Isa. 33 - Ebaibul

Todwarae ŋuna ka alakuno alomoe

¹ Ekaŋ iyoŋ ekenyasan, iyoŋ ŋolo emam ituŋanan abu ikimunya iyoŋ ŋolo emam ituŋanan abu itoluk! Ani ijoŋoe iyoŋ akinyas, ikinyasunio iyoŋ; ido ani ijoŋoe iyoŋ araakau ŋolo alukinon, ikilukinio iyoŋ.

² Ekapolon kitoodiu ajokis kon neni kosi, ikidarit isua iyoŋ. Toruwor agogoŋu kosi a ŋinataparacu, aiuno kosi anapaki a ŋina a ŋican.

³ Apotu ŋituŋa toema apaki ŋina icelunia iyoŋ, apotu ŋituŋa a ŋakwapin kielar alokiŋaren ailiil kon.

⁴ Aponi tocunakinae ŋiboro ŋulu aŋataritae lopite ŋolo ecunakinor emaase, apotu ŋituŋa toŋatasi ŋiboro ŋul todaun lopite ŋolo irikarya emaase ibore.

⁵ Itopolooritae Ekapolon, iboi iŋes alokidiama; elelebik iŋes Sion akitub ŋakiro anakiyookino ka elelebik akiyookino.

⁶ Iŋes ikiinakini iyes alorwa kus akiboi emam ŋace, iŋes ikiinakini iyes alakuno ŋina alalan, aosou ka ayenut; ibore ŋini iwuakinito ŋituŋa a Sion lotai kec nooi erae akitopoloorit Ekapolon.

⁷ Kiirasi, ecalasi ŋikadedeŋak alorotin a etaun; igworosi nooi ŋikiyakitono ŋulu amaikina yaut ŋakiro ŋuna ke ekisil.

⁸ Emyekin ŋirotin ŋulu apolok, emyekis ŋikalotok erot. Aŋeri ŋuna aponi tocamunetei, ajamuwar ŋuna ekoŋitoe anacamuneta aŋun, nyiwuapitae ŋuna amaikina kiwuapae anacamuneta a ŋun.

⁹ Igworo akwap ka aruwor akoŋinait; eruma ŋileec Lebanon ka ainiyasi ŋikito keŋ; ekwaanikin Saron ka aloŋisat; araraar ŋakwii alokito a ŋulu a Basan ka Karimel.

¹⁰ Irworo Ekapolon ebala, “Anyouni tokona ayoŋ, eketuruworyo tokona ayoŋ Ekapolon, eketopolooryo tokona ayoŋ.

¹¹ Iyeete iyes ŋakiro ŋuna erae ŋacaryo ŋuna ikwaan ka ŋamilo, itiyaete iyes ŋakiro ŋuna edaunosi ikwa ŋinya; erae ekieŋanu kus akim ŋina ikinomiyari iyes.

¹² Ikwaanikinosi ŋituŋa enomit ka amoru ŋina icunyio tokwaŋiar; ikwaanikinosi ikes ka ŋikukwa ŋulu eyapakinitae kwap, ido kicunyae a akim.”

¹³ Iyes ŋulu iboiyete aneni alwanan, kiirasi ŋakiro ŋuna adau ayoŋ akitiya ka iyes ŋulu iyapiyete toyenutu agogoŋ kaŋ.

¹⁴ Ebulit ŋikasecak alo Sion; ekamu amaran ŋulu nyenupito Akuj, ebasi ikes; “Ŋae alokidiŋ yok epedori akidaŋidaŋ akim ŋina amunyaran? Ŋae alokidiŋ yok epedori akidaŋidaŋ arira ŋina a ŋikaru ka ŋikaru?”

¹⁵ Ŋulu itiyaete ŋuna iyookino kirworos ŋakiro ŋuna a kire ŋulu nyejoikinit aryamun ibore anademun ŋuluce ŋiboro kec, ŋulu eŋerito akijaunun ŋakaluŋuluŋui, ŋulu nyecamito akiirar ŋakiro ŋuna earere ŋuluce ka ŋulu nyecamito akitere ŋuna aronok.

¹⁶ Ŋituŋa ŋulu ikote nen ikes eyarete aneni emam ŋican, eiunosi ikes anataaba a ŋina esibit aduketait ŋinajiet, einanakinio ikes akimuj kec ka eyakaunotor ikes ŋakipi a ŋinapaki.

Akwap a erwosit a ŋolo ailiilon

¹⁷ Iŋolikinete iyes akibuses ŋina a erwosit, iŋolikinete iyes akwap ŋina emyaarit neni alwanan.

¹⁸ Igeunete iyes atamatam ŋuna a ekesicanan a ŋolo paaran, ido temasi, “Ai eyai ŋolo abu kimar? Ai eyai ŋolo epimi ŋisiliŋa ka ocur? Ai eyai ŋolo emari ŋaduketa ŋuna aoyak?”

¹⁹ Nyiŋolikinete nabo iyes ŋituŋa ŋulu eturok, ŋituŋa ŋulu irworosi ŋakiro ŋuna nyileerete ŋuna nyipedorete iyes ayenun, ŋulu eŋajapaka irworosi ŋakiro ŋuna nyipedorete iyes ayenun.

²⁰ Kiŋolikisi Sion, etaun ŋolo ikisekinitae iwon akitiya ŋasuban yok. Iŋolikinete iyes Yerusalem, a akibois akwap ŋina ajokan akiboiyo, ikwaan Yerusalem ka eema ŋolo nyelemaryo aneni edupakinitae, ŋolo nyeditaryo ŋases keŋ, ŋolo nyeŋedeŋedeo ŋaunoi keŋ.

²¹ Eyakaun Ekapolon nen aŋuna yok erae ŋolo ailiilon, erae nen akibois ŋina a ŋaŋololin ka ŋayona ŋuna apolok, ŋuna emam ŋatakerin itorete, ŋuna emam ŋameeli itorete;

²² anerae Ekapolon iŋes erae ekatubon a ŋakiro yok, Ekapolon iŋes erae ekepukan yok; Ekapolon erae erwosit yok, iŋes ikiuni iwon.

²³ Ilajulajunosi ŋiboorei ŋulu imetotor iyes ŋameeli, nyepedosi akiketar epir ŋolo eyai nameeli, kori nyepedosi akiguror ŋanaŋgae topetar. Ekoraryo nai ŋiboro ŋulu alalak ŋulu aŋatunitae, ŋikaŋwalak daŋ, eŋatarete ŋiboro ŋul.

²⁴ Mam ituŋanan ŋini iboi a nen ŋini etemari, “Adyaka ayoŋ,” isyoniyo ŋasecisya a ŋituŋa a ŋulu iboiyete a nen.