Isa. 25 - Ebaibul

Akipuro aŋuna ka alakuno anakisicanio

¹ Okoe Ekapolon, irae iyoŋ Akuj kaŋ; eketopoloori ayoŋ iyoŋ, epuri ayoŋ ekiro kon; anerae itiya iyoŋ ŋakiro ŋuna ka aumokin, ŋakiro ŋuna keyeunio koloŋ sek, ŋuna ikinyoma ka ŋuna a kire.

² Ituruwo iyoŋ etaun neni etukotor ŋamoru, ituruwo iyoŋ etaun ŋolo a ŋaduketa aŋunajiet ŋolo emunaara, nyeriŋa eyakasi lotaun ŋakais ŋuna eiunotor ŋigelaanotin, nyedukokin nabo etaun ŋol.

³ Aŋun, ikitopoloorete iyoŋ ŋituŋa ŋulu agogoŋok; ikikerete iyoŋ ŋituŋa a ŋakwapin a ŋuna aryenyaanak,

⁴ anerae ibu iyoŋ toruwor neni eiunotor ŋikulyak, ekaiunan a ŋituŋa a ŋulu a eyakatar akiitanit alocan kec, neni emecete ŋituŋa apaki ŋina ka akiru ka neni iboikin ŋituŋa apaki ŋina emwania akoloŋ. Apaki ŋina aponiata ŋituŋa ŋulu aryenyaanak keretut lopite ŋolo iretar akiru ŋina ka akiporo,

⁵ apaki ŋina aresiyarotor ŋitoilon a ŋigelaanotin lopite ŋolo eresiyaror amwanis aneni eonit, ibu iyoŋ kitidipok amwanis a aribo; ibu iyoŋ kisililiŋ ŋiryenyaanotin tojoŋoto aeore.

⁶ Esubakini alomoru alo Ekapolon ŋolo a ŋajoresyo ŋasuban ŋuna ka akimuj a ŋina ajokan aŋuna a ŋituŋa a daadaŋ, ŋasuban ŋuna a epiini a ŋolo abobon nooi, ŋuna ka akimuj a ŋina ajokan nooi ka epiini ŋolo abobon nooi ŋolo eliitae ejok.

⁷ Elemari alomoru alo Ekapolon ŋakiro ŋuna eenitere ŋituŋa daadaŋ, elemari ŋakiro ŋuna imukoritere ŋituŋa a ŋakwapin a daadaŋ; elemari iŋes atwanare jik.

⁸ Emyetari nai Ekapolon Akuj ŋakiyo anakonyen a ŋituŋa a daadaŋ, elemari iŋes akadakinit aneni a ŋituŋa keŋ anakwap a daadaŋ. Ekapolon elope alimu ŋun.

⁹ Akoloŋit ŋin, etemaryo, “Kiŋolikisi, erae na Akuj yok; aponi iwon kidarae iŋes ikotere ikiuni iwon. Erae lo Ekapolon ŋolo aponi iwon kidarae, olakaros ka olelyana aŋuna ikilakunia iŋes iwon.

¹⁰ Ebuni apedor a Ekapolon ayakaun lomukura lo. “Ipudaaryo ŋituŋa a Moab anakibois kec, lopite ŋolo ipudaere ŋanya anakipany a ŋina ka aoret.

¹¹ Tari kikeut ikes ŋakan kec anakipany lopite ŋolo epetaritotor ŋikekwaŋak ŋakan kec anakipi ikwaŋete; elemaryo akituro kec tari kikatakinito ikes aiun a ŋakan kec.

¹² Eritakinio kwap ŋarwatatain kec ŋuna aoyak ŋuna eya ŋaduketa ŋunajiet, ituuruwuanunio ikes toritakinae kwap, toruwor ŋalup.”