Isa. 20 - Ebaibul

Todwar Isaya ŋuna ka akilouno a Ijipit ka Esiopia

¹ Alokaru a ŋolo abunio ekapolokiniton ŋasigarya ka Asiriya ŋolo eyakuunit Sarigon erwosit ka Asiriya Acidod neni abu ekapolokiniton a ŋasigarya ŋol torem, ido kikama,

² abu Ekapolon apaki ŋin kirwor neni a Isaya alokoku ka Amos. Tolimok Ekapolon Isaya tema, “Ape tolaca ŋiguniyae anakuwan kon ka ŋamuk anakejen kon.” Abu Isaya kitiya ŋun, tolot irimit eleri ka pa enapit ŋamuk.

³ Tema nai Ekapolon, “Lopite ŋolo alosyo eketiyan kaŋ Isaya eleri ka pa enapit ŋamuk ŋikaru ŋiuni ikwapei akitoodikinet ka aumokinet neni a ŋituŋa a Ijipit ka Esiopia,

⁴ ebuni erwosit ka Asiriya arikor Ŋijipitian erae ŋienan ka ŋituŋa ka Esiopia erae ŋirikon, erikoryo ŋituŋa ŋul ŋisorok kaapei ka ŋikasikou, erikoryo ikes daadaŋ elerete ka emam ŋamuk enapito, totakanete ŋikaosios, itoodiunito ŋileec aŋuna a ŋituŋa a Ijipit.

⁵ Ebuli ŋituŋa daadaŋ ŋulu sek ayakatar akigeno aŋuna ka Esiopia ka ŋulu eturosi aŋuna a Ijipit.

⁶ Akoloŋit ŋin elimunete ŋituŋa ŋulu iboiyete alodiyete anam ebe, ‘Kiŋolikisi ŋakiro ŋuna etiyakin neni a ŋituŋa a ŋulu ikigeno iwon, a ŋulu aponi iwon toemae neni kec aryamun akiŋarakinet ka alakuno aneni a erwosit ka Asiriya. Ani bo iwon, ikokinio ai ebucaroi?’ ”