Biblia Todo Logo
Bìoball air-loidhne

- Sanasan -

Isa. 30 - Ebaibul


Akoŋinait akikinyomit ŋituŋa a Ijipit

1 Irworo Ekapolon ebala, “Okoe iyes ŋidwe ŋulu aŋerok, ŋulu eyeete ŋakiro, nai meere ŋuna kaŋ, iyes ŋulu icamununosi, nai anakimanit ŋuna acamit ayoŋ;

2 iyes ŋulu ilot itiyarosi Ijipit eriŋa nyiŋita ŋakiro aneni kaŋ, iyes ŋulu ilot akiuryaro aneni a Parao ka aryamun neniŋopet alo Ijipit.

3 Aŋakiro aŋun, eruwor akiuryaro aneni a Parao ŋileec aneni kus ka eruwor aŋopit kus alo Ijipit ajamuwaro.

4 Tari keyakasi ŋikapolok a ŋasigarya keŋ Soan ka tari kedolito ŋikiyakitono keŋ Anes,

5 irumete ŋileec ŋituŋa a Yudaya daadaŋ aŋuna a ŋituŋa a ŋulu nyepedorete akiŋarakin ikes, ŋituŋa ŋulu nyeyaunete adiojokis, kori adiokiŋarakinet neni kec, nai ŋileec ka ajamuwaro.”

6 Erae nu ŋakiro ŋuna aponi todwarae aŋuna a ŋityaŋ a ŋulu eya Negeb: Elosete ŋikiyakitono itorito nakiboisyo ŋuna a ŋatyokisyo, ŋuna eya ŋican, nakiboisyo ŋuna eya ŋaŋatunyo ka ŋiŋatunyo ŋulu ipopolaete, nakiboisyo ŋuna eya ŋapomya ka ŋimuno ŋulu eporete. Elosete ikes nen iwokito abaru kec a ŋisigirya ka iwokito ŋisiliŋa kec a ŋikaala, eayete ikes ŋiboro ŋul neni a ŋituŋa a ŋulu nyepedorete akiŋarakin ikes.

7 Eayete ikes ŋiboro ŋul nakwap a Ijipit ŋina erae akoŋinait, ŋina emam ibore eyakar, aŋun, anyar ayoŋ iŋes “Raab ŋina emam ibore itiyae.”


ŋituŋa ŋulu aŋerok

8 Tolot tokona, kigir ŋakiro nu alokiŋaren kec namoru ŋinadapal, kigir ikes lokitaabo, ikotere eruwor ŋuna a ŋapakio a ŋuna eponito ka eruwor esuuda ŋolo a ŋikaru ka ŋikaru;

9 anerae erae ikes ŋituŋa ŋulu aŋerok, ŋidwe ŋulu emam akikinyomit eyakatar, ŋidwe ŋulu nyepupete ŋakiro ŋuna itatami Ekapolon,

10 ŋulu elimonokinete eketeyenunan ebe, “Nyiyenut ŋakiro” ka neni a ŋikadwarak ebe “Nyidwara neni kosi ŋakiro ŋuna iyookino, tolimonokinae isua ŋakiro ŋuna ajokak, todwara neni kosi ŋakiro ŋuna ka alyokonu.

11 Nyiwuapa ŋakiro ŋuna ajokak, kimyekisi akitiya ŋuna iyookino, nyikilimonokis nabo isua ŋakiro ŋuna ka Akuj a Isirael a ŋina asegan.”

12 Aŋun, irworo Akuj a Isirael ŋina asegan ŋakiro nu, “Aŋuna iŋeryoto iyes ŋakiro kaŋ, ido ikinyoma nakisican ŋuluce ka namodiyo ka iyarikis nakisican ŋuluce ka namodiyo,

13 aŋun, ikokini asecit ŋin aneni kus akabaat ŋina eyai narwatata ŋina aoyan, akabaat ŋina enya, ŋina eapi aritaar arwatata, toritakin atipei alotooma apaki ŋina euruwuana.

14 Ikwaanikin abwaŋabwaŋar a arwatata a ŋin ka neni ebwaŋar amot ŋina ebwaŋio ka anyunyura, ŋina nyepedoryo aryamun tari itabok ŋini ekurorere akim, kori aokunio ŋakipi alokare.”

15 Irworo Ekapolon Akuj ŋina asegan ŋina Isirael ŋakiro nu, “Ani kerae toboŋunito iyes neni kaŋ, toryamunito akieŋun, kiuna; ani kerae kiapara iyes aneni kaŋ, ikikinyoma ayoŋ, kiryamunito agogoŋu.” Nai ipotu iyes nyicamut ŋun,

16 ido tolimut temasi, “Mam, nyikiemi isua ikidokit ŋaŋolei.” Aŋun iemete iyes! ido temasi nabo, “Ikiemi isua edokitae ŋaŋolei ŋuna apiranak.” Aŋun, ikiwuapete iyes ŋimoe kus ekerete akilo iyes!

17 Esuri ituŋanan ipei ŋituŋa aliput, iemete iyes daadaŋ aŋuna a ŋituŋa a ŋikan ikirisete ikes iyes tari ŋina idoŋio ituŋanan ipei bon esibit epir ŋolo ka abendera alokidiama emoru, esibit akitoodikinet ŋina esipokinitae kidiama ekamukumukut.


