Isa. 42 - Ebaibul

Eketiyan a Ekapolon, akica ŋina a ŋakwapin

¹ “Eketiyan kaŋ lo ŋolo etogogoŋit ayoŋ, eseuna kaŋ, ŋolo elelyakinit etau kaŋ. Ewuak ayoŋ etau kaŋ neni keŋ; eyauni iŋes akiyookino lotuŋa a ŋakwapin.

² Mam ŋiworouni iŋes, kori nyeceluni, kori nyiiraryo iŋes ecela alorotin a ŋulu ke etaun,

³ nyebili iŋes ateteleit ŋina sek ekudokina, nyituduŋe iŋes ausi ŋina sek enyipinyipi; eyauni iŋes akiyookino anakikinyoma.

⁴ Nyilelenyi iŋes, kori nyilounio iŋes akitodol ŋina eyaunia iŋes akiyookino nakwap; idarito ŋituŋa ŋulu iboiyete alodiyete anam iŋes yau akitatam keŋ.

⁵ “Alimu Akuj, Ekapolon ŋakiro nu atemar, Ŋae asubuni kidiama, ido topetak ariwo? Ŋae apetakini akwap ka etolomuni ibore ŋini elomunit anakwap? Ŋae einanakini ekieŋanu neni a ŋituŋa a ŋulu iboiyete anakwap ka neni a ibore a daadaŋ a ŋini elosi anakwap?

⁶ Arae ayoŋ Ekapolon, akanyarau ayoŋ iyes anakiyookino, ikiriit ayoŋ ka iyes, ekeurya iyes; iyoŋ iruwuor acamunet kaŋ ka ŋituŋa, iyoŋ iruwor akica a ŋituŋa a ŋakwapin,

⁷ ikotere itekyenyunete ŋakonyen a ŋulu emudukaka, ikotere ilakunete ŋienan ŋulu iboiyete anakiryonut.

⁸ Arae ayoŋ Ekapolon, ekiro kaŋ ŋol; nyainakini ayoŋ apolou kaŋ neni a ice, kori akipuro kaŋ neni a ŋakujo.

⁹ Kiirasi, alunyarosi ŋakiro ŋuna ŋorok, erworo tokona ayoŋ ŋakiro ŋunakitet; ani eriŋa ŋakiro ŋun nyetakanuna, akalimokini ayoŋ iyes ikes.”

Eete ŋolo ka akipuro

¹⁰ Toeikisi eete ŋolokitete neni ke Ekapolon, toeikisi ipurosi iŋes anakisaleta ka akwap. Iyes ŋulu ilosete ananam kipuro Ekapolon, iyes ŋisubuna daadaŋ ŋulu iyarete alotooma anam kipuro Ekapolon, iyes ŋituŋa ŋulu iboiyete alodiyete anam kipuro Ekapolon.

¹¹ Emaikina ŋaloŋisae ka ŋituŋa ŋulu iboiyete alotaunio a ŋulu eya naloŋisat tocelut ipurosi Ekapolon, ŋituŋa ŋulu iboiyete alo Kedar kipuro Ekapolon, emaikina ŋituŋa ŋulu iboiyete alo Sela toeikis ka alelyanu, emaikina ikes tocelut alokidiama ŋimoru.

¹² Emaikina ikes kitopoloosi Ekapolon, kipuro iŋes anakwapin a ŋuna alodiyete anam.

¹³ Elosi Ekapolon ajiore iŋarenit ikwa ekajion, isimukekini iŋes alelakinit keŋ ejie ikwa ekajion; eceluni iŋes, eceluni iŋes nooi, itoodiun iŋes erae ŋolo etiron eremokino ŋimoe keŋ.

¹⁴ Alimu Akuj atemar, “Abu ayoŋ eliliŋ apaki ŋina aoyan, abu ayoŋ eliliŋ nyatubu akitiya ŋakiro ŋadi, nai tokona, eworouni ayoŋ lopite ŋolo iworounio aberu ŋina eryeba aŋuna ka akidoun, aŋaari ayoŋ akituk, ido eeŋak aŋaami.

¹⁵ Amunaari ayoŋ ŋimoru ka ŋikamukumukui, esikwaanikini ayoŋ ŋaŋololin ka ŋiculeta, etooni ayoŋ ŋataparin.

¹⁶ Ariki ayoŋ ŋimudukanotin, etoryo ikes lorot ŋolo nyeyenete, omekinia ŋirotin ŋulu sek nyemekinito, eteni ayoŋ ikes. Elocokini ayoŋ akiryonut alokiŋaren kec toruwor akica, elelyaari ayoŋ ŋakiboisyo ŋuna sek esagam. Ŋakiro ŋun ikes etiyakini ayoŋ, ido nyemyekini ayoŋ akitiya ŋun.

¹⁷ Nai ikes ŋulu ikinyomito neni a ŋakujo, ŋulu irworosi neni a ŋakujo ebasi, ‘Irae iyes ŋakujo kosi,’ isurumyo ikes ŋileec nooi.

¹⁸ “Kiirasi iyes ŋulu ikiŋimaka; kirereosi kidiama kiŋolikis iyes ŋulu imudukaka!

¹⁹ Ŋae emudukana, mati eketiyan kaŋ? Kori ekiŋimana ikwaan ka eketiyan kaŋ ŋolo eyakit ayoŋ? Ŋae emudukana ikwaan ka ŋolo einakina aŋuna kaŋ, kori emudukana ikwaan ka eketiyan ŋolo a Ekapolon?

²⁰ Iŋolyanakini iŋes ŋiboro ŋulu alalak, nai nyemitakinit, epupete ŋaki keŋ, nai nyiiranari ŋakiro.”

Aŋerit a ŋituŋa a Isirael ŋakiro ka Akuj

²¹ Abu Ekapolon tolakar aŋuna a ŋituŋa keŋ a ŋulu eyookino, abu iŋes kitopoloo nooi ŋikisila keŋ ka ŋakitatameta keŋ.

²² Nai arae ŋituŋa keŋ ŋulu akokoiyaritae ka aŋataritae, arae ikes daadaŋ ŋulu agolokinitoe napanya ka ewuaitae alojerae; apotu ikes toruwor akimuj a ŋityaŋ todaun ŋini eiuni, apotu ikes toruwor ŋiŋatanara todaun ŋini etemari, “Kinyakasi ikes.”

²³ Ŋae alokidiŋ kus emitakini ŋakiro ŋun, ŋae epedori acamun ka apupokin aŋuna ka apaki a ŋina ebuni?

²⁴ Ŋae epotokini ŋiletok a Yakob neni a ŋikenyasak ka ŋae epotokini ŋiletok a Isirael neni a ŋikademanarak? Pa mono arae Ekapolon ŋolo aponi iwon tosecae neni keŋ a? Ekapolon ŋolo apotu ikes toŋero akiwuap ŋakiro keŋ ka ŋolo apotu ikes nyiwuapa ŋikisila keŋ a?

²⁵ Ŋakiro ŋun ikes ainakinete iŋes anyunyurikin iwon nooi ka akiteryenyaanikin ŋimoe alojie; apotu ŋakiro ŋun inakis iŋes akiteryenyaanikin iwon ŋimoe alowaetin a daadaŋ, nai aponi iwon nyeyenun ŋun; apotu ŋun ikimunyasi iwon, nai aponi iwon nyeyenun ŋadi daŋ.