Isa. 36 - Ebaibul

Kitubul Senakerib Yerusalem

¹ Alokaru a ŋolo a ŋitomon ka ŋiomwon ipukat erwosit Esekia Yudaya, abu Senakerib erwosit ka Asiriya torem ŋitaunio daadaŋ alo Yudaya ŋulu adukitoe ŋaduketa ŋunajiet ka abu kikama ikes.

² Abu erwosit ka Asiriya kiyakiya alo Lakis ekapolon a ŋasigarya keŋ ka ŋasigarya ŋuna alalak neni a erwosit Esekia a ŋolo a Yerusalem. Abu ekapolon ŋol tolot towo alodiyete akitelosit a abwal a ŋina alokidiama, alorot a ŋolo elosere neni adonyere ŋilowi.

³ Bu neni keŋ Eliakim lokoku ka Ilikia, ŋolo apolokinit ŋiticisyo alokai ka apukan, arukito iŋes ka Sebina ekegirigiran ta Yoa lokoku ka Asap, ŋolo apolokinit ŋakiro ŋuna igiritae.

⁴ Tolimok ekapolon a ŋasigarya ka Asiriya ikes tema, “Tolimokisi Esekia ebe, ‘Alimu erwosit ŋolo apolon, erwosit ŋolo ka Asiriya atemar ŋae mono ikinyomit iyoŋ anakituro kon?

⁵ Itami iyoŋ atemar erae ŋakiro koŋin isiyookinete ŋuna itami iyoŋ ka agogoŋu alojie a? Ŋae tokona ikinyomit iyoŋ, ikiŋeryo iyoŋ ayoŋ ikimanit?

⁶ Topupok, ikinyomit iyoŋ ŋituŋa a Ijipit, ŋituŋa ŋulu epalag ikwaan ka ateteleit ŋina ebilil, ŋina epedori akirem akan a ituŋanan a ŋini egwaŋakin iŋes. Ikoni Parao erwosit a Ijipit nen aneni a ŋulu ikinyomito iŋes.’

⁷ Nai ani kibala iyoŋ neni kaŋ ebe, ‘Ikikinyomit isua Ekapolon Akuj kosi,’ meere mono ŋakiboisyo keŋ ŋuna aya nenimukur ka ŋamuroeta keŋ ikes abu Esekia tobwaŋabwaŋa ebala neni a ŋituŋa a Yudaya ka Yerusalem ebe, ‘Emaikina iyes kilipa alokiŋaren namuroet na a?’

⁸ Bua tokona, kirworiutu ka ekapolon kaŋ erwosit ka Asiriya. Akainakini ayoŋ iyoŋ ŋaŋolei ŋalipyo ŋaarei kipedori iyoŋ elope aryamun ŋulu emeete ŋaŋolei ŋun.

⁹ Ikokini nai iyoŋ ipedori akiloun ekapolon epei ŋolo edit anapolou aneni a ŋikapolok a ŋulu a ekapolon kaŋ, erae kikinyomit iyoŋ Ijipit aŋuna a ŋaŋolei ka ŋikametok ŋaŋolei ai?

¹⁰ Ŋace nu, abunit mono ayoŋ akirem akwap na ka amunaar pa ikirukit ka Ekapolon a? Abu Ekapolon okolimok ayoŋ atemar ape kitipeiyo nakwap na ka tomunaa iŋes.”

¹¹ Apotu nai Eliakim, Sebina ka Yoa tolimokis ekapolokiniton a ŋasigarya ka Asiriya temasi, “Ikilipit isua iyoŋ, kirwor a ŋaramaik neni kosi a ŋiketiyak kon, anerae ikiyeni isua aŋajep ŋin, nyirwor neni kosi a ŋajep a ŋituŋa a Yudaya epupete ŋituŋa ŋulu edokito arwatata.”

¹² Nai tema ekapolokiniton a ŋasigarya ka Asiriya neni kec, “Itamete iyes ekeyakuunit ayoŋ ekapolon kaŋ alimokin ŋakiro nu neni a erwosit kus ka neni kus nai meere neni a ŋituŋa a ŋulu iboiyete alokidiama arwatata, a ŋulu ebukoritae kaapei ka iyes akinyam ŋacin kec ka akimat ŋakul kec a?”

¹³ Abu nai ekapolokiniton a ŋasigarya ka Asiriya towo kirworik a etoil a ŋolo apolon aŋajep a ŋituŋa a Yudaya, “Kiirasi ŋakiro a erwosit a ŋolo apolon, a erwosit ka Asiriya!”

¹⁴ Alimu erwosit ebe, “Nyimyekis Esekia ikimodikini iyes, anerae nyepedori iŋes alakun iyes.

¹⁵ Nyimyekis Esekia ikisikinyomi iyes Ekapolon ebala, ‘Kire jik ikilakuni Ekapolon iwon, nyipotokinio etaun lo napedor a erwosit ka Asiriya.’

¹⁶ Nyipupokis ŋakiro a Esekia, anerae ebala erwosit ka Asiriya, ‘Tocamutu ekisil ka ayoŋ, ido potu neni kaŋ, epedori nai ŋinituŋanan kus akinyam ŋaraito a epiini keŋ ka ŋaboboryo a ebobore keŋ ka akimat ŋakipi a akare keŋ,

¹⁷ akitodol ŋina abunio ayoŋ arikor iyes nakwap ŋina ikwaan ka akwap kus, akwap ŋina eya ŋikinyom ka epiini, akwap ŋina a ŋamugati ka ŋikito a epiini.

¹⁸ Nyicamut Esekia ikimodiyari iyes aŋuna irworor atemar, ikiuni Ekapolon iwon. Apotu mono ŋakujo a ŋituŋa a ŋakwapin toiut ŋituŋa kec anapedor a erwosit ka Asiriya a?

¹⁹ Ai tokona eya ŋakujo ka Amas ka Aripad? Ai eya ŋakujo a Separipaim? Aiut mono ikes Samaria anapedor kaŋ a?

²⁰ Akuj ani alotooma ŋakujo daadaŋ ŋuna a ŋakwapin abu toiu ŋituŋa a akwap keŋ anapedor kaŋ, epedorya Ekapolon aiun ŋituŋa a Yerusalem anapedor kaŋ?’”

²¹ Nai apotu Eliakim, Sebina ka Yoa kililiŋa, nyeboŋokis iŋes akirot adio, anerae ecikit erwosit ikes ebe, “Nyiboŋokis ŋakiro keŋ.”

²² Apotu nai Eliakim lokoku ka Ilikia ŋolo apolokinit ŋiticisyo alokai ka apukan ka Sebina ekegirigiran ta Yoa lokoku ka Asap ŋolo apolokinit ŋakiro ŋuna igiritae toloto neni ka Esekia ecilicilito ŋilowi kec, tolimokis iŋes ŋakiro ŋuna erworo ekapolokiniton a ŋasigarya ka Asiriya.