Isa. 28 - EbaibulAtubokino a ŋiketunak a ŋulu erae ŋikarikok, ŋisacaradotin ka ŋikadwarak 1 Ekaŋ iyoŋ Isirael akwap ŋina iturotor ŋikamerak a Epuraim, akwap ŋina ecucukaiya akibuses ikwa ŋatur ŋuna itanapikinitae neni a ŋikapolok; a ŋulu imujete ŋamuja ŋuna ajokak; akwap ŋina a ŋulu eumiya epiini! 2 Kiirasi eyakar Ekapolon ituŋanan ŋini etiron ka ŋini agogoŋon, ŋini ikimunyari lopite ŋolo emunyaryata akiru ŋina a ŋakoko ka ekuwuam akwap; ŋini ikimunyari lopite ŋolo emunyaryata ekuwuam ŋolo agogoŋon ka ŋakipi ŋuna eleleete akwap; ijukuni iŋes a apedor keŋ nakwap akiru ka ekuwuam. 3 Ipudao alokwap ŋulu iturotor ŋikamerak a Epuraim, 4 ŋulu ecucukaiya akibuses kec ikwa ŋatur ŋuna itanapikinitae neni a ŋikapolok a ŋulu imujete ŋamuja ŋuna ajokak, ikwaanikin ikes ka ŋaboboryo ŋuna ekokete eriŋa akamu, ŋuna elemari ituŋanan ca daadaŋ ŋini iŋolikini. 5 Akoloŋit ŋin eruwor Ekapolon ŋolo a ŋajoresyo aikit a ŋatur ŋina apolon ka ebokot ŋolo ka akibuses aneni a ŋipiya a ŋituŋa keŋ, 6 einakini etau ŋolotubet ŋakiro anakiyookino neni a ŋini etubi ŋakiro ka agogoŋu neni a ŋulu ebwaŋete ŋimoe alopuke apaki ŋina ke ejie. 7 Etooliyo epiini lu daŋ, ido iteriterosi aŋuna ke epiini a ŋolo adwaran; aoliyosi ŋisacaradotin ka ŋikadwarak anakimat epiini ŋolo adwaran, esimatimataiya ikes epiini, iteriterosi aŋuna ke epiini a ŋolo adwaran; nyisiyoonokinete ŋuna isileerekini Akuj ikes anakiruja, nyetubete ŋakiro a ŋituŋa a akiyookino. 8 Ibwaliyarito ŋalekan ŋuna ka asiilyo ŋimesae kec, mam akibois ŋina eseg. 9 Ebasi ikes make, “Ŋae epedori Ekapolon akitatam aosou, ŋae epedori iŋes akisileerekin ŋakiro? Epedori iŋes akitiya ŋun neni a ŋidwe a ŋulu ariŋa epetoryo, neni a ŋulu ariŋa iteesikinio akinak. 10 Ikitatami iŋes iwon ŋikisila ka ŋikisila, ŋikisila ka ŋikisila, elain a ŋakiro epei ka ŋoloce, elain a ŋakiro epei ka ŋoloce, ŋadi a ne, ŋadi ka ama.” 11 Kire jik, irwori Ekapolon neni a ŋituŋa keŋ ikajikaja, irwori neni kec a ŋajep a ŋituŋa aŋulugelae, 12 a ŋulu abu iŋes tolimok tema, “Erae ne neni kieŋunet, kisiyeŋutu ŋulu eupit, erae iŋes neni kieŋunet”; nai apotu ikes nyepupokis ŋakiro kaŋ. 13 Ŋakiro ŋun iŋes elosyo Ekapolon alimun ebe, “Kitatamae ikes ŋikisila ka ŋikisila, ŋikisila ka ŋikisila, elain a ŋakiro epei ka ŋoloce, elain a ŋakiro epei ka ŋoloce, ŋadi a ne ka ŋadi ka ama;” ikotere nai ani elosete ikes kimasar ekaukau tobilas, kikamarae ka torikoroe. 14 Aŋun, kiirasi ŋakiro a Ekapolon iyes ŋulu ijamuwarito ŋakiro a Ekapolon, iyes ŋulu ipukato ŋituŋa lu alo Yerusalem; 15 anerae itemasi iyes, “Acamunoi isua ka atwanare, acamunoi isua ka akibois ŋina a ŋikatwak; apaki ŋina eponiata ŋican ŋulu apipilak, nyepote neni kosi; anerae ikiuna isua analyokonu ka ikiŋopit isua anakirworo alyokonu.” 