Esta 3 - Ebaibul

Totuk Aman amunyar Ŋiyudayan

¹ Kelunyar ŋun, abu erwosit Ausero kitopoloo Aman lokoku ka Amedasa a ŋolo arae Egagitait. Kitopoloo erwosit Aman akilo ŋikapolok ŋuluce daadaŋ ŋulu epukatotor iŋes.

² Totumo ŋiketiyak a erwosit daadaŋ ŋulu aya lopuke keŋ aryedikenen itopoloorito Aman; anerae abu erwosit kicik ŋituŋa akitopoloor Aman. Nai abu Moridekai nyeryedik kori nyitopoloo Aman.

³ Temasi nai ŋiketiyak a erwosit ŋulu aya lopuke neni a Moridekai, “Kaanukiro nyiwuapitor iyoŋ ŋakiro ŋuna alimu erwosit?”

⁴ Ani kedaut ikes akisirwor Moridekai ŋarwa ka ŋarwa ka aŋuna awounia iŋes akiirar ŋuna alimonokinete ikes iŋes, apotu ŋiketiyak a erwosit tolimokis Aman, ikotere eyenunete ikes kepedori Moridekai arubakin itiyae ŋakiro ŋun, anerae keris sek Moridekai kelimoki ikes atemar arae iŋes Eyudayat.

⁵ Ani eanyuni Aman atemar nyecamit Moridekai aryedik alokiŋaren keŋ akitopoloor iŋes, toŋo Aman nooi.

⁶ Nai ani eyenuni iŋes ŋituŋa a Moridekai, abu nyiman akiar Moridekai bon. Akilo abu Aman kiwar erot ŋolo emunyarya ŋituŋa a Moridekai daadaŋ, Ŋiyudayan ŋulu ayakasi nakwap ŋina epukat Ausero.

⁷ Ani edoli elap ŋolo ke epei, ŋolo enyaritae Nisan, ekaru ŋolo a ŋitomon ka ŋiarei ipukat Ausero, kitiyata ikes Pur, (Iŋes Akilamilam) alokiŋaren Aman aŋuna ka aanyunia akoloŋit ka elap ŋolo emunyarere Ŋiyudayan. Abu nai akilamilam kitatakanu erae ŋirwa ke elap ŋitomon ka ŋiuni, elap ŋolo a ŋitomon ka ŋiarei, elap ŋolo enyaritae Adar.

⁸ Tolimok nai Aman erwosit Ausero tema, “Eya ne ŋituŋa ŋice ŋulu ielakina ka etyakara make aneni a ŋituŋa a ŋakwapin a ŋuna ipukat ioŋ. Egelaaka ŋikisila a ŋituŋa a ŋul aneni a ŋulu a ŋituŋa a ŋuluce a daadaŋ, ido nyiwuapito ikes ŋikisila a erwosit. Aŋun, nyemaikina erwosit kimyek ikes.

⁹ Ani kejokak nu aneni a erwosit, emaikina totubunoe akirot ŋina emunyarere ikes. Ainakini ayoŋ Ŋitalantae ŋulu a esilipa ŋalipyo ŋatomon neni a ŋulu itiyakinete ŋuna alimu erwosit, ikotere eyaunete ikes ŋitalantae ŋul neni a ŋulu iŋadaete ŋisiliŋa a erwosit.”

¹⁰ Aŋun, abu erwosit tolemu ekaboboot keŋ ŋolo ka apolou anakan keŋ, ido inak Aman lokoku ka Amedasa a ŋolo arae Egagitait, emoit a Ŋiyudayan.

¹¹ Tema erwosit neni ka Aman, “Erae nakan kon eyai esilipa kaapei ka ŋituŋa daŋ, itiyae iyoŋ neni kec lopite ŋolo icamitor iyoŋ.”

¹² Aponi nai tonyaraunae ŋikegirigirak a erwosit elap ŋolo ke epei ŋirwa ke elap ŋitomon ka ŋiuni. Apotu ŋul kigira ŋakiro daadaŋ ŋuna abu Aman kicikak ŋulu awoikinito erwosit anakwapin a ŋuna epukat iŋes ka ŋulu epukato ŋakiboisyo daadaŋ akwap a ŋin ta neni a ŋikapolok a ŋituŋa a daadaŋ. Kigirakis ikes a ŋinakibois ŋakiro lopite ŋolo igiryata ŋituŋa anakibois a ŋin ka kigirakis ŋulutuŋa ŋakiro a ŋajep kec. Egiritae ŋakiro ŋun alokiro a erwosit Ausero, ido ekoŋokinitoe emacar a ekaboboot a erwosit neni agolokinitere ŋakiro ŋun.

¹³ Inakinae ŋabaruwae ŋun neni a ŋikapiranak toemyata nakwapin ŋuna epukat erwosit daadaŋ, ikotere tomunaarae, toarae ka tomunyarae Ŋiyudayan daadaŋ; ŋulu cicik ka ŋulu apolok, ŋaberu ka ŋidwe alotooma akoloŋit apei bon. Akoloŋit ŋin iŋes ŋirwa ke elap ŋitomon ka ŋiuni elap ŋolo ŋitomon ka ŋiarei, ŋolo enyaritae Adar, ido etemokino toŋatarae ŋiboro a Ŋiyudayan akoloŋit ŋin.

¹⁴ Aponi yaarae ŋakiro ŋuna egirio ŋun ŋinakwap erae ŋuna atubun alimokin ŋituŋa daadaŋ akitemokino aŋuna ka akoloŋit a ŋin.

¹⁵ Toema ŋikapiranak atipei nakwapin ŋuna epukat Ausero, ikwapei alimokinitor Ausero ikes, ido aponi ŋakiro ŋun kiseraunae alokai ka apukan a ŋina alo Susa. Kiboikinos erwosit ka Aman, kisyakis akimat kaapei, nai apotu ŋituŋa ŋulu a etaun a ŋolo a Susa kiguryakin.