Isa. 31 - EbaibulAkoŋinait ariit ka ŋituŋa a Ijipit 1 Ekaŋ iyes ŋulu itiyaanorosi Ijipit aŋuna ka aryamun akiŋarakino ka iyes ŋulu iyarikinito naŋolei ka ikinyomito ŋagaari ŋuna iritae a ŋaŋolei, anerae elalak; iyes ŋulu ikinyomito neni a ŋikametok ŋaŋolei, anerae egogoŋ ikes, iyes ŋulu nyikinyomito Akuj ŋina asegan ŋina a Isirael, kori nyiŋisenenete Ekapolon ŋakiro ŋuna emaikina kitiyata. 2 Toyenete rika atemar eos Ekapolon ka eyauni ŋican, nyeesyanakini ŋakiro ŋuna elimuni, nai eremokin ŋikalya a ŋulu itiyaete aronis ka eremokin ŋikeŋarakinitok a ŋulu asecak. 3 Erae Ŋijipitian ŋituŋa, meere Akuj; erae ŋaŋolei kec akiriŋ koŋin; meere ŋitai. Ani egeuni Ekapolon ayaun ŋican nakwap adio, ekuryaketa ŋituŋa ŋulu elosito akiŋarakin ŋuluce ka mam ibore itiyakinete ŋulu iŋarakinitae, ido emunyari ikes daadaŋ kaapei. 4 Abu Ekapolon okolimok ayoŋ tema, “Ikwaŋina ipopolaa eŋatuny, kori eŋatuny ŋolosorokit alokidiama ityaŋ ŋini adau akikamun, ŋolo ani tari kenyaraun ŋikeyokok ŋulu alalak akiar iŋes, nyeryaŋakin aŋuna ke ecelet a ŋikeyokok, kori nyesuro aŋuna a ecelet kec, aŋun ebuni Ekapolon ŋolo a ŋajoresyo ajiore alo Sion, ajiore anaitae a ekamukumukut Sion. 5 Erouni iyokit Ekapolon ŋolo a ŋajoresyo a Yerusalem, lopite ŋolo erounitotor ŋikyeny akwap eporete alokidiama, iyoki ka elakuni Ekapolon Yerusalem, iŋarakini ka eiuni iŋes. 6 “Okoe ŋituŋa a Isirael, toboŋosi neni a Akuj a ŋina ipotu iyes tolukis nooi. 7 Kitiyata ŋun, anerae akoloŋit ŋina ebunio Ekapolon, imasarete iyes daadaŋ ŋitorubei a ŋakujo kus ŋuna itiyaunitae a esilipa ka ŋuna itiyaunitae a egolid, ŋitorubei ŋulu ipotu iyes kitiyaut a ŋakan kus irae ŋikasecak. 8 Emunyaryo ŋituŋa ka Asiriya alojie nai meere ŋituŋa itiyakinete ŋun; earyo ikes a ekileŋ, nai meere a ŋolo a ituŋanan, emunyari ekileŋ ikes, eemete ikes alokileŋ ka itiŋakinio ŋisorok kec akitiya ŋiticisyo. 9 Eritakin aduketait kec ŋinajiet aŋuna ke ekabule kec, eemete ŋikapolok kec kimyekis ŋabenderae a nen. Alimu Ekapolon ŋun, Ekapolon ŋolo ilipyo neni keŋ alo Sion ka ŋolo enokia akim keŋ ŋina a ŋamuronisya alo Yerusalem.” |
Ngakarimojong Interconfessional Bible © Bible Society of Uganda, 2008.
Bible Society of Uganda