Esta 5 - Ebaibul

Ŋasuban ke Esta

¹ Ani edolete ŋirwa ŋiuni, tonap Esta ŋilowi ŋulu ka apolou, towo analapatu a ŋina alokidiŋ ere a erwosit, alokiŋaren akai ke erwosit. Eboi erwosit, apaki ŋin alokicoloŋ keŋ a ŋolo ka apolou, alotooma akai a apukan, alopuke ka akai.

² Ani iŋolikini erwosit arwosit Esta ewoi analapatu a ŋina alokidiŋ ere keŋ, tolakar erwosit aŋuna ke Esta; kikeu ebela keŋ ŋolo ka apolou ŋolo etiyaunitae a egolid ŋolo ayai nakan keŋ. Aŋun, abu Esta kiyoto totap akou ke ebela a ŋol.

³ Kiŋit erwosit iŋes tema, “Anu ŋace arwosit Esta? Anukiro icamit iyoŋ akiŋit ayoŋ? Ikiinakinio iyoŋ ŋuna iŋita tari kerae atutubet apei ŋina ka akwap kaŋ.”

⁴ Tosodi Esta toboŋok erwosit tema, “Ani kejokak aneni kon erwosit, ekelipit iyoŋ ka Aman potu nakuwar na nasuban ŋuna etemok ayoŋ aŋuna kon.”

⁵ Tema nai erwosit, “Yautu Aman ne atipei, ikotere kitiyakinae ŋuna iŋita Esta.” Aŋun, apotu erwosit ka Aman potu nasuban ŋuna etemokinit Esta.

⁶ Ani emasete ikes epiini, kiŋit erwosit Esta tema, “Nyo icamit iyoŋ akilip, ikotere ikiinakinio iyoŋ? Inyoni iŋita iyoŋ? Tari kerae atutubet apei ŋina ka akwap kaŋ iŋita iyoŋ, ikiinakinio.”

⁷ Toboŋok nai Esta tema, “Ŋakiro nu ikes elipa ka eŋita ayoŋ:

⁸ Ani kajok ayoŋ aneni a erwosit ka kelakara erwosit ainakin ayoŋ ŋuna elipa, kisiyook ŋuna eŋita ayoŋ, elipit ayoŋ erwosit ka Aman potu moi taparacu nasuban ŋuna etemokini ayoŋ. Nen nai aboŋokinio ayoŋ ŋuna iŋita erwosit.”

Toyeu Aman akiar Moridekai

⁹ Toloma Aman a nen akoloŋit ŋin elakara ka elelyani etau nooi. Nai ani iŋolikini Aman Moridekai alopuke a erwosit, toanyu atemar nyecamit anyoun kori akitoodiun akitopoloorit keŋ Aman. Abu Aman toŋoik Moridekai nooi.

¹⁰ Kikote neni daŋ, abu Aman totik etau, tolot kai keŋ. Kiyakiya ituŋanan anyarare ŋikonei keŋ ka Seres aberu keŋ.

¹¹ Tolimok Aman ŋituŋa ŋul alalau ŋina a ebari keŋ ka alalau a ŋidwe keŋ a ŋulusapa ta ŋadoketa a apolou ŋuna kitopoloonorya erwosit iŋes. Tolimok daŋ ikes epite ŋolo etopoloorya erwosit iŋes akilo ŋikapolok ŋuluce ka ŋiketiyak a erwosit.

¹² Kiyatak Aman ŋace tema, “Tari arwosit Esta abu nyenyara ituŋanan ice arukor ka erwosit nasuban ŋuna etemokinit iŋes, mati ayoŋ bon. Tari moi taparacu daŋ, ikinyarit Esta ayoŋ ka erwosit nasuban.

¹³ Nai ŋun daadaŋ, mam ajokis itiyakinete neni kaŋ, erae ca kete ayoŋ Eyudayat ŋolo enyaritae Moridekai iboi alopuke a erwosit.”

¹⁴ Temasi nai Seres aberu ka Aman ka ŋikonei ka Aman daadaŋ, “Kitudukok ŋituŋa ŋipirin ŋiarei ŋulu edoli aoyau kec alokidiama ŋimitae ŋatomoniarei ka ŋiuni, kiriwokinae apeeta alokidiama. Ani moi taparacu tolimok erwosit kinenekinoe Moridekai napeeta a ŋipirin a ŋul; toloto nai iyoŋ ka erwosit nasuban elakara etau.” Tolakar Aman a ŋakiro a ŋun, kitudukok ŋituŋa ŋakito ŋun.