Isa. 32 - Ebaibul

Todwarae ŋuna ka apukan a ŋina ka akiyookino

¹ Topupokisi, ebuni erwosit ŋolo ipukae a akiyookino ka ipukaete ŋikapolok a akiyookino.

² Eruwor neni kec eiunotor ŋituŋa ikwa akibois ŋina ipakarit ekuwuam, kori akibois ŋina ikimukori anakiru a ŋina alalan. Ikwaanikin ikes ka ŋayona ŋuna elelyata ŋakipi analoŋisat, ikwaanikin ka etolim a ataaba a ŋina apolon anakwap a ŋina ka akure.

³ Nyerubakinete ikes iteete ŋuna aronok nyesubakis, iirarete ŋulu epupete ŋakiro topupokis.

⁴ Etubete anatameta kec ŋakiro ejok ŋulu sek ikirikirasi akitub ŋakiro, irworikinete ŋiŋajapanotin itenikinito ŋakiro emam akibatibata.

⁵ Nyenyarao nabo ebaŋ atemar ekapolon, kori nyitopolooryo ekasyaat;

⁶ anerae irworosi ŋibaŋaanotin abaŋao, eyeete ŋatameta kec akitiya ŋuna aronok, akitiya ŋuna nyiwuapito ŋuna ka Akuj, akirworo neni a Ekapolon ŋuna nyiyookino, elemanari akimuj aneni a ŋulu enyamit akoro, elemanari ŋakipi aneni a ŋulu enyamit akure.

⁷ Ŋakiro ŋuna itiyaete ŋasyanisya, erae ŋuna aronok; eyeete akitiya ŋakiro ŋuna aronok ka irworosi alyokonu amunyarya ŋikulyak, tari kiyookino ŋakiro ŋuna edyakanarotor ŋituŋa ŋulu eyakatar akiitanit.

⁸ Nai eyeete ŋikapolok ŋakiro ŋuna apolok, ido anakiro aŋuna apolok a ŋun, erubakinete ikes erae ŋikapolok.

Isicanio ŋaberu ŋuna idelasi

⁹ Iyes ŋaberu ŋuna iboiyete emam ŋican, tonyoutu, kiirasi ŋakiro kaŋ; iyes ŋidwe ŋulupesur ŋulu idelasi, kiirasi ŋakiro ŋuna erworo ayoŋ.

¹⁰ Alotooma apaki adio cici ŋina edeparit ekaru, imaranikinete iyes ŋuna idelasi tokona, anerae nyekokete ŋaraito a epiini, nyilemete iyes ŋaraito a epiini.

¹¹ Iyes ŋaberu ŋuna iboiyete emam ŋace, tomarana, tomarana, iyes ŋaberu ŋuna idelasi tolacas, toruwor ŋuna ilerete, tonapa ŋiguniyae anacirin kus.

¹² Toumokisi, ido torama ŋatorobwo kus aŋuna a ŋimanikorin kus, aŋuna a ŋikito a epiini a ŋulu araak nooi,

¹³ aŋuna a ŋalup a ŋituŋa kaŋ, neni alomunia amoni ŋina a ŋikukwa; kire, toumokisi aŋuna a ŋikalya a daadaŋ a ŋulu sek alelyanete alotaun a ŋolo ka alakara.

¹⁴ Imyekinete ŋituŋa akiboi anakais a ŋuna ka apukan, eesikinio etaun ŋolo sek ileleba ŋituŋa; eruworosi ekamukumukut ka aduketait ŋina kirereet akwap ŋaduyon ŋuna a ŋikaru ka ŋikaru, eruwor neni elelyaniata ŋisigirya, eruwor neni edakasi ŋamesekin,

¹⁵ akitodol akoloŋit ŋina iyakuunia Akuj etau alokidiama neni yok, ido eruwor aloŋisat akibois ŋina eya ŋimanikorin ŋulu araak ŋaraito ka ikwaanikin emanikor ŋolo araan ŋol ka amoni.

Ekisil a apukan ka Akuj

¹⁶ Erubakini nai akiyookino eyai naloŋisat ka erubakini akiyookino eyai lomanikorin ŋulu araak.

¹⁷ Elomuni ekisil anakiyookino ka elomuni akiyapara ka akikinyoma ŋina a ŋikaru ka ŋikaru anakiyookino.

¹⁸ Erubakinete ŋituŋa kaŋ eyakasi nakibois ŋina eyai ekisil, iboiyete ikes anakiboisyo a ŋuna eiunotor ka neni epedoryata ikes akieŋunia emam ŋace.

¹⁹ Edaun amoni jik, inyasunio etaun nooi.

²⁰ Irereŋioto iyes ŋulu itaete diyete ŋayona daadaŋ, iyes ŋulu imyekinete ŋisigirya ka ŋimoŋin kus edakasi emam ŋace.