Isa. 14 - Ebaibul

Akinyasuno a ŋituŋa a Yudaya

¹ Nai isyoni nabo Ekapolon ŋiletok a Yakob ka eseuni nabo Ŋisirael, iwuakini ikes nabo nakwap kec, epote ŋituŋa ŋulugelae akiboi kaapei ka ŋiletok a Yakob.

² Eyaete ŋituŋa a ŋakwapin ikes nakwapin kec, ido kinyakut nabo ikes nakibois kec, epolokinete nabo ŋituŋa a Isirael ŋituŋa a ŋakwapin, ikwaanikin ŋituŋa ŋulugelaanotin ka ŋapi ta ŋipi anakwap a Ekapolon, eyaete ikes erae ŋirikon ŋulu apotu kikamasi ikes ka ipukaete ŋulu apotu kisicana ikes.

Akilouno a erwosit a Babilon

³ Apaki ŋina ikisieŋunia Ekapolon iyes anaryebo alocan ka alotic a ŋolo agogoŋon a ŋolo ikitiyakinitae iyes,

⁴ irworotor iyes erwosit a Babilon ijamuwarito ibasi, “Eloun erwosit ŋolo sek ikisicanit, adaun aryenyeo keŋ.

⁵ Alema Ekapolon apedor a ŋolo aronon, alema Ekapolon apedor a ŋikepukak

⁶ a ŋulu kepotu kisicana ŋituŋa anaryenyeo a ŋina pa eeŋanaryo, a ŋina epukatotor ikes ŋituŋa anaŋoit.

⁷ Eeŋut ŋituŋa daadaŋ anakwap, eliliŋa; ageut acela eosi.

⁸ Elelyanete ŋikito a Lebanon ŋulu enyaritae Cipres ka Cedar aŋuna elounere erwosit, anerae mam ituŋanan nabo eyepakini ikes kwap ikwapei nyeriŋakar iŋes ipukat.

⁹ Elakara akibois a ŋikatwak alokwap akijaar ikes ŋini elosi nen, etonyou akibois ŋin ŋitai a ŋikatwak akimal ŋulu elosete nen, akimal ikes daadaŋ ŋulu arae ŋikepukak anakwap; etonyou akibois ŋin alokicoloŋo kec daadaŋ ŋulu arae ŋirwosi a ŋakwapin.”

¹⁰ Irworikinete ŋul daadaŋ neni kon ebasi, “Ipalagagiar iyoŋ daŋ ikwa isua! Ikwaanikin iyoŋ ka isua!

¹¹ Ayaun akituro kon daadaŋ nakibois a ŋikatwak ayaun eruye a ŋaduŋgui nakibois a ŋikatwak eyakasi ŋikur kwap kon ikiburusiyasi iyoŋ ŋikur.

¹² “Icakun iyoŋ alokidiama okoe erwosit a Babilon, iyoŋ ŋolo ibu kileereu ikwa etop naparan, kori ikwa etop ŋolo ka akiwalaret! Ikituruwor iyoŋ ekoŋinait, iyoŋ ŋolo ibu kilou ŋakwapin!

¹³ Itami sek iyoŋ alotau kon ebe, ‘Alosi ayoŋ kidiama, etopoloor ayoŋ bon, ewuak neni epukator kidiama ŋikacer a Akuj, eboikin ayoŋ kidiama emoru ŋolo ecunanakin ŋituŋa, eboikin ayoŋ naitae ŋuna a Sapon.

¹⁴ Adokari ayoŋ kidiama ŋidouwon, ikikwaanikin ayoŋ ka Akuj ŋina eyai kidiama nooi.’

¹⁵ Nai ikitiyaun iyoŋ nakibois a ŋikatwak, ikitiyaun iyoŋ nakipany ŋina ecukul nooi.

¹⁶ “Ikitekinete iyoŋ ekaoyan ŋulu ikiŋolikinete iyoŋ, ido epodosi aŋuna kon ebasi, ‘Erae mono lo ekile ŋolo abu kitamaranik akwap ka kitamaranik ŋapukasinei a?

¹⁷ Erae mono lo ekile ŋolo abu kisikwaanik akwap ka aloŋisat ka kikama ŋitaunio a akwap? erae mono ekile ŋolo pa emyekini ŋimabus keŋ toboŋosi lorerya kec a?’

