Isa. 19 - Ebaibul

Ŋakiro ŋuna etoroniyaritere Ijipit

¹ Ŋakiro ŋuna adwarit Ekapolon aŋuna a Ijipit ikes nu: “Kiirasi, ebunit Ekapolon eyai kidiama edou ŋolo apiranan, ebunit iŋes Ijipit; emaranikinete ŋakujo a Ijipit alokiŋaren keŋ ka iyalaar ŋitai a ŋituŋa a Ijipit.

² Etidiŋakini ayoŋ Ŋijipitian make, ido ejikinosi ikes make, ejikinosi ikidunyet ka ikidunyet, ejikinosi ŋituŋa a etaun a epei ka ŋituŋa a ŋoloce, ejikinosi ŋituŋa a apukan ka apei ka ŋulu a ŋinace.

³ Ekadakini Ŋijipitian, ido eruwor ŋakiro ŋuna eyeunete ikes ŋacaryo; elosete ikes akiŋita ŋakiro aneni a ŋitorubei a ŋakujo, aneni a ŋitai a ŋikatwak ka aneni a ŋimurok ta aneni a ŋililae,

⁴ Epotokini ayoŋ Ŋijipitian napedor a ituŋanan ŋini agogoŋon ka akou, ipukae ikes erwosit ŋolo adedeŋan.” Ekapolon ŋolo a ŋajoresyo iŋes alimu ŋakiro ŋun.

⁵ Edaun ŋakipi ananam ka eoni deu, ido ejoŋoe aŋolol Nile alel eoni deu,

⁶ ebosunete ŋakitelesyo a ŋakipi a Nile, edaunosi ka eokete deu ŋayona ŋuna a Ijipit, ebosete eoot ka aasak.

⁷ Eyakaunosi ŋakiboisyo ŋuna elapat diyete aŋolol Nile ka nakisyakinet aŋolol Nile, eoni ibore daadaŋ ŋini itakinitae diyete aŋolol Nile, ekutari ekuwuam ikes nyeyakaun nabo.

⁸ Ikalounete ŋikecokak ŋikolya, iwololoete daadaŋ ŋulu icokete ŋikolya a ŋikodoce, ijaluworosi ŋitai a ŋulu sek isirumete ŋikolya a ŋatibae.

⁹ Ekadanakini ŋiketiyak ŋulu itiyaete ŋilowi a ŋikito a ŋulu ikote epamba, edaun akigeno aneni a ŋulu sek itiyaete ŋilowi ŋulu amilimilak.

¹⁰ Ekadanakini ŋulu esonyete ŋilowi ka iyaloloŋete daadaŋ ŋulu itiyaete aŋuna ke eropit.

¹¹ Ebaŋaaka ŋirwosi a Soan nooi, itatamete ŋikaosok a Parao ŋakiro ŋuna ka abaŋao. Ikokinete ikes elimokinete Parao atemar, erae ikes ŋikaosok ŋiletok a ŋirwosi a ŋulu akoloŋ ai?

¹² Ai bo tokona eyakasi ŋikaosok kus? Kimyekisi ikes ikilimokis iyes toyenut ŋakiro ŋuna ayeu Ekapolon ŋolo a ŋajoresyo akitiya imanit ŋituŋa a Ijipit.

¹³ Abaŋaaketa ŋirwosi a Soan a modikis ŋirwosi a Mempis, ebatasi ŋulu sek erae ŋipirin a ŋikabilae, a ŋituŋa a Ijipit.

¹⁴ Esiguryak Ekapolon ŋatameta kec, esirimirimokis ikes Ŋijipitian aloticisyo a daadaŋ, lopite ŋolo irimirimyo ekameran analyakan keŋ.

¹⁵ Mam ipei daŋ alo Ijipit ŋini epedori akiŋarakin ikes kerae ekabaran, kori ekulyakit, ŋini itopolooritae, kori ŋinicaryoit.

¹⁶ Ebunit akoloŋit ŋina ikwaanikinotor ŋituŋa a Ijipit ka ŋaberu ŋuna ekuryaka. Emaranikinete ikes aŋuna a ekabule iŋolikinete atemar ebunit Ekapolon ŋolo a ŋajoresyo akisican ikes a apedor keŋ.

¹⁷ Itubulete ŋituŋa a Yudaya ŋituŋa a Ijipit, ebuli ŋinituŋanan daadaŋ ŋini elimokinio ŋakiro ŋuna ayeu Ekapolon ŋolo a ŋajoresyo akitiya neni kec aŋuna a ŋituŋa a Yudaya.

Kiterereŋoe ŋituŋa a Ijipit, Asiriya ka Isirael

¹⁸ Akoloŋit ŋin, eryamunio alo Ijipit ŋitaunio ŋikan ŋulu irworosi aŋajep a ŋituŋa a Kanaan kikoŋete itopoloorito Ekapolon ŋolo a ŋajoresyo. Enyarao epei a ŋitaunio a ŋul etaun ŋolo ka amunyaro.

¹⁹ Akoloŋit ŋin, eyakaun namuroet ŋina ke Ekapolon kidiŋ akwap a Ijipit ka eyakaun epir ŋolo edukitoe aŋuna ka Ekapolon lokukoru a Ijipit.

²⁰ Eruwor epir ŋol akitoodikinet ka esuuda aŋuna ke Ekapolon a ŋolo a ŋajoresyo anakwap a Ijipit. Ani ikaloikinete ikes Ekapolon aŋuna a ŋituŋa a ŋulu isicanito ikes, iyakikini Ekapolon ikes ekaiunan, ido eji ekaiunan ŋol aŋuna kec ka elakuni iŋes ikes.

²¹ Iteyenikin Ekapolon neni a Ŋijipitian ka eyenunete Ŋijipitian Ekapolon akoloŋit ŋin, ido ilipete ikes neni keŋ inakis ŋamuronisya ka ŋainakineta ŋuna epeyo, ikoŋete daŋ neni ke Ekapolon ido kiwuapa ŋuna adaut ikes akikoŋ.

²² Isicani Ekapolon Ejipit, isicani ka kitaŋaleu; eboŋunete ikes neni ke Ekapolon ka iirari Ekapolon adyekanot kec, ido kitaŋaleu ikes.

²³ Akoloŋit ŋin eyakaun erot ŋolo apolon ŋolo isyakin alo Ijipit tari Asiriya, elosete ŋituŋa ka Asiriya Ijipit ka elosete ŋituŋa a Ijipit Asiriya, ilipete ŋituŋa a Ijipit kaapei ka ŋituŋa ka Asiriya.

²⁴ Akoloŋit ŋin, eruwor Isirael ka Ijipit ta Asiriya ŋuna a ŋauni anapolou, eruworosi ikes daadaŋ ŋuna iterereŋitoe anakwap,

²⁵ eruwor ikes ŋakwapin ŋuna eterereŋ Ekapolon ŋolo a ŋajoresyo ebala, “Erereŋ ŋituŋa kaŋ ŋulu a Ijipit ka ŋituŋa ka Asiriya ŋulu asubuni ayoŋ ta Ŋisirael ŋiseuna kaŋ.”