Isa. 15 - Ebaibul

Ŋakiro ŋuna etoroniyaritere Moab

¹ Erae nu ŋakiro ŋuna etoroniyarete Moab: Aŋuna eturuworere Ar ereŋorot alotooma akuwar apei, eteryamun akwap a Moab ŋican, aŋuna eturuworere Kir ereŋorot alotooma akuwar apei, eteryamun akwap a Moab ŋican.

² Aloto ŋituŋa a Dibon kai ka akuj kec, aloto ikes nakiboisyo ŋuna aoyak akigworo; Iwololoete ŋituŋa a Moab aŋuna a ŋitaunio a Nebo ka Medeba. Elurito ŋituŋa daadaŋ abanyany ŋitim ka ŋipeneka,

³ enapito ikes ŋiguniyae elosete alorotin a etaun. Iwololoete ka igworosi ŋituŋa daadaŋ alokidiama ŋakais ka analapatui.

⁴ Igworosi ŋituŋa a Esibon ka ŋulu ka Eleale, epupyo ŋitoilon kec tari alo Yas; aŋun, abul ŋasigarya a Moab, ejaluwor ŋitai kec.

⁵ Iyaloloŋi etau kaŋ a ŋuna a Moab, aema ŋikadokinok keŋ Soar ka aema Egilas-Selisiya. Etipeiyosi ikes alorot a ŋolo elosi Luis, itipeete ikes igworosi; elosete ikes alorot a ŋolo Oronaim igworosi aŋuna ka akinyasuno.

⁶ Ejuwasi ŋakipi a Nimirim ka ainiyasi ŋinya alodiyete keŋ adaun ibore ŋini sek elomunit a nen, mam ibore eriŋa elib a nen.

⁷ Aŋun, elosete ikes etubete ayonae ŋina a ŋikwaŋae a ŋulu enyaritae Wilo, iwokito ŋiboro daadaŋ ŋulu alalak ŋulu apotu ikes toryamut ka ŋiboro daadaŋ ŋulu apotu ikes kidyata.

⁸ Itiyaete ikes ŋun, anerae eryam akigworo kec akwap a Moab daadaŋ, adol akiwolol kec Egilaim, adol aumen kec Berelim

⁹ ka aruworosi ŋakipi a Dibon ŋaokot bon. Kikote neni daŋ eyakuuni ayoŋ ŋace ŋuna aronok Dibon, eyakiyari ayoŋ eŋatuny neni a ŋituŋa a Moab a ŋulu edokinete ka neni a ŋipiya a ŋulu idoŋete Moab.