¹⁸ Eperete ŋirwosi a ŋakwapin daadaŋ analyalin kec ka anapolou kec, eperi ŋinituŋanan analyal keŋ,

¹⁹ nai ikimasar iyoŋ neni alwanan analyal kon lopite ŋolo imasarere ateni ŋina aronon. Erapitae akuwan kon a ŋawat a ŋituŋa a ŋulu aponi torae a ekileŋ a ŋulu emasar namoru ŋuna alotooma akipany, ikwaanikin iyoŋ ka alyal ŋina ipudaete ŋituŋa elosete.

²⁰ Nyepote ŋituŋa nalyal kon akinuk iyoŋ, anerae ibu iyoŋ kinyasu akwap kon ibu iyoŋ toar ŋituŋa kon. Elipi nyenyarae ŋiletok a ŋirorwa a ŋituŋa a ŋulu apotu kitiyata aronis.

²¹ Kitemokinos aŋuna ka akiŋol ŋidwe keŋ ŋulusapa aŋuna ka asecit a papa kec. Nyimyekis ikes itopolooryo kipukata akwap, kori kilelebikis ŋitaunio nakwap.”

²² Ebala Ekapolon ŋolo a ŋajoresyo, “Emani ayoŋ Babilon ka alemari ekiro keŋ ta ŋipiya, ŋidwe ka ŋiletok keŋ.

²³ Eturuwori ayoŋ Babilon neni iboiyoto ŋapupui neni eya ŋataparin, apyaari ayoŋ Babilon omunya ibore daadaŋ a nen.”

Ŋakiro ŋuna etoroniyaritere Asiriya

²⁴ Ekoŋ Ekapolon ŋolo a ŋajoresyo ebala, “Itiyakin ŋakiro lopite ŋolo adaunia ayoŋ akitemokin, itiyakin ŋakiro lopite ŋolo adaunia ayoŋ ayeun ikote ne:

²⁵ Amunyari ayoŋ ŋituŋa ka Asiriya anakwap kaŋ ka epudaari ayoŋ ikes alomoru kaŋ; alacakini ayoŋ ŋituŋa kaŋ anapedor a ŋituŋa ka Asiriya ka alacakini ikes aloticisyo a ŋulu agogoŋok a ŋulu ainakinitae ikes akitiya.

²⁶ Erae nu ŋakiro ŋuna adau ayoŋ ayeun aŋuna a akwap a daadaŋ ka erae ikes esicania ayoŋ ŋituŋa a ŋakwapin a daadaŋ.

²⁷ Ayeu Ekapolon ŋolo a ŋajoresyo akitiya ŋun Ŋae epedori akiretakin iŋes? Isicani tokona iŋes ŋituŋa ka Asiriya. Ŋae epedori akisimyekin iŋes ŋun?”

Ŋakiro ŋuna etoroniyaritere Pilistia

²⁸ Alokaru a ŋolo atwania erwosit Aas aponi todwarae ŋakiro nu:

²⁹ Nyilelyana iyes Ŋipilistin daadaŋ, anerae alemar ituŋanan ŋini sek ikisicanit iyes. Nyemaikina iyes ilelyanete aŋuna atwania ŋolo aronon ikwa emun ŋol, anerae analyasit a ŋolo aronon a ŋol, ebuni ece ŋolo aronon ikwa akipom, eletonit ŋolo ikwaan ka emun ŋolo adedeŋan ŋolo epori.

³⁰ Eyakaunotor ŋulu ekulyakaka akilo ŋuluce akimuj ka iboikinosi ŋulu eyakatar akiitanit emam ŋace; nai emyekini ayoŋ totwaka ŋiletok kon aŋuna ka akoro, aari ayoŋ ŋipiya a ŋituŋa kon.

³¹ Okoe Ŋipilistin, kiwololoto alopukei, kigworo alotaunio aŋuna ka akiŋarakino, tomarana ikibulit iyes daadaŋ, anerae ebunit apuwa alo Kuju apuwa ŋina a ŋasigarya a ŋuna adedeŋak, a ŋuna emam ŋikarikok kec ŋini ekuryana.

³² Anukiro eboŋokinio neni a ŋituŋa a ŋulu iyakuunitae alo Pilistia? Eboŋokinio ikes atemar etogogoŋ Ekapolon Sion ka eryamunete ŋituŋa ŋulu eyakatar akiitanit neni eiunotor.