Isa. 1 - Ebaibul

¹ Erae nu ŋakiro ŋuna abu Akuj kisileerek Isaya lokoku ka Amos aŋuna a ŋituŋa a Yudaya ka Yerusalem alorwa a ŋulu epukatotor Usia, Yosan, Aas ka Esekia ŋulu arae ŋirwosi a Yudaya.

Aronis ŋina a ŋituŋa a Yudaya

² Kirwor Ekapolon tema, “Kiirasi okoe nakuj ka akwap! Anerae adau Ekapolon alimun ŋakiro nu, ‘Abu ayoŋ etan ŋidwe ka abu etopolou ikes, nai akaŋero ikes ayoŋ.

³ Eyeni emoŋ elope keŋ ka eyeni esigirya neni eyai akimuj ŋina itania elope keŋ iŋes. Nai nyeyenete Ŋisirael ŋakiro ŋun, emamukatar ŋituŋa kaŋ ayenut.’ ”

⁴ Ekaŋ iyes ŋituŋa a akwap a ŋina a ŋikasecak ŋituŋa ŋulu ileleba asecit, ŋiletok ŋulu itiyaete aronis 2ŋituŋa ŋulu itunaete ŋuluce. Aŋero ikes Ekapolon, aŋero ikes ŋolo Asegan ŋolo a Isirael ka amuleno Ekapolon.

⁵ Kaanukiro iwaritotor ŋakibuŋaeta ŋace? Kaanukiro irubakinitotor irae ŋikaŋerok? Idyakasi iyes ŋakyes ka alilimiyosi ŋitai kus.

⁶ Ameun anakejen kus anenidapal tari nakyes kus, mam neni ejok a nen, nai ileleba ŋawanan ka ŋajemei ŋuna eleleete ŋaakot; nyimadaritae ŋajemei ŋun, kori nyeenitae, kori nyiwasakinitae adiokimyet.

⁷ Aruwor akwap kus ekasile, anomiya akim ŋitaunio kus, aŋatasi ŋituŋa ŋulugelae akwap kus iteete iyes, aruwor akwap kus ekasile, anomiya akim ŋitaunio kus.

⁸ Emyekin ŋituŋa a Yerusalem ikwa eripipi ŋolo alomanikor a ŋikito a epiini, ikwa eripipi ŋolo alomanikor a ŋakolil, ikwa etaun ŋolo irikaunitae.

⁹ Ani kerae nyikiesikinitor iwon Ekapolon ŋolo a ŋajoresyo ŋipiya yok ŋidi, kikikokinit iwon Sodoma ka kikikwaanikina ka Gomora.

¹⁰ Kiirasi ŋakiro ŋuna irworo Ekapolon, iyes ŋikepukak a Sodoma! Topupokisi ŋakiro ŋuna itatami Akuj kosi, iyes ŋituŋa a Gomora!

¹¹ Irworo Ekapolon ebala, “Ŋakai kaŋ ŋamuronisya kus ŋuna alalak, akaupa ayoŋ ŋainakineta ŋuna epeyo ŋuna a ŋimesekin ka asepwae a ŋibaren a ŋulu atumak; nyeketalakarito ayoŋ ŋaokot a ŋimoŋin, kori a ŋikalei a ŋulumesekin, kori a ŋamee.

¹² “Ŋae ikilimokini iyes ayaunun ŋibaren ŋul neni kaŋ apaki ŋina iponiata iyes akilip neni kaŋ? Nyipudata nabo tomunaasi ŋalapatui ŋuna a Akai kaŋ.

¹³ Mam ajokis eyai nayaunun ŋainakineta, nyeketalakarit ayoŋ ekinyate kus. Nyacamit ayoŋ ŋasuban kus ŋuna a elap a ŋolokitete, ŋuna a Sabato ka ŋasuban kus ŋace ŋuna inyaraununotor iyes iwapei, erae ŋun daadaŋ ŋuna aronok. Nyacamit ayoŋ akidaŋidaŋ ŋasuban ŋuna ka asecit ŋuna ilipyata iyes.

¹⁴ Eŋerit etau kaŋ ŋasuban kus ŋuna a ŋilapyo a ŋulukitet ka ŋasuban kus ŋuna emaikina iyes itiyaete, eketuupa ikes ayoŋ, ekesyaasi ikes ayoŋ nyapedori akidaŋidaŋ.

