae a ekiro a Isirael ka ŋulu irae ŋulu anateker a Yuda, iyes ŋulu ikoŋete a ekiro ke Ekapolon ka ŋulu ilipete inyarito Akuj a Isirael, nai pa irworosi ŋuna a kire kori pa iyookino;

² anerae inyarasi iyes atemar irae ŋituŋa a etaun a ŋolo asegan, ido iyarikinito neni ka Akuj a Isirael a ŋina erae ekiro keŋ Ekapolon ŋolo a ŋajoresyo.

³ “Abu ayoŋ koloŋ sek olimo ŋakiro ŋuna aris kelunyar, abu ayoŋ olimu ŋakiro ŋun, eteyenik ikes lotuŋa. Ekaku, abu ayoŋ etiyak ŋakiro ŋun, ido apotu totakanut.

⁴ Aŋuna ayenia ayoŋ atemar irubakinito iyes isyaaka ka egogoŋ ŋakyes kus ka ilerito ŋireetin kus ikwa eburonis,

⁵ Abu ayoŋ okolimok iyes ŋakiro ŋun koloŋ sek, abu ayoŋ eserau ŋakiro ŋun neni kus eriŋa nyitiyakina, ikotere nai iyes nyitemasi, ‘Erae etorube a akuj kaŋ etiyakini ŋakiro ŋun, erae etorube ŋolo ecieunit ayoŋ a akitoe ka ŋolo etiyaunit ayoŋ a asuwat ikes etiyakis ŋakiro ŋun.’

⁶ “Idaut iyes akiirar ka akiŋolikin ŋun daadaŋ, nyipedorete tokona iyes alimor ŋakiro ŋun a? Ameun tokona ekesiirari ayoŋ iyes ŋakiro ŋunakitet, ŋakiro ŋuna sek ewuaitae, ŋuna nyeyenuna iyes.

⁷ Esyakis ŋakiro ŋun tokona, pa esyakinete koloŋ sek eriŋa nyedoluno akoloŋit na, pa iirarito iyes ŋakiro nu, aŋun, pa ipedorito iyes alimun ebe, ‘Aris ayoŋ kayenu ŋakiro nu.’

⁸ Pa iirarito iyes ŋun ekiŋaren, pa iyenunito iyes ŋun ekiŋaren, ŋinapei koloŋ agolol ŋaki kus. Etiyae ayoŋ ŋun, anerae ayeni ayoŋ atemar iruwor iyes ŋulu nyikikinyomitae ka ŋikaŋerok ŋinapei anakoloŋit a ŋina ikidounere.

⁹ “Aŋuna a ekiro kaŋ, nyaŋoi ayoŋ atipei, aŋuna ka akipuro ayoŋ, nyayauni ayoŋ anyunyura kaŋ neni kus, ikotere nyakamunya ayoŋ iyes.

¹⁰ Topupokisi, eketojoku ayoŋ iyes nai meere ikwa esilipa; ekekatak ayoŋ iyes anakimyekin ŋimoe ikisican iyes.

¹¹ Etiya ayoŋ ŋun aŋuna kaŋ a elope, anerae kaanukiro ejamuwaritere ekiro kaŋ? Nyainakini ayoŋ apolou kaŋ neni a ice.

¹² Kiirasi ŋakiro kaŋ okoe ŋiletok a Yakob, iyes Ŋisirael ŋulu abu ayoŋ onyarau, arae ayoŋ iŋes; arae ayoŋ ŋina eŋarenon ka arae ayoŋ ŋina esidyon.

¹³ Arae ayoŋ asubuni akisyakinet a akwap, ayoŋ apetakini kidiama. Ani kanyara ayoŋ akwap ka kidiama epote ikes neni kaŋ.

¹⁴ “Tocunakinos iyes daadaŋ, ido kiirasi, Ŋae adio anakujo abu tolimu ŋakiro nu? Emina Ekapolon eseuna keŋ, ebuni eseuna ŋol akisiyookin acamit a Ekapolon alo Babilon, eremokin Ekapolon a apedor keŋ Ŋibabiloniyae.

¹⁵ Ayoŋ abu olimu ŋun ka ayoŋ adau anyaraun eseuna ŋol, ayau ayoŋ iŋes ka itiyae ejok anakiro a ŋuna itiyae.

¹⁶ Potu diyete kaŋ, kiirasi ŋakiro nu! Ŋinapei anakisyakinet nyirworo ayoŋ anakimunono, ayai ayoŋ ŋinapei anakisyakinet. Ekeyaku tokona ayoŋ Ekapolon kaapei ka etau keŋ.”

¹⁷ Alimu Ekapolon ekalakunan kus, Akuj ŋina asegan ŋina a Isirael ebe, “Arae ayoŋ Ekapolon Akuj kus, ŋina eketatami iyes aŋuna ka ajokis kus a ŋikulepek, ŋina akarikit iyes alorotin a ŋulu emaikina iyes kiwuapa.

¹⁸ Okoe, kerae ca kiwuapito iyes ŋakiciketa kaŋ, keropiunito ŋarereŋisyo neni kus ikwa ŋakipi ŋuna eleleete anaŋolol a ŋina nyeonene, kikiropikinito iyes akilounun ŋimoe kus lopite ŋolo eropiyoto ŋikaguragurae a ŋakipi ananam.

¹⁹ Kelalak ŋidwe kus ikwa asinyon ka kelalak ŋiletok kus lopite ŋolo eyakar asinyon; pa keŋopiya ekiro kec anakwap, kori pa kemunyara ikes alokiŋaren kaŋ.”

²⁰ Towotokisi alo Babilon, toema alo Babilon tolimosi ŋakiro ŋun ke ecelet a ŋolo ka alakara, kiserautu ŋakiro ŋun. kitodolo ŋakiro ŋun nakisaleta ka akwap, temasi iyes, “Alaku Ekapolon ŋiketiyak keŋ ŋiletok a Yakob.”

²¹ Apaki ŋina arikitor iŋes ikes analoŋisat, nyenyama ikes akure, abu iŋes kiteleleu aŋuna kec ŋakipi anataaba, abu iŋes kibel ataaba, ido tonaŋun ŋakipi anataaba.

²² Alimu Ekapolon ebe, “Mam ekisil aŋuna a ŋituŋa a ŋulu itiyaete ŋuna aronok.”