Isa. 2 - Ebaibul

Akai ka Akuj ŋina moi eyakaun

¹ Erae nu ŋakiro ŋuna abu Isaya lokoku ka Amos kiŋolik anakiruja aŋuna a Yudaya ka Yerusalem.

² Alorwa a ŋulu eponito, ituruworyo ekamukumukut ŋolo ka Akai ke Ekapolon ŋolo eoya nooi akilo ŋimoru, itooyaaryo kileŋ ŋikamukumukui. Ilelebikinosi ŋituŋa a ŋakwapin neni keŋ.

³ Epote ŋituŋa anakwapin nen, ido temasi, “Potu, emaikina iwon etipeiyosi lokamukumukut ŋolo ke Ekapolon, Kai ŋina ka Akuj a Yakob, ikotere Ekapolon ikitatam iwon ŋuna ebala kiwuapa, ido opedosi iwon akiwuap ŋuna ebala iŋes.” Anerae Sion iŋes elomuniata ŋikisila, Yerusalem iŋes elomunia akirot ke Ekapolon.

⁴ Etubi iŋes ŋiburasinei a ŋakwapin, etubi iŋes ŋiburasinei anakwapin aŋuna agogoŋok a ŋuna elwaka. Ityakarete ikes ŋileŋia kec ŋulujiet toruworos ŋimelekyes ka ŋakwaaras kec toruworos ŋileŋia ŋulu etubere ŋikito. Nyejikinosi nabo ŋakwapin, kori nyitatamete nabo ŋituŋa epite ŋolo ejiere.

Tolimoroe atubokino a ŋiketurok

⁵ Okoe ŋituŋa a Yakob. potu ewuapa ŋuna ikilimokinit Ekapolon!

⁶ Okoe ŋituŋa a Yakob, imyekis iyes akiwuap ŋuna a ŋituŋa kus. Elalak alokidiŋ kus ŋimurok ŋulu eponito alo Kide, elalak ŋikadwarak ŋulu eponito alo Pilistia, aruwor ikes ŋipei ka ŋituŋa ŋulugelae.

⁷ Ileleba nakwapin kec esilipa ka egolid ka erae ebari kec ŋolo nyedaunun; ileleba nakwap kec ŋaŋolei ka erae ŋagaari kec ŋuna iritae a ŋaŋolei ŋuna nyedaunun.

⁸ Ileleba nakwap kec ŋitorubei a ŋakujo, ilipete ikes neni a ŋiboro a ŋulu itiyaunitae a ŋakan, ka neni a ŋiboorei a ŋulu itiyaunitae a ŋimoyo.

⁹ Aŋun, itiditeunio ŋituŋa ka ituruworyo ŋituŋa daadaŋ ŋicaryo. Nai nyitopoloo ikes Ekapolon.

¹⁰ Iyes ŋituŋa a Yakob, tolomasi natabab toŋopa alokwap anacukulei; toŋopa ikuryaka aŋuna a Ekapolon ka aŋuna ka apolou keŋ a ŋina ailiilon.

¹¹ Itiditeunio ŋulu itopolooro ka ejamuwaryo ŋulu iturosi. Tosodi, Ekapolon bon itopolooryo akoloŋit ŋin.

¹² Eyakar Ekapolon ŋolo etiron akoloŋit aŋuna a ŋulu iturosi ka aŋuna a ŋulu itopolooro; ta aŋuna a ŋinibore a daadaŋ ituritoe,

¹³ inyasuni Ekapolon ŋikito a Lebanon daadaŋ ŋulu enyaritae Cedar, ŋulu aoyak ka ŋulu ituritoe, ta ŋikuyono daadaŋ ŋulu a Basan,

¹⁴ ituruwuanuni Ekapolon ŋimoru daadaŋ ŋulu ileŋito akwap ka ŋikamukumukui daadaŋ ŋulu aoyak.

¹⁵ Inyasuni Ekapolon ŋaduketa daadaŋ ŋuna aoyak ka ŋarwatatain daadaŋ ŋuna eya naduketa ŋunajiet;

¹⁶ inyasuni Ekapolon ŋameeli daadaŋ ŋuna a Tarisis ka ŋiboro ŋulu ebusak daadaŋ ŋulu itiyaunitae.

¹⁷ Itiditeunio apolou a ŋituŋa a daadaŋ a ŋulu itopolooro ka ejamuwaryo akituro a ŋulu iturosi. Tosodi Ekapolon bon itopolooryo akoloŋit ŋin.

¹⁸ Itoŋopiyaryo jik ŋitorubei a ŋakujo.

¹⁹ Elomarete ŋituŋa naturukanin a ŋatabab ka elomarete ŋituŋa naduyon aŋuna ka anyunyura a Ekapolon ka aŋuna a akica keŋ a ŋina ailiilon, apaki ŋina ebunio iŋes akiteryairyakin akwap.

²⁰ Akoloŋit ŋin, imasarete ŋituŋa neni a ŋisolimae ka neni a ŋimenwae ŋitorubei a ŋakujo kec ŋulu itiyaunitae a esilipa ka egolid, ŋitorubei a ŋakujo ŋulu sek etiyaunete ikes aŋuna ka akilip neni kec.

²¹ Elomarete ŋituŋa nakabaae a ŋatabab ka naŋici a ŋatabab aŋuna ka anyunyura a Ekapolon ka aŋuna a akica keŋ a ŋina ailiilon apaki ŋina ebunio iŋes akiteryairyakin akwap.

²² Tojoŋoto akikinyomit ituŋanan, ekieŋanu bon eraakar iŋes ituŋanan. Nyo ejok aneni keŋ ŋini emaikina kikinyomere iŋes?