Akiikinet ka Akuj Sion

18 Kikote neni daŋ ecamit Ekapolon akitiya ajokis neni kus, aŋun ebuni iŋes akisyon iyes; anerae erae Ekapolon Akuj ŋina ka akiyookino, erereŋ daadaŋ ŋulu idarito iŋes.

19 Kire jik, okoe ŋituŋa a Sion, ŋituŋa ŋulu iboiyete alo Yerusalem, nyigworete iyes nabo jik. Itiyae iŋes ajokis neni kus apaki ŋina iirarya akigworo kus, ani iirari iŋes akigworo kus, ikiboŋokini iŋes iyes.

20 Tari kikiinak Ekapolon iyes ŋimoe ka ŋican, nyeŋopiyari Eketataman kus nabo, nai iŋolikinete iyes Eketataman kus.

21 Ani kilot iyes lowae ŋolo aloteten, kori lowae ŋolo alokedyeny, iirarete iyes etoil alokaku kus ebala, “Erot lo, tomekisi.”

22 Tosodi nai, inyasunete iyes ŋitorubei a ŋakujo kus ŋulu eburusiyaritae a esilipa ka ŋitorubei ŋulu eburisikinitae egolid. Icakarete iyes ikes esibito ŋaraco ŋuna asiilyanak, itemarete iyes neni kec, “Nyikicamit isua iyes!”

23 Iyakuuni iŋes akiru a ŋuna a ŋikinyom a ŋulu iekinete iyes nalup, ido akimuj ŋina elomuni analup, eruwor ŋina etuman ka ŋina alalan nooi. Akoloŋit ŋin, epote ŋaatuk kus adak neni ca daadaŋ eya ŋinya;

24 enyamete ŋimoŋin ŋulu itaete ka ŋisigirya ŋulu itaete ŋinya ŋulu iŋadatae ŋulu elemyo a akitiyo ka auma ŋina apolon.

25 Akoloŋit ŋina earere ŋimoe kus ŋulu alalak ŋina eritarere ŋaduketa ŋuna aoyak, eyakaunosi ŋayona ŋuna elelyaata ŋakipi alomoru a ŋulu aoyak a daadaŋ ka alokamukumukui a ŋulu aoyak a daadaŋ.

26 Akoloŋit ŋina imadya Ekapolon neni ewanan alotuŋa keŋ ka ŋina itaŋaleunio Ekapolon ŋajemei ŋuna abu iŋes kiteryamu ŋituŋa keŋ, ecauni elap ikwa akoloŋ ekwaŋiar akica a akoloŋ akilo tari ŋarwa ŋakanikaarei, ikwaanikin akica ŋin bon ka ŋina a ŋirwa a ŋikanikaarei.


Atubokino a ŋituŋa ka Asiriya

27 Kiirasi, ebunit ekiro a Ekapolon aneni alwanan, ebunit anaŋoit a ŋina erirae ka anapuru a ŋina iryono cuc a ŋina eremit kidiama; ileleba anyunyura nakituk keŋ, ido ikwaan aŋajep keŋ ka akim ŋina ikinomiyari.

28 Ikwaan ekieŋanu keŋ ka ayonae ŋina ilapit elele, ŋina edolete ŋakipi lodokole erae kidok. Iwokori iŋes ikwa arimama ŋituŋa a ŋakwapin namunyaro, irepakini iŋes ŋaunoi loŋitiny a ŋituŋa torikorere ikes nariet tooliyosi

29 Ieikinete iyes eete lopite ŋolo ieokinioto nakwaare apaki ŋina a ŋasuban a ŋuna asegak, eyakaun alakara lotai kus lopite ŋolo erotokinio ituŋanan iirari eruye a apilu a ŋina enyaritere ŋituŋa alosit lomoru a Ekapolon neni a Ekapolon a ŋolo arae ataaba a Isirael.

30 Isiirari Ekapolon ŋituŋa etoil keŋ ŋolo ailiilon ka iŋolikinete ŋituŋa apedor a Ekapolon ebuni kwap, ebuni apedor ŋin eyakar aŋoit ka akim ŋina ikimunyari, ebuni eyakar ŋidouwon, akiru ŋina ireta egiro ka ŋakako.

31 Ebuli ŋituŋa ka Asiriya iirarete etoil a Ekapolon apaki ŋina isicania iŋes ikes.

32 Apaki daadaŋ ŋina eramarya Ekapolon ebela keŋ ŋolo isicania ŋituŋa ka Asiriya iiraryo eruye ŋolo esibit eruye a ŋiburin ka ŋaduŋgui. Itiji Ekapolon ikes a akan keŋ a ŋina iikikyo.

33 Itemokinitoe sek ka aŋorot akibois, itemokinitoe akibois ŋin aŋuna a erwosit ka Asiriya. Ecukul ka elapat neni inokakinitae akim ŋin ka elal akim a nen ka elalak ŋakito. Ekieŋanu a Ekapolon itule akim ŋin torirau ikwa apetoron.

Ngakarimojong Interconfessional Bible © Bible Society of Uganda, 2008.

Bible Society of Uganda
Lean sinn:



Sanasan