Esta 7 - Ebaibul

¹ Apotu nai erwosit toloto ka Aman akimuj ka arwosit Esta.

² Ani edolete ŋirwa ŋiarei, apaki ŋina amasyata ikes epiini, kiŋit nabo erwosit Esta tema, “Nyo icamit iyoŋ akilip arwosit Esta, ikotere ikiinakinio iyoŋ? Inyoni iŋita iyoŋ? Tari kerae atutubet apei ŋina ka akwap kaŋ iŋita iyoŋ, ikiinakinio.”

³ Toboŋok nai arwosit Esta tema, “Ani erwosit karae ayoŋ ŋina ajok aneni kon, ani kilakari iyoŋ a nu, ekelipit toiu akiyar kaŋ, ŋuna elipa ayoŋ ŋun ka toiu akiyar a ŋituŋa kaŋ, ŋuna eŋita ayoŋ ŋun.

⁴ Anerae ikigyelar isua, ayoŋ ka ŋituŋa kaŋ, ikotere ikiaryo ikimunyaryo todaunetei. Kerae bo itogyelaritetei isua aruwor ŋipi kori ŋapi daŋ kejok! Keliliŋiyarit ayoŋ ŋun alotau kaŋ. Nai nyinyakakini emoit kosi ŋol erwosit idio ibore aŋuna ka amunyaryo kosi a na.”

⁵ Tema nai erwosit Ausero neni ka arwosit Esta, “Ŋae ituŋanan ŋin, ŋini ecamit akitiya ŋun? Ŋae ituŋanan ŋin, ŋini ewuak lotau keŋ akitiya ŋun?”

⁶ Tema Esta, “Erae ro ituŋanan ŋini ikimanit isua, ekapilan Aman lopei lo!” Tobul Aman alokiŋaren erwosit ka arwosit.

⁷ Tokadak erwosit nooi, tonyou anasuban eŋoit, tolot nenilapat kiŋa a akai ka apukan. Nai abu Aman kidoŋ kai imaimai arwosit Esta todyek erwosit kisyoni iŋes, anerae abu iŋes taanyu atemar acamaki erwosit akiar iŋes.

⁸ Ani eboŋuni erwosit alokiŋa akai ka apukan, neni emujere ŋasuban, toramakin Aman lokitaada ŋolo aperyo Esta. Tema erwosit, “Ecamit mono ekile lo tari akirat arwosit alokai kaŋ oyai ayoŋ a?” Alimuni erwosit ŋakiro ŋun bon, kimukosi ŋikolupae ereet ka Aman.

⁹ Ayai Aribona nen, epei a ŋikolupae a ŋulu eteete erwosit, kirworik iŋes alokiŋaren erwosit tema, “Kiirasi ŋace nu, ewuasi alokai ka Aman ŋakito ŋuna ecamit iŋes akinenekin Moridekai ŋolo abu tolimok erwosit ŋakiro ŋuna ajokak. Erae aoyau a ŋakito a ŋun ŋimitae ŋatomoniarei ka ŋiuni anyoun alokwap.” Tema erwosit, “Kinenekisi Aman nakito ŋun.”

¹⁰ Aŋun, apotu ŋituŋa kinenekis Aman nakito ŋuna abu iŋes todupak akinenekin Moridekai. Totikiun nai anyunyura a erwosit.