Isa. 40 - Ebaibul

Kisirworiunae ŋituŋa ŋulu ka Akuj

¹ Irworo Akuj kus ŋakiro nu: Kisirworiutu, okoe kisirworiutu ŋituŋa kaŋ.

² Kirworo irimaaka neni a ŋituŋa a Yerusalem, kiserata ŋakiro neni a ŋituŋa keŋ, tolimokisi ikes atemar erikakin ŋakiro ŋuna atyonok ŋuna sek etiyaete ikes, tolimokis ikes atemar ataci ŋuna sek adikino ikisicanere, tolimokis ikes atemar adaun akisican iyes anapedor a Ekapolon a ŋina apolon aŋuna a ŋasecisya kus daadaŋ.

³ Iworoe etoil a ituŋanan a ice analoŋisat ebala: “Kitemonokisi erot ŋolo ke Ekapolon analoŋisat, kisidiiryata analoŋisat erot aŋuna ka Akuj yok.

⁴ Itemokino ŋakadipaalae daadaŋ kitiriyanae, itemokino ŋimoru ka ŋikamukumukui daadaŋ tobwaŋabwaŋae; itemokino nenimukur todipal iwace kitiriyanae, itemokino ŋakiboisyo ŋuna esagam kitusulutae.

⁵ Ekaku aŋun, itoodiunio nai apolou a Ekapolon ka iŋolikinete ŋituŋa daadaŋ kaapei, anerae adau Ekapolon alimun ŋun.”

⁶ Irworo etoil ebala, “Kiserau!” Eŋit ayoŋ otema, “Anukiro emaikina ayoŋ eserau?” “Kiserau atemar ikote ŋituŋa daadaŋ ŋinya, ikoni akecekibuses daadaŋ ŋatur ŋuna ka ariet.

⁷ Einiyarete ŋinya, ido toraraun ŋatur, itiyakin ŋun apaki ŋina iyakuunia Ekapolon ekuwuam tokutak ikes; kire jik, edaunun ŋituŋa ikwa ŋinya.

⁸ Einiyarete ŋinya, ido toraraun ŋatur; nai erubakini akirot ŋina ke Ekapolon jik.”

⁹ Okoe ŋituŋa a Sion, toloto lomoru ŋulu aoyak, kiserata a nen ŋakiro ŋuna ajokak, tocelutu a ŋitoilon a ŋulu apolok, okoe ŋituŋa a Yerusalem, kiserata ŋakiro ŋuna ajokak, tolimosi ŋakiro ŋun, nyikuryaketa. Tolimokisi ŋituŋa ŋulu iboiyete alotaunio a Yudaya ebe, “Eyai Akuj kus ne.”

¹⁰ Kiirasi, ebunit Ekapolon Akuj ka apedor, ipukat iŋes a apedor keŋ, kiirasi, eyaunit iŋes ŋituŋa ŋulu adau iŋes aiun, eyakasi kiŋaren keŋ ŋituŋa ŋulu adau iŋes aiun.

¹¹ Ebuni iŋes akitan ŋituŋa keŋ lopite ŋolo itania ekeyokon ŋamesekin keŋ; edaki iŋes ŋikaalei ŋulucicik anakan keŋ, kiwuak ikes natorobu keŋ; ido tomea iyaparit atatoto a ŋikaalei a ŋul.

¹² Ŋae epedori akipim ŋakipi a anam a akan keŋ, kori akipim kidiama a akan keŋ? Ŋae epedori akiwuakin ŋalup a akwap daadaŋ nakan keŋ, kori akipim apotis a ŋimoru ka ŋikamukumukui a aratil?

¹³ Ŋae ayenu ŋatameta ŋuna ke Ekapolon, kori ŋae epedori akitatam Ekapolon, ŋae erae ekeŋarakiniton keŋ?

¹⁴ Ŋae abu Ekapolon kiŋit ŋakiro ŋadi aŋuna ka ayenunia ŋakiro, ŋae abu kitatam iŋes epite ŋolo emaikina kitiyaa iyookino? Ŋae abu kitatam ŋuna ka aosou, ŋae abu kitatam iŋes epite ŋolo eyenunia ŋakiro?

¹⁵ Aneni ke Ekapolon, ikote ŋakwapin akilimasit a akiru apei; iteo ikes ikwaan ka apuwa ŋina nyinuwari akilo; kiirasi, ikwaan aneni keŋ ŋiculeta ka apuwa.

