Isa. 21 - Ebaibul

Ŋakiro ŋuna etoroniyaritere Babilon, Edom ka Arabia

¹ Ŋakiro ŋuna adwarit Ekapolon aŋuna ka aloŋisat a ŋina alodiyete anam. Ebuni ekenyasunan analoŋisat anakwap a ŋina adedeŋan, lopite ŋolo ekutunia ekuwuam ŋolo ekusi egogoŋ nooi kipiripiri epye akwap alo Negeb.

² Adau Ekapolon akisileerekin ayoŋ ŋakiro nu anakiruja: Elukini ekalukinon, inyasuni ekenyasunan. Okoe ŋituŋa a Elam, kitipeiyosi toremo, ŋasigarya a Media, kirikautu ŋitaunio, etadauni ayoŋ akiyaloloŋ daadaŋ ŋina eteryamunito ŋituŋa a Babilon ŋuluce.

³ Aŋun, eryeba akuwan kaŋ, akanomo ayoŋ aryeba ŋina ikoni aryeba a aberu a ŋina eapi akidoun, apapanu ayoŋ nyeriŋa apupi ŋakiro, akakadaki ayoŋ nyeriŋa ete ibore.

⁴ Ebiler ŋatameta kaŋ, eketakadakis ŋinyas ayoŋ, aruwor akiyar ŋina sek egeno ayoŋ ŋyinyas aneni kaŋ.

⁵ Esubanakinete ŋituŋa ŋimesae epetanakinete ŋakitambarae ŋuna enyamuna lomesae, imujete ka emasete. Iyes ŋikapolokinitok a ŋajoresyo tonyoutu, kiosa ka akimyet ŋaupala kus!

⁶ Adau Ekapolon alimokin ayoŋ ebe, “Ape, kiwuak ekeyokon a akibois, emaikina tolimok ŋituŋa ibore daadaŋ ŋini iŋolikini iŋes.

⁷ Ani iŋolikini iŋes ŋulu eya nagaari ŋuna iritae a ŋaŋolei ka ŋikametok ŋaŋolei erukito a ŋiarerei ŋikametok ka ŋikametok ŋisigirya edokito ŋisigirya, kori ŋikametok ŋikaala edokito ŋikaala, emaikina iŋes topupok ka topupok ejok nooi.”

⁸ Abu nai ekeyokon a akibois ŋol kiorou tema, “Okoe Ekapolon kaŋ, awoi ayoŋ anaduketait a ŋinakirereet ŋirwa daadaŋ naparan, ayai ayoŋ nakibois kaŋ akuwar kya.

⁹ Kiŋolik, eki apotu, apotu ŋikametok ŋagaari ŋuna iritae a ŋaŋolei, ŋikametok ŋaŋolei erukito a ŋiareerei!” Etemari nabo ekeyokon ŋol ebe, “Enyasun, enyasun Babilon. Eperete alokwap ebwaŋabwaŋaara ŋitorubei daadaŋ a ŋakujo a ŋuna sek elipete ikes.”

¹⁰ Okoe ŋituŋa kaŋ, ikisicani iyes lopite ŋolo eramere ŋikinyom analos, akalimokini ayoŋ iyes ŋakiro ŋuna akalimoki ayoŋ Ekapolon ŋolo a ŋajoresyo Akuj a Ŋisirael.

¹¹ Ŋakiro ŋuna adwarit Ekapolon aŋuna a Duma. Akanyarit ayoŋ ituŋanan alo Seir ebala, “Ekedaran nakwaare, aapuu akiwalar a? Ekedaran nakwaare, aapuu akiwalar a?”

¹² Toboŋok ekedaran nakwaare tema, “Ebunit ataparacu, nai ewariuni nabo. Ani kicamit iyoŋ akiŋita, kiŋit ka toboŋu nabo akiŋita.”

¹³ Ŋakiro ŋuna adwarit Ekapolon aŋuna a ŋituŋa a ŋulu eboiyete analoŋisat. Iyes ŋikawotok a Dedan ŋulu iboiyete anakobekobe a ŋina analoŋisat,

¹⁴ okoe iyes ŋituŋa ŋulu iboiyete alo Tema, yautu ŋakipi neni a ŋulu enyamit akure, kisiryama ŋikerimitok iyakatar akimuj;

¹⁵ anerae amotunosi ikes aŋuna acamitere akiar, acamitae ikes akiar a ŋileŋia a ŋulu aris kelemun anakuraroi, acamitae ikes akiar a ŋikaleŋeleŋe a ŋulu aris kiketakin ŋakawo kec. Emotuno ikes aloupanu a ŋolo ke ejie.

¹⁶ Aŋun, abu Ekapolon okolimok ayoŋ tema, “Alotooma ekaru epei, ŋolo ikwaan ka ŋolo itiyaa ituŋanan ŋini ipaŋgaunitae, edaun apolou a Kedar daadaŋ,

¹⁷ ekudyokunete ŋikajiok a Kedar ŋulu ejiete a ŋikaleŋeleŋe. Ekapolon Akuj a Ŋisirael adau alimun ŋun.”