Isa. 38 - Ebaibul

Todyakakin Esekia

¹ Ŋirwa ŋul, abu Esekia todyakakin edeke ŋolo adikino eari. Tolot ekadwaran Isaya lokoku ka Amos neni keŋ tema, “Ebala Ekapolon kitemonokin, anerae ilosi iyoŋ atwanare, nyiŋaleuni iyoŋ anadyaka kon.”

² Toboboŋiyo Esekia narwatata kilip neni ke Ekapolon tema,

³ “Okoe Ekapolon, totamunite epite ŋolo ekekinyomitor ayoŋ iyoŋ a etau kaŋ a daadaŋ ka epite ŋolo etiyator ayoŋ neni kon ejok.” Kigwor Esekia nooi.

⁴ Abu nai Ekapolon kirwor neni ka Isaya tema,

⁵ “Tolot tolimok Esekia atemar alimu Ekapolon Akuj a papaa kon a Daudi ebe, ‘Adau ayoŋ akiirar akigworo kon ka eŋolik ŋakiyo kon eyatakini ayoŋ nakiyar kon ŋikaru ŋice ŋitomon ka ŋikan.

⁶ Akalakuni ayoŋ iyoŋ ka etaun lo anapedor a erwosit ka Asiriya, euryari ayoŋ etaun lo.

⁷ “‘Erae na akitoodikinet neni kon aneni ke Ekapolon atemar itiyakini Ekapolon ŋakiro nu ŋuna adau iŋes akiikin.

⁸ Kiira, emyekini ayoŋ etolim a ŋadoketa a ŋuna edukit Aas, etolim ŋolo itatakanunit akoloŋ ŋina adoiyoron toboŋo kaku ŋikilames ŋitomon.’ ” Aŋun abu etolim toboŋo kidiama ŋikilames ŋitomon akilo neni sek arisyo kewaiya kwap.

⁹ Ŋakiro ŋuna abu Esekia erwosit ŋolo a Yudaya kigir kedau adyaka ka aŋaleun ikes nu:

¹⁰ Abu ayoŋ otema, “Atamak ayoŋ atemar anapakio aŋuna ka asoroko kaŋ, emaikina ayoŋ oŋopiya; adaun ayoŋ akipotokin nakibois a ŋikatwak, ŋirwa ŋulu ka akiyar kaŋ daadaŋ.”

¹¹ Abu ayoŋ otema, “Nyeŋolikini nabo ayoŋ Ekapolon anakwap a ŋulu eyarete; nyeŋolikini nabo ayoŋ ŋituŋa jik, kori nyikiruki nabo jik ayoŋ ka ŋituŋa ŋulu iboiyete anakwap.

¹² Alemar neni sek eboiyo ayoŋ, alemar iŋes aneni kaŋ lopite ŋolo editarere eema a ekeyokon. adau ayoŋ alemar akiyar kaŋ, lopite ŋolo etuborya ekadonyon eusi aneni sek itukakinitae; adau Ekapolon alemar ayoŋ aneni sek emaikina ayai; isiyosi Ekapolon akitasalun akiyar kaŋ jwi jwi.

¹³ Egworo ayoŋ eŋita akiŋarakino akitodol ŋina iwalarya akwap, abilibiliya Ekapolon ŋakoyo kaŋ lopite ŋolo ebilibiliya eŋatuny ŋakoyo; isiyosi Ekapolon akitasalun akiyar kaŋ jwi jwi.

¹⁴ “Eoroonor ayoŋ aditiyar etoil kaŋ ka apalagag egworo ayoŋ lopite ŋolo erwor akuri. Aup ŋakonyen kaŋ akireorit kidiama. Okoe Ekapolon, ekesicanitae ayoŋ, toruwor ekeuryaran kaŋ.

¹⁵ Nai anukiro tokona alimuni ayoŋ? Anerae adau iŋes akirwor neni kaŋ, iŋes elope adau akitiya nu neni kaŋ. Adaun ŋajo aneni kaŋ aŋuna ka apodo a ŋina eyai lotau kaŋ.

¹⁶ “Okoe Ekapolon, eyarete ŋituŋa tari anakiro a ŋuna ikote nu, etau kaŋ daŋ eyai napodo ŋina ikoni ŋin. Okoe kitaŋaleunoe ayoŋ ka kituruworoe ayoŋ ŋolo apedori akiyar.

¹⁷ Kire, arae aŋuna ka alakara kaŋ iŋes ayakar ayoŋ apodo ŋina apolon; nai ibu iyoŋ nyikimyek ayoŋ otwana oloma nakipany ŋina ka akinyasuno, anerae imana iyoŋ ŋasecisya kaŋ daadaŋ kau kon.

¹⁸ Nyepedorete ŋituŋa ŋulu eya nakibois ŋina a ŋikatwak alakar neni kon, nyepedorete ŋulu etwakito akipuro iyoŋ; nyepedorete ŋulu alomasi nakipany akigeno neni kon aŋuna ka akikinyoma kon.

¹⁹ Ŋituŋa ŋulu eyarete ikes epedorete alakar neni kon, lopite ŋolo eketalakaritor ayoŋ iyoŋ nakoloŋit na; iteyenanakinete ŋikauruunak ŋidwe kec akikinyoma kon.

²⁰ “Akaiuni Ekapolon ayoŋ, ido ikieikini isua ŋun isitiyao ŋiboro ŋulu a ŋaunoi ŋulu eore, itiyao isua ŋun ŋirwa daadaŋ ŋulu ka akiyar kosi, itiyao isua ŋun alo Kai ke Ekapolon.”

²¹ Keris sek Isaya kelimu ebe, “Tolemutu ŋaboboryo ŋuna erukitoe, kiwasakis lolepunoit a Esekia, ikotere iŋes eŋaleuni.”

²² Keris sek Esekia daŋ kelimu ebe, “Ani kitoodikinet ekesileerekini ayoŋ atemar etipeiyori ayoŋ Kai ke Ekapolon?”