Isa. 35 - Ebaibul

Aboŋun a ŋituŋa a ŋulu alakunio Sion

¹ Elakar aloŋisat ka akwap neni eonit, elelyani aloŋisat ka eturouni; lopite ŋolo eturounio ecomocomo,

² eturouni aloŋisat, tolelyan elakara, ido toeik. Einakinio iŋes akibuses a Lebanon, einakinio iŋes ailiil a Karimel ka Saron. Iŋolikinete ŋituŋa a Sion apolou a Ekapolon, iŋolikinete ikes ailiil a Akuj yok.

³ Kitogogoŋo ŋakan ŋuna epalag, kitogogoŋo ŋakuŋin ŋuna emaranete.

⁴ Tolimokisi ŋulu ekuryaka alotai kec ebe, “Togogoŋ, nyikuryaketa! Ebuni Akuj kus; ebuni iŋes akinyaŋar, inyaŋi iŋes ŋakiro kus enyunyura nooi, ebuni iŋes aiun iyes.”

⁵ Eŋaaryo nai ŋakonyen a ŋimudukanotin ka eŋaaryo ŋaki a ŋikiŋimanotin;

⁶ eporete nai ŋikaŋwalak ikwa ŋatili ka eokinete ka alakara ŋulu sek ikajikajasi. Elomunete ŋakipi analoŋisat ka eleleiyarete ŋakipi anayona a ŋuna analoŋisat,

⁷ Eruwor asinyon ŋina amwanan abwal ka eruwor neni sek icana ŋakipi ŋilelyan, eruwor neni sek iboiyoto ŋikweei ŋijomya elomunete a nen ŋatetelei ka asasaki.

⁸ Eyakaun nen erot ŋolo apolon, enyarao iŋes, erot ŋolo asegan. Nyelosete ŋikasecak alorot a ŋol, nai eruwor erot ŋolo a ŋituŋa ka Akuj, mam ikaloton a nen eoliyori, nyeoliyori tari ibaŋaanot.

⁹ Mam eŋatuny eyakaun nen, kori mam etyaŋ edio ŋolo adedeŋan emekini erot ŋol; nyeryamunio ikes a nen, nai ŋulu elakunitae elosete alorot a ŋol.

¹⁰ Eboŋunete ŋituŋa ŋulu adau Ekapolon alakun, eboŋunete ikes Sion eosi, eryamunete ikes alakara ŋina a ŋikaru ka ŋikaru; eryamunete ikes alelyanu ka alakara, edaun akiyaloloŋ ka akisuta aneni kec.