¹⁵ Ani ikyaarete iyes ŋakan kus ilipete, nyeŋoliuni ayoŋ neni kus, tari daŋ kilipa iyes ŋakilipasinei ŋuna alalak, nyapupokini ayoŋ, anerae itereŋa iyes ŋakan kus anakiar ŋituŋa.

¹⁶ Tomookunos, kitesegunos, tojoŋoto akitiya ŋuna aronok alokiŋaren kaŋ, tojoŋoto akitiya ŋuna aronok,

¹⁷ “Toyenutu akitiya ŋuna ajokak, kiwara akiyookino, toiutu ŋulu isicanitae, kiŋarakisi ŋikokyok, kirworo aŋuna a ŋapuseru.”

¹⁸ Irworo Ekapolon ebala, “Iyes ŋituŋa a Yudaya, potu tokona erworiutu ŋakiro, tari kereŋak ŋasecisya kus puu ikwa ŋaokot, ekwaŋunete ikwa ŋalepan; tari kereŋak ikes ikwa ausi ŋina areŋan-kipurat, ekwaŋunete ikwa ŋajul a amesek a ŋina akwaŋan.

¹⁹ Ani ca kicamut iyes, ido kiwuapa ŋakiro kaŋ, imujete iyes ŋamuja ŋuna ajokak anakwap;

²⁰ nai ani kiwout ka kiŋero, ikirikaryo iyes a ekileŋ;” anerae adau Ekapolon alimun ŋakiro ŋun.

Etaun ŋolo abu tomunaar

²¹ “Okoe aruwor ŋituŋa a etaun a ŋolo sek ekinyoma ŋulu emalaaka! Ayakasi paaran neni keŋ ŋituŋa ŋulu atubete ŋakiro anakiyookino, ayai paaran akiyookino lotuŋa keŋ. Nai tokona aruwor ŋituŋa keŋ ŋikaarak.

²² Okoe Yerusalem, aruwor esilipa kon ecaryoit, aruwor epiini kon ŋolo ecorim.

²³ Aruworosi ŋikapolok kon ŋikaŋerok, ido aruwor ŋirukitos a ŋikokolak. Emina ŋinituŋanan akaluŋuluŋut ka iwarito aryamun ŋainakineta. Nyeikinito ikes ŋikokyok ka nyetamunito ikes akitub ŋakiro a ŋapuseru aloikiikoe.

²⁴ “Aŋun irworo Ekapolon ŋolo ipukat daadaŋ, Ekapolon a ŋajoresyo, Ekapolon ŋolo etiron ŋolo a Ŋisirael ebe, ‘Okoe! anyunyurikin ayoŋ ŋimoe kaŋ, ido enyaŋa ŋuna etiyata ŋimoe kaŋ neni kaŋ.

²⁵ Anapedor kaŋ, akaremokin ayoŋ iyoŋ; alemari ayoŋ neni aronon aneni kon, lopite ŋolo eliere asuwat ka alemari ayoŋ ŋuna nyejokak aneni kus.

²⁶ Enyakakini ayoŋ ŋikatubok ŋulu ajokak neni kon ikwapei ayakatar ekiŋaren ka ŋikesirworiunak ŋulu ajokak neni kon ikwapei ayakatar ekiŋaren. Ekaku a ŋun, ikinyarao iyoŋ Yerusalem etaun ŋolo ka akiyookino ka ŋolo a akikinyoma.

²⁷ “‘Elakunio ŋituŋa a Sion anatubokino a ŋina iyookino ka elakunio anakiyookino ŋulu ekiyete, ŋulu iboiyete alotooma keŋ.

²⁸ Nai emunyaryo ŋikaŋerok ka ŋikasecak kaapei, ido etwakete ŋulu aesikis Ekapolon.

²⁹ Eroketa aneni kus ŋakiriketa ŋuna sek ilipyata iyes ka erokeata aneni kus ŋimanikorin ŋulu sek iseunito iyes.

³⁰ Ikwaanikinosi iyes ka ekuyon ŋolo einiyarito ŋakuii, ikwaanikinosi iyes ka emanikor ŋolo emam ŋakipi.

³¹ Ikwaanikinosi ŋikagogoŋok ka ŋanya ŋuna aonok, enepunete ŋiticisyo kec ikwa ekatyenyityenyit, icunyaryo ikes kaapei ka ŋiticisyo kec ŋulu aronok; emamukaun ŋini itojoŋoe ikes akinom.’ ”