¹⁶ Nyepedorete ŋakito a amoni a Lebanon akitemokin akinokia akim, kori nyitemokin tari ŋityaŋ a amoni a Lebanon aŋuna a ŋamuronisya a ŋuna epeyo.

¹⁷ Erae ŋakwapin daadaŋ ŋakoŋinae alokiŋaren Ekapolon, aneni keŋ erae ikes daadaŋ ŋakoŋinae, mam ibore eyai tooma kec.

¹⁸ Anibore nai isikwaanikineta iyes Akuj, kori anibore eyakatar ŋasima keŋ?

¹⁹ Nyikwaan iŋes ka etorube a akuj a ŋina itiyaunio tosipokinae, ido bu eketiyan egolid toburusik egolid kidiama keŋ ka kitanapik ŋiriko ŋulu itiyaunitae a esilipa.

²⁰ Ikwapei ainakinet, eseuni ituŋanan akitoe ŋina agogoŋon, akitoe ŋina nyipirenene, tosodi nai kiwararya ituŋanan ŋini epiiryana nakicere ŋiboro, kiceu ŋin ibore ŋini anikesipokin nyimasar jik.

²¹ Nyeyenuna iyes a? Nyiirara iyes a? Nyelimokina iyes ŋakiro ŋinapei anakisyakinet akwap a? Nyeyenuna iyes ŋakiro ŋinapei etiyaunere akwap a?

²² Erae ŋolo iboi alokicoloŋ keŋ a ŋolo eyai kidiama akwap ka kidiama ariwo iŋes asubuni akwap. Ite iŋes alokidiama ŋituŋa esibito ŋabeerei; iŋes abu topeta kidiama ikwa anaŋga, topeta iŋes lopite ŋolo igurorere eema, ikotere iboikinoi tooma.

²³ Ituruwonori iŋes ŋirwosi ŋikoŋinae, ituruwonori ŋikepukak a ŋakwapin ŋicaryo.

²⁴ Ikwaan ŋikepukak ŋul ka ŋikito ŋulu ariŋa edupakinio ikwaan ikes ka ŋikinyom ŋulu ariŋa eekinio tolomut, ani apaki ŋinapei eremoryata ikes ŋataagor kwap, eyauni Ekapolon ekuwuam neni kec, ido kitiiniya, tosodi ani ekutuni ekuwuam ŋolo ipiripiri, kiwok ikes ikwa ŋamilo.

²⁵ Ebala Ekapolon ŋolo asegan ebe, “Ŋae nai tokona ikisikwaanikineta iyes ayoŋ? Kori ŋae ikiriyan ka ayoŋ?

²⁶ Kireosi kidiama kiŋolikis neni ikoni. Ŋae asubuni ŋiboorei daadaŋ ŋulu eya kidiama? Erae Akuj ŋina iwuakinit ikes esibit ŋajoresyo ka eyeni ekimar kec, enyarit ikes daadaŋ a ŋirorwa kec; anerae egogoŋ iŋes nooi, eyakar apedor ŋina etiron, mam ibore ipei daŋ ŋini icana iŋes.

²⁷ “Kaanukiro ibaakatar iyes okoe ŋituŋa a Yakob ka irworotor iyes okoe Ŋisirael ebe, ‘Nyeyeni Ekapolon ŋakiro kosi, kori nyemisit Akuj kosi ŋakiro kosi’?

²⁸ Nyeyenuna iyes a? Nyiirara iyes a? Erae Ekapolon Akuj ŋina a ŋikaru ka ŋikaru, ekasuban akwap ka ŋinibore eyai nakwap. Nyilelenyenene iŋes, kori nyeupenene; mam ituŋanan epedori ayenun ŋuna eyeni iŋes.

²⁹ Einanakini epedor neni a ŋulu eleleny, einanakini agogoŋu neni a ŋulu emam apedor.

³⁰ Epedori akileleny ka akiup ŋisorok, eupi nooi tari ŋidwe ŋulu cicik;

³¹ nai ŋulu idarito Ekapolon, isikiteteunete agogoŋu kec, epororete kidiama a ŋabebenuk ikwa ŋigolei, ekerete, ido nyeupi, elosete, ido nyilelenyi.”