Esta 9 - Ebaibul

Amunyaro a ŋimoe a Ŋiyudayan

¹ Ani edoli ŋirwa ka elap ŋitomon ka ŋiuni elap ŋolo a ŋitomon ka ŋiarei, iŋes elap ŋolo enyaritae Adar, aponi togeunae akitiya ŋuna a ekisil a ŋolo abu erwosit kitutub. Akoloŋit ŋin, atamete ŋimoe a Ŋiyudayan areun Ŋiyudayan, nai apotu Ŋiyudayan toreut ŋimoe kec ŋulu emanito ikes.

² Tocunanakin Ŋiyudayan lotaunio kec ŋulu a ŋakwapin a daadaŋ a ŋuna epukat Ausero. Tocunanakin ikes nen etenito akitijiore ŋulu acamito akitiya aronis neni kec. Mam ituŋanan abu towoik akitijiore ikes, anerae aris ŋituŋa daadaŋ kekuryakyeta.

³ Apotu ŋikapolok a ŋakwapin a ŋun a daadaŋ ka ŋikawoikinitok erwosit anakwapin akwap keŋ ta ŋulu epukato ŋakwapin ŋun toriwo kaapei ka ŋulu arae ŋikepukak alokai a erwosit, kiŋarakis Ŋiyudayan, anerae aris ikes kekuryakyeta aŋuna a Moridekai.

⁴ Akuryaka ikes, anerae Moridekai iŋes arae ekapolon alokai a erwosit, ido aris ŋituŋa a ŋakwapin a ŋun a daadaŋ kiirasi ŋuna ka apolou keŋ a ŋina eata jik apoloor nooi.

⁵ Aŋun, apotu Ŋiyudayan kitijioto ŋulu emanito ikes, toara a ŋatumio. Toŋola ka tomunyasi ikes, ido kitiyata ŋuna etalakarito ikes neni a ŋulu emanito ikes.

⁶ Alokai ka apukan a ŋina ayai Susa, apotu Ŋiyudayan toara ka tomunyasi ŋituŋa ŋamiae ŋakan.

⁷ Apotu Ŋiyudayan toara Parisandasa, Dalipon, Asipata,

⁸ Porata, Adalia, Aridata,

⁹ Parimasita, Arisai ka Aridai ta Paisata.

¹⁰ Arae ŋulutomon ŋul ŋidwe ka Aman ŋulusapa, Aman lokoku Amedasa a ŋolo arae emoit a Ŋiyudayan. Nai apotu Ŋiyudayan nyeŋatasi ŋiboro a ŋituŋa a ŋul.

¹¹ Akoloŋit ŋinapei, aponi tolimokinae erwosit ekimar a ŋituŋa a ŋulu aponi toarakinae kai ka apukan alo Susa.

¹² Tema erwosit neni ka arwosit Esta, “Aar Ŋiyudayan ŋituŋa ŋamiae ŋakan alokai ka apukan a ŋina alo Susa, aar daŋ ŋidwe ka Aman ŋulusapa ŋitomon. Nyaanu ŋakiro ŋace ŋuna etiyata Ŋiyudayan anakwapin a erwosit a ŋunace? Nyo tokona icamit iyoŋ akilip? ikotere ikiinakinio iyoŋ. Inyoni ice iŋita iyoŋ? Ikiinakinio iyoŋ.”

¹³ Tema Esta, “Ani kilakar iyoŋ erwosit a ŋakiro a nu, ekelipit tocamak moi taparacu Ŋiyudayan ŋulu eya Susa kitiyata ŋuna ibu iyoŋ tocamak ikes akitiya nakoloŋit na. Tocamak ikes kinenekis ŋidwe ka Aman ŋulusapa ŋulutomon nakito.”

¹⁴ Aŋun, abu erwosit tolimu atemar kitiyae ŋun; aponi tolimunoe ekisil ŋol alo Susa, ido aponi kinenekinoe ŋidwe ka Aman ŋulusapa ŋulutomon.

¹⁵ Tocunakin Ŋiyudayan ŋulu aya Susa daŋ ŋirwa ka elap ŋitomon ka ŋiomwon elap ŋolo ka Adar, toara ikes alo Susa ŋituŋa ŋamiae ŋauni. Nai apotu Ŋiyudayan nyeŋatasi ŋiboro a ŋituŋa a ŋul.

¹⁶ Apotu Ŋiyudayan ŋuluce daŋ ŋulu ayakasi nakwapin ŋuna epukat erwosit tocunanakinos akitijiore ŋimoe kec toara ikes; inak nen ikes akieŋar alomoe kec. Apotu Ŋiyudayan toar anakwapin a ŋun ŋituŋa ŋalipyo ŋatomonikanikaarei ka ŋikan. Nai apotu ikes nyeŋatasi ŋiboro a ŋituŋa a ŋul.

¹⁷ Etiyakinosi ŋakiro ŋun ŋirwa ka elap ŋitomon ka ŋiuni elap ŋolo ka Adar. Ani edoli ŋirwa ka elap ŋitomon ka ŋiomwon, apotu Ŋiyudayan kieŋut; kituruwosi akoloŋit ŋin ŋina a ŋasuban ka alelyan.

Kitaleikinoe ŋasuban ŋuna a Purim.

