Isa. 24 - Ebaibul

Atubokino ŋina ebunit nakwap

¹ Apuu Ekapolon tokona akinyasun akwap kituruwo ekasile, ebuburiyari iŋes akwap kielielaa ŋituŋa ŋulu eya nakwap.

² Itiyakin ŋakiro ŋun neni a ŋituŋa lopite ŋolo itiyakinotor neni a esacaradoti, neni a apito lopite ŋolo itiyakinotor neni a ekapolon keŋ neni a aketiyan lopite ŋolo itiyakinotor neni a akapolon keŋ, neni a ekagyelan lopite ŋolo itiyakinotor neni a ekagyelaran, neni a ekepotoron lopite ŋolo itiyakinotor neni a ekeliparan, neni a ekedeniyoron lopite ŋolo itiyakinotor neni a ekedenikinon.

³ Inyasunio akwap nooi ka emunaaryo nooi; anerae adau Ekapolon alimun ŋakiro ŋun.

⁴ Eoni akwap ka erinyiyori ibore daadaŋ. Eruwor akwap akoŋinait ka erinyiyori ibore daadaŋ. Eruwor kidiama akoŋinait kaapei ka akwap.

⁵ Amunaasi ŋituŋa ŋulu iboiyete anakwap akwap, anerae abila ikes ŋikisila, nyiwuapa ŋakiro ŋuna atubunitoe ka nyiwuapa acamunet ŋina a ŋikaru ka ŋikaru.

⁶ Aŋun, amunyasi ŋilam akwap, aryamut ŋituŋa ŋulu iboiyete anakwap ekaile ŋolo ka asecit; aŋun, adaun ŋituŋa anakwap edoŋ ŋidikudyo.

⁷ Aoko ŋaraito a epiini, ainiyasi ŋikito a epiini, asiliyosi ŋitai a daadaŋ a ŋulu sek anaito alelyanu.

⁸ Eliliŋ eruye a ŋiburin ŋolo sek ka alelyanu, adaun acela a ŋulu elelyanete, eliliŋ eruye a agita ŋolo sek ka alelyanu.

⁹ Nyeriŋa ŋituŋa emasete epiini toeos, adwaryata ŋagwe tel aneni a ŋulu emasete.

¹⁰ Abilibilaar etaun ŋolo a egurigur, agolokin ŋakais daadaŋ ikotere edaun ituŋanan epedori alomar tooma.

¹¹ Ecelasi ŋituŋa a ŋulu a etaun alorotin aŋuna emamukar epiini, apuripuryaar alelyanu daadaŋ, adaun alakara anakwap.

¹² Edoŋ ekasile lotaun, abwaŋabwaŋaar ŋipukei a etaun enyasun.

¹³ Itiyakin nu nakwap ka nakwapin daadaŋ, ikwaanikin ŋun ka apaki ŋina eraraunere ŋaraito alokito ka olipa, ikwaanikin ŋun ka apaki ŋina isokotaere ŋaraito a epiini kedaun akilem.

¹⁴ Ecelunete ŋipiya, eeikinete ka alelyanu; elimorete ŋulu alo To ailiil a Ekapolon.

¹⁵ Aŋun, emaikina ŋituŋa ŋulu alo Kide kitopoloosi Ekapolon, emaikina ŋituŋa ŋulu iboiyete alodiyete anam kitopoloosi ekiro a Ekapolon Akuj a Isirael.

¹⁶ Epupyo ŋieosyo ŋulu ipurere Ekapolon anakisaleta a akwap, ŋieosyo ŋulu ipurore Ekapolon ŋolo iyookino. Nai abala ayoŋ, eridak ayoŋ, eridak ayoŋ. Okoe erae nu ŋuna kaŋ! Anerae itiyaete ŋulu nyikinyomitae pa ikinyoma anamamukau akikinyoma, ikiluwonokinete.

¹⁷ Okoe ŋituŋa ŋulu iboiyete anakwap, ikidolokis iyes nu: Ekabule, alomar nakipany ka akikamaro.

¹⁸ Ŋini daadaŋ eemi aŋuna ke ekabule, ibusokin nakipany, ŋini daadaŋ edokuni anakipany, ikamaryo; anerae eŋaara ŋirotin daadaŋ ŋulu ebuneneo akiru ka emaranikinete ŋawoeta ŋuna ka akwap.

¹⁹ Enyasun akwap nooi atyakatyakasi ŋalup, amaran akwap nooi.

²⁰ Iteritero akwap lopite ŋolo iteriteror ituŋanan ŋini emera, ido iyaŋiyaŋa lopite ŋolo iyaŋiyaŋar akai aŋanya iloiloi ekuwuam ŋolo agogoŋon, enuwakin ŋasecisya nooi nakwap, ido imasar ka nyeteni nabo.

²¹ Akoloŋit ŋin isicani Ekapolon ŋapedorosyo ŋuna alokidiama ka isicani Ekapolon alokwap ŋirwosi ŋulu ka akwap.

²² Ecunakinio ikes daadaŋ iwapei ikwa ŋimabus ŋulu ecunakinitae lojera, egolokinio ikes lojera, ido kelunyar ŋirwa ŋulu alalak, isicanio ikes.

²³ Ereŋuni elap puu ka iryoniar akoloŋ cuc; anerae Ekapolon ŋolo a ŋajoresyo iŋes ipukae alomukura Sion ka alo Yerusalem, ido itoodikini iŋes apolou keŋ neni a ŋikapolokinitok a ŋituŋa.