16 Aŋun, alimu Ekapolon ebe, “Ewuak tokona ayoŋ Sion amoru ŋinakisyakinet aduketait, amoru ŋina agogoŋon nooi, amoru ŋina egogoŋ egyelit ŋina itowoi aduketait jik. Nyekadakini ituŋanan ŋini ikinyomit neni keŋ.” 17 Akitub ŋakiro a akiyookino iŋes eruwor akipimet a amoru a ŋin, akiyookino iŋes erikini neni emagul; Inyasunete ŋakako ŋirotin a akiyar kus ŋulu iyarikinito iyes, inyasuni akalele a ŋakipi ŋakiboisyo ŋuna iŋopitotor iyes. 18 Elemaryo acamunet kus ka atwanare, ikisaryo acamuna kus ka akibois ŋina a ŋikatwak; ani epote neni kus ŋican ŋulu etubulok, ikimunaarete iyes. 19 Apaki daadaŋ ŋina eponiata ŋican ŋul neni kus, ikiarete iyes; anerae epote ŋican ŋul a ŋinataparacu ka a ŋinapaaran, epote ŋican ŋul neni kus naparan ka nakwaare. Ikibuli iyes ŋinapaki daadaŋ iyenuniata iyes ŋakiro ka Akuj. 20 Euruwaniar ekitaada, nyepedori ituŋanan arwaar ŋakejen, editiyar ibore ŋini imukore, nyepedori ituŋanan akimukor akuwan keŋ daadaŋ. 21 Eji Ekapolon lopite ŋolo abunio tojiyo alomoru Perasim, eŋoi iŋes lopite ŋolo abunio toŋoya anakadipaalat a Gibeon. Ebuni iŋes akitiya etic, egelaana epite ŋolo itiya iŋes, ebuni iŋes akitiya etic keŋ, ekujuwuana epite ŋolo itiya iŋes. 22 Aŋun tokona, nyijamuwasi ŋakiro ŋuna adau ayoŋ alimun, ani kijamuwasi iyes ŋakiro kaŋ, etyokioto ŋakiro aŋuna kus, anerae eira ayoŋ atubunet a Ekapolon Akuj ŋina a ŋajoresyo, atubunet ŋina ka amunyar akwap daadaŋ. 23 Topupokisi, kiirasi ŋakiro kaŋ. Topupokisi ejok, ido kiirasi ŋakiro ŋuna erworo ayoŋ. 24 Itaete mono jik ŋiketak aŋuna ka aekin ŋikinyom a? Erubakinete mono jik ikes ikurete ŋalup a ŋimanikorin a? 25 Ani mono kedau eketan akinapinap ŋalup a emanikor, nyepedori mono iŋes aekin ŋikinyom ŋulu a edia a ŋolo itoboboe akimuj a? Nyedupakinete mono ikes ŋikinyom ŋulu esibito erau a ŋilaino, ido todupakis ŋaganoi neni emaikina todupakinae, ido torekinae nawae a? 26 Itiyaete ikes ŋun, anerae itatamitae ikes ejok; itatami Akuj kec ikes. 27 Nyeramyo a ekukoŋ ŋicok alodia a ŋolo itoboboe akimuj, kori nyiragao a akokoro a gaari ŋicok alodia a ŋolo itotoboe akimuj, nai eramyo ŋicok a edia a ŋol a ebela, kori a akitoe. 28 Iryeo ŋikinyom aŋuna ka akimuj, nai nyerami ituŋanan ŋikinyom ŋul a ŋinakoloŋit; epedori ituŋanan akiram ŋikinyom a ekukoŋ, kori akiraga a akokoro a agaari, nai nyinyaadiyarete ŋul ŋikinyom. 29 Eponito nu daŋ aneni a Ekapolon a ŋolo a ŋajoresyo, itatami iŋes ŋakiro ŋuna ajokak ka eyakar iŋes aosou ŋina iloit. |
Ngakarimojong Interconfessional Bible © Bible Society of Uganda, 2008.
Bible Society of Uganda