Esta 4 - Ebaibul

Tocamu Esta akiŋarakin Ŋiyudayan

¹ Ani eyenuni Moridekai ŋuna keponi totubunoe daadaŋ, tocilicili ŋilowi keŋ, tonap ŋiguniyae, kipunupunakin ekuron, ido tolot kidiŋ etaun iwololoe nooi, enomorito ŋakiro.

² Nai abu iŋes tolot tari lopuke a erwosit bon, anerae mam ituŋanan acamakinitae elomari alopuke a erwosit enapit ŋiguniyae.

³ Aŋina kibois daadaŋ a ŋina kelimoritae kori pa kelimoritae ŋakiro a erwosit ka ŋakiro ŋuna aponi totubunoe, apotu Ŋiyudayan make kisyakis akigworo nooi. Kisyakis akiredanakin akiron, akigworo ka akiwolol. Tolomakis ŋikalalak alokidiŋ kec akiper loguniyae ka lokurono.

⁴ Ani epote ŋaketiyak ke Esta ka ŋikolupae ŋulu eyokiyete iŋes alimokin Esta ŋakiro a Moridekai, tonomosi arwosit ŋakiro ŋun nooi. Kiyakiya ŋilowi ikotere enapi Moridekai, tolacaria ŋiguniyae. Nai abu Moridekai nyecamu ŋilowi ŋul.

⁵ Abu nai Esta tonyarau Atac, epei a ŋikolupae a ŋulu a erwosit ŋolo ewuakinitae akitiya neni a Esta. Tolimok Esta Atac alosit neni Moridekai akiŋitun ŋuna eyakar, ido kaanukiro eyakatar ŋun.

⁶ Tolot Atac neni a Moridekai a ŋolo ayai nenilapat alokidiŋ etaun kiŋaren epuke a erwosit.

⁷ Tolimok Moridekai Atac ŋakiro daadaŋ ŋuna atubunitoe amunyarya Ŋiyudayan ka etyae a ŋisilipae a ŋulu abu Aman kiik ainakin neni a ŋulu iŋadaete ŋisiliŋa a erwosit.

⁸ Abu daŋ Moridekai inak Atac ekitaabo ŋolo egiritae ŋakiro ŋuna eseraunio alo Susa, ŋuna ka amunyar Ŋiyudayan, ikotere Atac itoodikini ŋun neni ke Esta, kisileerek ejok. Tolimok Moridekai Atac kimaima Esta tolot neni a erwosit todyek erwosit kiwar epite ŋolo kiŋarakinet ŋituŋa ke Esta.

⁹ Tolot Atac neni ke Esta, tolimok iŋes ŋakiro ŋuna alimuni Moridekai.

¹⁰ Tolimok nai Esta Atac ŋakiro ŋunalimokina Moridekai tema,

¹¹ “Eyenete ŋiketiyak a erwosit daadaŋ ka ŋituŋa akwap keŋ atemar, ani kelot ekile edio kori aberu adio toloma nalapatu ŋina eyai kidiŋ akai a erwosit pa eyaritae, eyai atubokinet epei bon a ŋun; iŋes na ebe, ‘Emaikina ŋin toarae.’ nai ani kikeu erwosit ebela keŋ ŋolo ka apolou ŋolo itiyaunitae a egolid aŋuna a ituŋanan a idio, iŋes nai nyearere ituŋanan ŋin. Mam ayoŋ alope nyenyara alosit neni a erwosit; adol tokona ŋirwa ŋatomoniuni.”

¹² Ani iirari Moridekai ŋakiro ke Esta,

¹³ tolimok Moridekai Esta ŋakiro nu ebe, “Nyitamak atemar aŋina iboiyo iyoŋ alokai a erwosit ikiesikinio iyoŋ anamunyaro a Ŋiyudayan a ŋuluce a daadaŋ,

¹⁴ anerae ani kililiŋ iyoŋ jik apaki ŋina ikoni na, ebuni akiŋarakino ka aiuno neni a Ŋiyudayan aiwace. Nai ikimunyaryo iyoŋ ka ekal a papa kon. Ŋae eyeni? Acepaki aponi ikiinakin iyoŋ apolou aŋuna ka apaki a ŋina ikoni na.”

¹⁵ Tema nai Esta eboŋokini ŋakiro a Moridekai,

¹⁶ “Emaikina Moridekai tolot, tocunak Ŋiyudayan daadaŋ ŋulu eya Susa; kiredakis akiron aŋuna kaŋ. Nyemaikina ikes kimuja kori tomata ŋirwa ŋiuni, nakwaare kori naparan. Ayoŋ ka ŋaketiyak kaŋ ikiredakini akiron ikwapei iyes. Ekaku ka akiron, alosi ayoŋ neni a erwosit; tari daŋ pa kecamakinito ŋikisila, ani keruwor daŋ atwanare, otwan.”

¹⁷ Tolot Moridekai kirimo, kitiya ikwaŋinapei alimokinitor Esta iŋes.