¹⁸ Nai apotu Ŋiyudayan ŋulu ayakasi Susa tocunakinos ŋirwa ka elap ŋitomon ka ŋiuni ta ŋirwa ka elap ŋitomon ka ŋiomwon. Ani edoli ŋirwa ka elap ŋitomon ka ŋikan, kieŋut; kituruwosi akoloŋit ŋin ŋina a ŋasuban ka alelyan.

¹⁹ Ŋakiro ŋun nai ecunanakinotor Ŋiyudayan ŋulu iboiyete alorerya ŋirwa ke elap ŋitomon ka ŋiomwon elap ŋolo ka Adar; ituruworitor akoloŋit ŋin ŋina ka alelyan, ŋina a ŋasuban, akoloŋit ŋina ajokan ŋina einanakinere make ŋainakineta.

²⁰ Abu Moridekai kigir ŋakiro ŋun. Kiyakiya ŋabaruwae neni a Ŋiyudayan daadaŋ a ŋulu ayakasi nakwapin ŋuna epukat erwosit Ausero; nakwapin ŋuna aapiyete ka ŋuna alwanak;

²¹ Alimokin ikes atamunit akitiya ŋasuban ŋirwa ka elap ŋitomon ka ŋiomwon ta ŋirwa ka elap ŋitomon ka ŋikan elap ŋolo ka Adar a ŋolokaru.

²² Totamunito ŋirwa ŋul erae ŋirwa ŋulu eeŋuniata Ŋiyudayan alomoe kec ka elap ŋol erae elap ŋolo aryamuniata ikes alelyan akilo akiyaloloŋ, akieŋun akilo akigworo. Amaikina ikes kituruwosi ŋirwa ŋul ŋulu ka alelyan ka ŋulu a ŋasuban, ŋirwa ŋulu einanakinere make ŋainakineta ŋuna a ŋamuja ka ŋulu einanakinere ŋainakineta neni a ŋikulyak.

²³ Aŋun, apotu Ŋiyudayan kisyakis akitiyaenen ŋasuban ŋun ŋuna sek apotu ikes kitiyata, kitiyata lopite ŋolo egiritor Moridekai neni kec.

²⁴ Egiri Moridekai ŋun, anerae kebu Aman lokoku Amedasa a ŋolo arae Egagitait, emoit a Ŋiyudayan a daadaŋ totuk akiman Ŋiyudayan ka amunyar ikes. Keris iŋes kitiya pur (iŋes akilamilam) aŋuna ka amunaar ka amunyar Ŋiyudayan.

²⁵ Nai ani irari erwosit ŋakiro ŋuna ka atuko ka Aman, abu tolimu anakiro a ŋuna egiri iŋes atemar kisicanae Aman aŋuna ka aronis a ŋina atuku iŋes akitiya neni a Ŋiyudayan. Tolimu iŋes atemar kinenekinoe Aman ka ŋidwe keŋ ŋulusapa nakito.

²⁶ Aŋun, enyaritae ŋirwa ŋul ŋulu ieŋununiata Ŋiyudayan Purim, ebunit akirot ŋin aneni a Pur. Aŋuna a ŋakiro daadaŋ a ŋuna egiritae nabaruwa ŋin ka ŋuna apotu kitiyakin neni kec,

²⁷ apotu Ŋiyudayan kitutubo erae etal kec, ŋolo a ŋiletok kec ka ŋolo a ŋinituŋanan eruwor Eyudayat, atemar emam ikes akisimuryakin akiric ŋirwa ŋuluarei ŋul a ŋolokaru. Emaikina kitiyata lopite ŋolo igiritere ka anapaki a ŋina emaikina kitiyaere.

²⁸ Emaikina etamunitae ŋirwa ŋul ananyameta a daadaŋ, alokalya a daadaŋ, anakwapin a daadaŋ ka alotaunio a daadaŋ. Nyemaikina Ŋiyudayan tojamakis akitiya ŋasuban ŋirwa ŋul, kori nyimuryakis ŋiletok kec ŋirwa ŋul.

²⁹ Aŋun, abu arwosit Esta nakoku ka Abiail kaapei ka Eyudayat Moridekai kigira ka apedori a ŋina ka apolou kec, kitogogoŋo ŋakiro a Purim anabaruwa a ŋin a ŋina a ŋaarei.

³⁰ Kiyakiya nai Moridekai ŋabaruwae neni a Ŋiyudayan daadaŋ a ŋulu aya nakwapin ŋun amiat ka ŋatomoniarei ka ŋakanikaarei, ŋuna epukat Ausero. Ŋabaruwae ŋuna agatakinito Ŋiyudayan ekisil ka akinapakina.

³¹ Tolimok ikes kirica ŋirwa ŋulu a Purim anapakio a ŋuna emaikina kitiyaere, lopite ŋolo aponiata Eyudayat Moridekai ka arwosit Esta tolimokiniata ikes ekiŋaren. Kirica lopite ŋolo aponiata ikes tolimut aŋuna kec ka aŋuna a ŋiletok kec ŋakiro ŋuna ka aronenen ka ŋuna ka akigworo.

³² Apotu ŋakiro ŋuna alimuni arwosit Esta kitogogoŋo ŋakiro a Purim, ido aponi kigirae lokitaabo.