Isa. 4 - Ebaibul

¹ Akoloŋit ŋin, ikamunete ŋaberu ŋakanikaarei ekile epei temasi, “Ikimuji isua akimuj kosi a ŋilopeyek ka ikinapi ŋilowi kosi a ŋilopeyek, nai tocamu itonyarae isua ŋaberu kon, ikotere elemarotor ŋileec kosi.”

Ajokis a ŋipiya a Sion ŋina ebuni

² Akoloŋit ŋin, idodouni ateni ŋina ke Ekapolon kibusyar ka tojokyar nooi, ido ejokyata nooi ŋaraito ŋuna ka akwap, kibusyata nooi aŋuna a ŋipiya a Isirael.

³ Ituŋanan daadaŋ ŋini eesikinio alo Sion, ido torubak iboi alo Yerusalem daadaŋ ŋulu igiritae aneni a ŋulu iboiyete alo Yerusalem enyarao iŋes ŋini asegan,

⁴ Ani kedau Ekapolon akitesegun ŋaberu ŋuna a Sion anasiilyo kec, italeuni ikes anakiar ŋituŋa alo Yerusalem. Italeuni iŋes ikes a etau a ŋolo etubere ŋakiro ka a etau a ŋolo ka akim.

⁵ Iwuakini nai Ekapolon edou ka apuru naparan ta akica a akim a ŋina enepi nakwaare kidiama emoru Sion ka kidiama ŋakiboisyo daadaŋ ŋuna ecunanakin ŋituŋa. Kire, erapuwari Ekapolon etaun keŋ daadaŋ.

⁶ Eyakaun ibore ŋini erapuwarit etaun ŋin esibit eripipi, imukori iŋes etaun naparan anamwanis a akoloŋ ka eruwor neni iunor ta neni ilomari ebuni ekuwuam ŋolo agogoŋon ka akiru.