Isa. 34 - Ebaibul

Atubokino a ŋituŋa a ŋakwapin

¹ Okoe ŋituŋa a ŋakwapin, toapuutu kiirasi, okoe ŋituŋa topupokisi! Emaikina akwap kiira ka ŋinibore daadaŋ eyai nakwap; emaikina akwap kiira ka ŋinibore daadaŋ ŋini elomununui alokwap.

² Eŋoikinit Ekapolon ŋituŋa a ŋakwapin a daadaŋ, elilit iŋes a ŋuna a ŋasigarya a daadaŋ aŋuna idyasito ikes; emunyari jik iŋes ikes, ido ipotori ikes tomunyarae.

³ Imasaryo kiŋa ŋituŋa kec ŋulu earyo, eremi abosis a ŋawat kec kidiama; elelearete ŋaokot kec alomoru.

⁴ Inyasunosi ŋikacer, elap ka akoloŋ alokidiama, elugurikin kidiama lopite ŋolo elugurikinere akaratas. Enyipinyipaarosi ŋikacer, elap ka akoloŋ alokidiama, lopite ŋolo einiyaryata ŋakwii alokitoe a epiini, kori lopite ŋolo einiyaryata ŋaraito a ebobore.

⁵ Kedau Ekapolon amunyar ŋiboro ŋulu alokidiama, kiŋolik atemar etemokin, kiirasi, etiyaun iŋes Edom, neni a ŋituŋa a ŋulu adau Ekapolon atubokin atemar tomunyarae.

⁶ Eyakar Ekapolon ekileŋ, ileleba ŋaokot lokileŋ ŋol, erapit arurak ekileŋ ŋol, ileleba ŋaokot a ŋikaalei a ŋulumesekin ka ŋuna a ŋamee lokileŋ ŋol, ileleba ŋaruraka a ŋiŋalur a ŋimeesekin lokileŋ ŋol, anerae eyakar Ekapolon amuronot Bosira, eari Ekapolon ŋituŋa ŋulu alalak alo Edom.

⁷ Earyo ikes kaapei ka ŋimoŋin ŋulu adedeŋak ka earyo a nen ŋitak ŋulumaaniko ka ŋimaaniko ŋulu apolok nooi. Isiinaunete ŋaokot kec ŋalup kec ka eruwor ŋalup kec ŋuna ataronok aŋuna a ŋasepwa.

⁸ Eyakar Ekapolon akoloŋit ŋina inyaŋia ŋuna itiyato ŋituŋa, eyakar Ekapolon ekaru ŋolo itiyaa ŋakiro iyookino aŋuna a ŋituŋa a Sion.

⁹ Ituruworyo ŋayona a Edom ŋuna ileleba ibore ŋini ikwaan ka ŋatotol, ituruworyo ŋalup a Edom ŋuna eriraete ikwa ibore ŋini enyaritae Sulupa; eriraunete ŋalup a Edom ikwa ŋatotol ŋuna enokete. Enoki akim a nen nakwaare ka naparan, nyepedoryo akituduŋere, eremi apuru keŋ kidiama ŋikaru ka ŋikaru.

¹⁰ Mam ituŋanan iboikin nen ananyameta a daadaŋ, mam ituŋanan itori nen ŋikaru ka ŋikaru.

¹¹ Nai eruwor nen akibois a ŋitulae ka ŋapupui; iboiyete a nen ŋitulae ka ŋikurukwa. Ituruwori Ekapolon akwap a Edom neni eburusiyarit akiguro, eruwor nen neni igerokino egurigur ka neni igerokino ekasile.

¹² Nyenyarao nabo nen akwap ŋina ipukatae, eruwor ŋikapolok keŋ ŋikoŋinae.

¹³ Erupete ŋikukwa anakais a ŋuna ka apukan, eruworosi ŋaduketa kec ŋunajiet ŋamon a ŋikukwa. Eruwor nen akibois a ŋikweei ka neni iboiyoto ŋikaleeso.

¹⁴ Iryamunun kaapei nen ŋilurei ka ŋibuin, enyaraununosi make ŋipyan a nen, ebuni ekipye ŋolo ka akuwar daŋ nen, toryamu a nen neni ieŋununia iŋes.

¹⁵ Edukete ŋitulae ŋakais kec nen, euriyete ŋabeyei kec, tobekut ka kimuko ŋicwi kec a nen. Ecunun ŋataruk nen, ŋinaberu ka ŋolokile.

¹⁶ Kiwara ka tosyoma alokitaabo a Ekapolon ŋakiro nu: Mam ipei daŋ a ŋikyeny a ŋul ŋini emamukaun, mam ŋini nyeyakaun emam ŋiniberu ka ŋinikile. Adau Ekapolon alimun ŋun ka adau etau keŋ acunun ikes.

¹⁷ Adau Ekapolon atyakanakin ikes ŋakiboisyo kec, akoranaki Ekapolon ikes ŋakiboisyo kec ipimanarit. eruwor ŋakiboisyo ŋun ŋuna kec ŋikaru ka ŋikaru, iboiyete ikes a nen ŋanyameta ka ŋanyameta.